រាជធានីភ្នំពេញ ៖ អ្នកនាំពាក្យគណបក្សកាន់អំណាចលោក សុខ ឥសាន បានអះអាងថា ក្រុមប្រឆាំងកាន់តែភ្លឺភ្នែកថែមទៀត សម្រាប់ការប្រកាសជំហររបស់ប្រទេសមហាអំណាចក្នុងការធ្វើកិច្ចសហប្រតិបត្តិការជាមួយកម្ពុជាដូចជា សហភាពអ៊ឺរ៉ុប និងអាមេរិកជាដើម…
រាជធានីភ្នំពេញ ៖ អ្នកនាំពាក្យគណបក្សកាន់អំណាចលោក សុខ ឥសាន បានអះអាងថា ក្រុមប្រឆាំងកាន់តែភ្លឺភ្នែកថែមទៀត សម្រាប់ការប្រកាសជំហររបស់ប្រទេសមហាអំណាចក្នុងការធ្វើកិច្ចសហប្រតិបត្តិការជាមួយកម្ពុជាដូចជា សហភាពអ៊ឺរ៉ុប និងអាមេរិកជាដើម ។
លោកសុខ ឥសាន បានឲ្យដឹងតាមប្រព័ន្ធតេឡេក្រាមនៅថ្ងៃទី២២ កញ្ញាយ៉ាងដូច្នេះថា « នៅពេលនេះពួកប្រឆាំងកាន់តែភ្លឺភ្នែកហើយ ព្រោះកាលពីថ្ងៃទី២១ ខែកញ្ញា ឆ្នាំ២០១៨ នេះ ឯកអគ្គរដ្ឋទូតសហគមន៍អឺរ៉ុបបានថ្លែងថា សហគមន៍អឺរ៉ុបនៅតែបន្តធ្វើសហប្រតិបត្តិការជា មួយប្រទេសកម្ពុជាសម្រាប់អាណត្តិថ្មី» ។ លោកបានបន្តថា លោកទូតថ្លែងបែបនេះ គ្មានភាពខុសគ្នាទេ រវាងសហភាពអឺរ៉ុប និងសមាជិករបស់ខ្លួន ចំពោះជំហរគាំទ្ររាជរដ្ឋាភិបាលថ្មីរបស់ប្រទេសកម្ពុជា និងការបោះឆ្នោតនាពេលកន្លងទៅនោះទេ ។
រឿងទាំងអស់នោះបានថ្លែងនៅក្នុងការបន្តគាំទ្រក្នុងការជំរុញឲ្យមានកំណើនសេដ្ឋកិច្ចរបស់កម្ពុជា ។ ពិសេសនៅពេលថ្មីៗនេះសហគមន៍អឺរ៉ុប និងសមាជិកសហគមន៍បានគាំទ្រកម្ពុជាយ៉ាងខ្លាំង និងបានផ្តល់ថវិកាប្រមាណ៤១០លានអឺរូ សម្រាប់រយៈពេល៧ឆ្នាំផងដែរ ។ ថវិកានេះបានជួយដល់ជំនួយឥតសំណងផងដែរ ដែលអនុញ្ញាតឲ្យកម្ពុជានាំទំនិញចេញទៅកាន់តំបន់អឺរ៉ុបទាំងអស់ លើកលែងតែអាវុធ ។ លោកបន្ថែមថា កម្ពុជាបានទទួលអត្ថប្រយោជន៍ទាំងអស់នេះដូចវិស័យផ្សេងៗដែលបានឃើញការនាំចេញវិស័យសម្លៀកបំពាក់ទទួលបានអត្ថប្រយោជន៍ពេញលេញ ។ អ្វីៗដែលបានជួយកម្ពុជា គឺទាក់ទងនឹងការលើកកម្ពស់ និងជំរុញប្រព័ន្ធលទ្ធិប្រជាធិបតេយ្យ និងសិទ្ធិមនុស្សនៅកម្ពុជា ។
