រាជធានីភ្នំពេញ ៖ អ្នកវិភាគនយោបាយនៅក្រៅប្រទេសបានអះអាងថា ការហូរចូលនូវជនជាតិចិនមករស់នៅលើទឹកដីកម្ពុជានាប៉ុន្មានឆ្នាំចុងក្រោយនេះ បានបង្ហាញពីផលវិជ្ជមាន និងអវិជ្ជមានសម្រាប់ប្រជាជនកម្ពុជាផ្ទាល់ ។
ការលើកឡើងរបស់អ្នកវិភាគនយោបាយរូបនេះ ខណៈដែលកម្ពុជានឹងមានជនជាតិចិនមករស់នៅចំនួន៥ម៉ឺននាក់បន្ថែមទៀតនៅចុងឆ្នាំ២០១៨នេះ ដែលបច្ចុប្បន្នត្រូវបានដឹងថាមានជាង២១ម៉ឺននាក់កំពុងរស់នៅក្នុងប្រទេសកម្ពុជា។
លោក សុខ សុគន្ធ ហៅជេម សុខ អ្នកវិភាគនយោបាយគួរឱ្យកត់សម្គាល់ម្នាក់រស់នៅសហរដ្ឋអាមេរិក បានលើកឡើងលើបណ្តាញ សង្គមផ្លូវការរបស់លោកនៅថ្ងៃទី២២ ខែកញ្ញាថា «ខ្ញុំគិតថា ការហូរចូលនៃជនជាតិចិនអាចមានផលវិជ្ជមានផង និងអវិជ្ជមានផងចំពោះខ្មែរ» ។ លោកបានបង្ហាញពីផលវិជ្ជមានយ៉ាងដូច្នេះថា ផលវិជ្ជមានដល់ខ្មែរ គឺជនជាតិចិនអស់នោះនាំមកនូវគំនិតនិងរបៀបរបបកិរិយាថ្មី ធ្វើឲ្យខ្មែររហ័សរហួនជាងមុន ចេះហ៊ានស៊ីហ៊ានសង និងចេះតស៊ូប្រឈមមុខនឹងទុក្ខកង្វល់ថ្មីៗ ដែលចិនអស់នោះនាំមកដល់កម្ពុជា។ វាធ្វើឲ្យខ្មែរចេះ ប្រណាំងប្រជែងនឹងជនជាតិមួយខ្លាំងក្លា ។ បូកនឹងយួនផង លើកនេះខ្មែររកបានឱកាសប្រកួតឡូយមួយមិនខានដែលមិនដែលធ្លាប់បានកើតក្នុងកម្ពុជាសម័យទំនើប ។
ចំណែកផលអវិជ្ជមានវិញ លោកជេម សុខ បានលើកឡើងថា គឺចិនអស់នោះហ៊ានជាន់ក្បាលខ្មែរ ហ៊ានកាប់ក្បាលជើងអ្នកលេងខ្មែរ ហ៊ានលុកទីផ្សារការងារខ្មែរ ហ៊ានទាត់ធាក់ក្នុងបារនិងទីស៊ីផឹកនានា ហ៊ានបើក ឡានបុកខ្មែរ ដែលបណ្ដាលឲ្យប៉ូលិសខ្មែរនិងប្រជាជនខ្មែររវល់គ្មានបានដេកពួនឡើយ ។ លោកបញ្ជាក់ថា «ដូច្នេះខ្មែរដែលខ្ជិលត្រូវចិនយួនធាក់ជាន់ក្បាល។ ខ្មែរណាប្រឹងរៀនរកសន្សំ និងប្រណាំងយ៉ាងសប្បាយនឹងចិនយួន ។ ចំណុចវិជ្ជមាននិងអវិជ្ជមាននេះ ជាមេរៀនធំក្នុងជីវិតខ្មែរសម័យថ្មីនេះមិនខានឡើយ» ។
សូមជម្រាបថា កាលពីពេលថ្មីៗកន្លងមកនេះលោកនាយឧត្តមសេនីយ៍ សុខ ផល រដ្ឋលេខាធិការក្រសួងមហាផ្ទៃ បានលើកឡើងថា នៅចុងឆ្នាំ២០១៨នេះ ជនជាតិចិននឹងមកកម្ពុជាប្រមាណជាង៥ម៉ឺននាក់ ដើម្បីប្រកបអាជីវកម្មផ្សេងៗ ខណៈកម្ពុជាមានថៅកែចិនកំពុងសាង សង់អគារធំៗជាច្រើន ហើយគោលដៅសំខាន់ៗដែលចិនឆ្ពោះមកនោះ គឺនៅរាជធានីភ្នំពេញ ខេត្តព្រះសីហនុ និងខេត្តសៀមរាប ។
លោក សុខ ផល បានឲ្យដឹងថា កាលពីឆ្នាំ២០១៧ ចិននៅកម្ពុជាមានជាង១០ម៉ឺននាក់ ក៏ប៉ុន្ដែឆមាសទី២ ឆ្នាំ២០១៨ ចិនបានកើនឡើងដល់២១ម៉ឺននាក់ ហើយក្នុងចំណោម២១ម៉ឺននាក់នោះ ខេត្តព្រះសីហនុ មានជនជាតិចិនជាង៨ម៉ឺននាក់ ខណៈចិនមានប័ណ្ណការងារនៅខេត្តព្រះសីហនុ ជាង២ម៉ឺននាក់ ។
លោកនាយឧត្តមសេនីយ៍បញ្ជាក់ថា «ពីនេះទៅដល់ដាច់ឆ្នាំ២០១៨ គឺអ្នកធ្វើមុខរបរ៥ម៉ឺននាក់ទៀត នឹងមកដល់កម្ពុជា(ជនជាតិចិន) អុីចឹងត្រៀមខ្លួនឲ្យហើយទៅ ៥ម៉ឺននាក់ទៀត ចែកទៅកំពង់សោម(ព្រះសីហនុ)៥០ភាគរយ ។ គាត់មានផែនការច្បាស់លាស់ណាស់ ព្រោះសំណង់ឥឡូវកំពុងធ្វើច្រើន» ៕
ចែករំលែកព័តមាននេះ