ទីក្រុងយ៉ាំងហ្គោន ៖ ប្រធានវិស្វករមកពីនាយកដ្ឋានថាមពលកកើតឡើងវិញ និងរោងចក្រថាមពលវារីអគ្គិសនី ដែលស្ថិតក្រោមក្រសួងអគ្គិសនី និងថាមពល បានមានប្រសាសន៍ថា ក្រសួងកំពុងតែព្រាងច្បាប់សម្រាប់គ្រប់គ្រងថាមពលកកើតឡើងវិញ ដើម្បីអភិវឌ្ឍន៍វិស័យនេះ ។
លោក Maung Maung Kyaw ប្រធានវិស្វកររូបនេះបានបន្ដថា ក្រសួងមានគោលដៅផលិត៨%នៃថាមពលអគ្គិសនីរបស់ប្រទេស តាមរយៈប្រភពថាមពលកកើតឡើងវិញនៅត្រឹមឆ្នាំ២០២១ ហើយនៅឆ្នាំ២០២៥ គោលដៅគិតទុករបស់ប្រទេសមីយ៉ាន់ម៉ា គឺត្រូវមាន១២%នៃថាមពលអគ្គិសនីក្នុងប្រទេស ត្រូវបានយកមកពីប្រភពថាមពលអាចកកើតឡើងវិញ ។
លោក Maung Maung Kyaw បន្ដថា ៖« យើងមានធនធានធម្មជាតិជាច្រើនដូចជាថាមពលព្រះអាទិត្យ និងខ្យល់ ។ អ្វីដែលខ្វះគឺច្បាប់គ្រប់គ្រងការផលិតថាមពលកកើតឡើងវិញ។ បើគ្មានច្បាប់ទេ វិនិយោគិនមិនត្រូវបានការពារ ទេ ហើយយើងមិនមានប្រព័ន្ធផ្តល់ការលើកទឹកចិត្តសម្រាប់ពួកគេនោះឡើយ »។
លោកបានបន្ថែមថា ៖« យើងយល់ពីស្ថានភាព ហើយនឹងព្យាយាមអនុម័តច្បាប់ ដើម្បីគ្រប់គ្រងថាមពលកកើតឡើងវិញ ក្នុងគោលបំណងពន្លឿនការអភិវឌ្ឍ »។
តាមប្រសាសន៍របស់លោកប្រធានវិស្វករខាងលើ រដ្ឋាភិបាលមីយ៉ាន់ម៉ានឹងផ្តល់អាទិភាពដល់ការអភិវឌ្ឍថាមពលពន្លឺព្រះអាទិត្យជាមុនសិន ទើបគិតគូរពីថាមពលខ្យល់ជាក្រោយបន្ទាប់ទៀត ។
នៅលើផ្នែកប្រភពថាមពលពន្លឺព្រះអាទិត្យ បច្ចុប្បន្នរដ្ឋកំពុងសាងសង់រោងចក្រមួយនៅមីនប៊ូ តំបន់ម៉ាវៀ ដែលនឹងមានលទ្ធភាពបង្កើតថាមពលអគ្គិសនី១៧០មេហ្កាវ៉ាត់ នៅពេលវាត្រូវបានបញ្ចប់ការសាងសង់នៅខែកុម្ភៈឆ្នាំក្រោយនេះ។ រោងចក្រននេះគឺជារោងចក្រថាមពលពន្លឺព្រះអាទិត្យលើកដំបូងនៅក្នុងប្រទេសមីយ៉ាន់ម៉ា ។
លោក Maung Maung Kyaw បាននិយាយថា រោងចក្រថាមពលព្រះអាទិត្យពីរផ្សេងទៀតត្រូវបានគេរំពឹងថា នឹងត្រូវបានសាងសង់ក្នុងពេលឆាប់ៗនេះ ។ រោងចក្រទាំងពីរនេះនឹងត្រូវបានសាងសង់នៅក្នុងទីក្រុង Myingyan និង Wundwin នៅក្នុងតំបន់Mandalay ហើយត្រូវបានគេរំពឹងថា នឹងមានសមត្ថភាពផលិតអគ្គិសនី១៥០មេហ្កាវ៉ាត់។
ទន្ទឹមនឹងនេះដែរ កិច្ចព្រមព្រៀងមួយត្រូវបានចុះហត្ថលេខាជាមួយសាជីវកម្ម Three Gorges របស់ប្រទេសចិន ដើម្បីអភិវឌ្ឍន៍ គម្រោងថាមពលខ្យល់៣០មេហ្កាវ៉ាត់នៅ Chaung Thar ក្នុងតំបន់ Ayeyarwaddy ។ វានឹងក្លាយជាគម្រោងផលិតថាមពលខ្យល់ដំបូងគេនៅមីយ៉ាន់ម៉ា ៕
ចែករំលែកព័តមាននេះ