លោកបានគូសបញ្ជាក់ថា «គោលបំណងនៃការបង្កើតឲ្យមានប្រតិភូសហភាពអឺរ៉ុបដែលមានរូបលោកជាឯកអគ្គរដ្ឋទូត គឺបញ្ជាក់ថា យើងមានសម្លេងតែមួយក្នុងបណ្តាប្រទេសរបស់សហភាពអឺរ៉ុប ។ សហភាពអឺរ៉ុបនឹងបន្តធ្វើការជាមួយរាជរដ្ឋាភិបាលកម្ពុជាដដែលដូចកន្លងមក ដើម្បីអត្ថប្រយោជន៍ប្រជាពលរដ្ឋកម្ពុជា និងប្រទេសកម្ពុជាទាំងមូល» ។ លោកបានសង្កត់ធ្ងន់ថា៖ «ចំពោះខ្លឹមសារនៃជំហររបស់សហភាពអឺរ៉ុបខាងលើនេះ តើពួកឧទ្ទាមក្រៅច្បាប់ និងកាកសំណល់នៃអតីតបក្សប្រឆាំងមានអីត្រូវតវ៉ាទៀតទេ» ។ ជាមួយគ្នានោះដែរអ្នកនាំពាក្យគណបក្សកាន់អំណាចក៏បានលើកឡើងពីមហាអំណាចរដ្ឋអាមេរិកក្នុងធ្វើការកិច្ចសហប្រតិបត្តិការជាមួយកម្ពុជាផងដែរ ។ ជាមួយគ្នានោះដែរលោកសុខ ឥសាន បានបញ្ជាក់ថា «នៅពេលថ្មីៗកន្លងមកនេះ លោកប្រធានាធិបតីស .រ. អា ដូណាល់ត្រាំបានជួបទទួលសារតាំងពីឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសហរដ្ឋអាមេរិក ។ ការយល់ព្រមទទួលសារតាំងពីឯកអគ្គរាជទូតកម្ពុជាដោយលោកប្រធានាធិបតីថាស.រ.អាមានន័យថា ស.រ.អាទទួលស្គាល់រាជរដ្ឋាភិបាលកម្ពុជានីតិកាលទី៦នេះ យ៉ាងពិតប្រាកដ»។
លោកបានបន្តថា បើស.រ.អា ទទួលស្គាល់រាជរដ្ឋាភិបាលកម្ពុជានីតិកាលទី៦នេះក៏មានន័យ ថា ស.រ.អាទទួលស្គាល់លទ្ធផលបោះឆ្នោតនាថ្ងៃទី២៩ ខែកក្កដា ឆ្នាំ២០១៨នេះដែរ ។ ហើយបើទទួលស្គាល់លទ្ធផលបោះឆ្នោតក៏មានន័យថា ស.រ.អាក៏ទទួលស្គាល់ដំណើរការបោះឆ្នោតថ្ងៃទី២៩ ខែកក្កដា ២០១៨នោះផងដែរ និងដោយស្វ័យប្រវត្តិ ។ ដូច្នេះមិនបាច់ឆ្ងល់ទេ ស.រ.អា ទទួលស្គាល់ការបោះឆ្នោតហើយ ។ ហេតុនេះការបោះឆ្នោតជ្រើសតាំងតំណាងរាស្ត្រនីតិកាលទី៦ គឺជាការបោះឆ្នោតពិតប្រាកដមិនមែនក្លែងក្លាយដូចពួកឧទ្ទាមក្រៅច្បាប់ និយាយនោះទេ ។ ឥឡូវនៅក្លែងក្លាយស្អីទៀត បើចៅហ្វាយនាយទទួលស្គាល់ហើយនោះ ។
សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីអតីតមេបក្សបក្សប្រឆាំងលោក សម រង្ស៊ី បានអះអាងសហគមន៍អ៊ឺរ៉ុបនឹងដាក់ទណ្ឌកម្ពុជាផ្នែកសេដ្ឋកិច្ចដល់រដ្ឋាភិបាលកម្ពុជាផងដែរ ៕
ចែករំលែកព័តមាននេះ