ខេត្តបាត់ដំបង ៖ សេចក្ដីរាយការណ៍ពីកម្លាំងកងរាជអាវុធហត្ថបានឱ្យដឹងថា ស្ត្រីម្នាក់បានព្យាយាមលោតទឹកសម្លាប់ខ្លួន នៅវេលាម៉ោង០៧ និង១០នាទីព្រឹកថ្ងៃទី២៤ កញ្ញា នេះ នៅត្រង់ចំណុចលើស្ពានថ្មថ្មីស្ទឹងសង្កែ ក្នុងភូមិរតនៈ សង្កាត់រតនៈ ក្រុងបាត់ដំបង តែត្រូវបានកម្លាំងមូលដ្ឋានកងរាជអាវុធហត្ថក្រុងបាត់ដំបង និងប្រជាពលរដ្ឋជួយអន្តរាគមន៍សង្គ្រោះទាន់ពេល។
សេចក្តីរាយការណ៍បន្តថា ស្ត្រីដែលប៉ុនប៉ងលោតទឹកសម្លាប់ខ្លួននេះ ឈ្មោះគឹម ស្រីនូ ហៅណា អាយុ២០ឆ្នាំ មុខរបរម៉ាស្សា រស់នៅភូមិស្មាច់ ឃុំស្មាច់ ស្រុកអន្លង់វែង ខេត្តឧត្តរមានជ័យ ។ សមត្ថកិច្ចបានឱ្យដឹងទៀតថា ស្ត្រីរូបនេះ ត្រូវគេប្រទះឃើញដើរទៅលើស្ពាន ហើយបានព្យាយាមលោតទឹកស្ទឹងសង្កែ ទើបត្រូវកន្លងកងរាជអាវុធហត្ថក្រុង និងពលរដ្ឋជួយអន្តរាគមន៍ ដើម្បីសង្គ្រោះភ្លាមៗដែរ។
សមត្ថកិច្ចបានបញ្ជាក់ថា ពេលនេះ កម្លាំងបាននាំស្ត្រីរូបនេះ ទៅសាកសួរអំពីរឿងរ៉ាវហើយ តែគេមិនទាន់ដឹងអំពីមូលហេតុនៅឡើយទេ។ ប៉ុន្តែមតិមួយចំនួនបាននិយាយថា ស្ត្រីរូបនេះទំនងអាចមានវិបត្តិអ្វីមួយ ទើបសម្រេចចិត្តប៉ុនប៉ង ធ្វើអត្តឃាតបែបនេះ ។
ចែករំលែកព័តមាននេះ