ទីក្រុងប៉េកាំង ៖ យោងតាមប្រភពមួយចំនួនបានឲ្យដឹងថា ប្រទេសចិនបានច្រានចោលគម្រោងចរចាពាណិជ្ជកម្មជាមួយនឹងសហរដ្ឋអាមេរិក ហើយប្រហែលជាមិនចរចារហូតបន្ទាប់ពីការបោះឆ្នោតសហរដ្ឋអាមេរិកនៅខែវិច្ឆិកា ខាងមុខនេះ ។
ការសម្រេចចិត្តនេះកើតមានឡើង ខណៈដែលលោកប្រធានាធិបតីដូណាល់ ត្រាំ(Donald Trump) ឲ្យសញ្ញាថា លោកបានត្រៀមខ្លួនជាស្រេចក្នុងការទទួលឥទ្ធិពលអវិជ្ជមានលើសេដ្ឋកិច្ចអាមេរិក ពីសង្គ្រាមពាណិជ្ជកម្មនេះ ។
ប៉ុន្មានម៉ោងមុនពេលមានសេចក្តីរាយការណ៍ពីការសម្រេចចិត្តនេះ មន្ត្រីថ្នាក់ខ្ពស់របស់សហរដ្ឋអាមេរិកម្នាក់បានប្រាប់ដល់សារព័ត៌មានថា លោកប្រធានាធិបតីគិតថាការមិនចេញសកម្មភាព នឹងបង្កផលប៉ះពាល់ដល់សេដ្ឋកិច្ចនិងអតិថិជន ។
ប្រភពខាងលើបានឲ្យដឹងទៀតថា ក្រៅពីពន្ធលើផលិតផលចិនចំនួន២០០ប៊ីលានដុល្លារដែលនឹងចាប់មានប្រសិទ្ធភាពនៅថ្ងៃចន្ទនេះហើយ ក្រសួងការបរទេសអាមេរិកក៏បានដាក់ទណ្ឌកម្មលើភ្នាក់ងារការពាររបស់ប្រទេសចិននិងអ្នកគ្រប់គ្រងទៀតផងកាលពីថ្ងៃព្រហស្បតិ៍ដែលចូលរួមបង្កឲ្យមានការច្រានចោលលើគម្រោងចរចានេះ ។
គួរបញ្ជាក់ដែរថា លោកប្រធានាធិបតីត្រាំបានដាក់ពន្ធថ្មីលើផលិតផលចិន និងគំរាមថានឹងដាក់បន្ថែមទៀត ប្រសិនបើប្រទេសចិនដាក់ពន្ធឆ្លើយតបវិញ ។
កាលពីថ្ងៃទី១៨ ខែសីហា ប្រទេសចិនបាននិយាយថា ពួកគេនឹងដាក់ពន្ធលើផលិតផលអាមេរិកចំនួន៦០ប៊ីលានដុល្លារវិញដែលនឹងចាប់មានប្រសិទ្ធភាពនៅថ្ងៃទី២៤ ខែកញ្ញា គឺ១ថ្ងៃក្រោយនៃប្រសិទ្ធភាពពន្ធរបស់អាមេរិក ។
លោក Gao Feng អ្នកនាំពាក្យរបស់ក្រសួងពាណិជ្ជកម្មរបស់ប្រទេសចិនបាននិយាយកាលពីដើមសប្តាហ៍មុនថា ពន្ធថ្មីនេះបង្កើតជាភាពមិនប្រាកដប្រជាថ្មីសម្រាប់ការចរចារវាងប្រទេសចិននិងសហរដ្ឋអាមេរិក ៕
ចែករំលែកព័តមាននេះ