ប្រទេសអ៊ីរ៉ង់ ៖ ប្រធានាធិបតីអ៊ីរ៉ង់លោកហាសាន់រ៉ូហានី បានសន្យាពីការឆ្លើយតបវិញយ៉ាងទារុណរបស់អ៊ីរ៉ង់ ក្រោយការវាយប្រហារភេរវកម្មមួយប្រឆាំងក្បួនព្យុហយាត្រាយោធាមួយនាភាគខាងត្បូងប្រទេស បណ្ដាលឲ្យមនុស្សស្លាប់យ៉ាងតិច២៩នាក់ ក្នុងនោះមានបណ្ដាជនស៊ីវិលកាលពីថ្ងៃទី២២កញ្ញា។
ការវាយប្រហារនោះត្រូវបានក្រុងតេហេរ៉ង់បរិហារថា ជាអំពើភេរវកម្ម ប្រព្រឹត្តនាព្រឹកថ្ងៃទី២២ កញ្ញា ដោយកងកុំម៉ង់ដូប្រដាប់អាវុធមួយ នៅទីក្រុង AHVAZ ទីប្រជុំជននៃខេត្តKHOUZESTAN ដែលប្រជាជនភាគច្រើនជាពួកអារ៉ាប់។ នោះជាការវាយប្រហារយ៉ាងបង្ហូរឈាមបំផុតដែលអ៊ីរ៉ង់ពុំធ្លាប់ជួបប្រទះ ចាប់តាំងពីជិត៨ឆ្នាំមកហើយ។
ការវាយប្រហារនោះប្រកាសទទួលខុសត្រូវដោយក្រុមរដ្ឋអ៊ិស្លាម ដែលថាជាការឆ្លើយតបចំពោះអន្តរាគមន៍របស់អ៊ីរ៉ង់ក្នុងតំបន់។ ការបាញ់ប្រហារមានរយៈពេលពី១០ទៅ១៥នាទី។ ហើយពួកអ្នកវាយប្រហារបន្លំស្លៀកពាក់ឯកសណ្ឋានជាសមាជិកកងឆ្មាំបដិវត្តន៍អ៊ីរ៉ង់ បានបាញ់ប្រហារលើមនុស្សម្នាពុំរើសមុខ។
មេដឹកនាំកំពូលអ៊ីរ៉ង់លោកអាយ៉ាតុលឡាអាលីខាមេនី បានចាត់ទុកការវាយប្រហារនេះថា ជាស្នាដៃ របស់មនុស្សនៃបណ្ដារដ្ឋាភិបាលតំបន់ជាអាយ៉ងរបស់សហរដ្ឋអាមេរិក ដែលខិតខំបង្កើតអសន្តិសុខក្នុងប្រទេសរបស់យើង។
ការវាយប្រហារកើតមានមុនការចេញដំណើររបស់លោករ៉ូហានីទៅកាន់ក្រុងញូវយ៉ក ចូលរួមក្នុងមហាសន្និបាតអង្គការសហប្រជាជាតិ ក៏បណ្ដាលឲ្យមនុស្ស៥៧នាក់ទៀតរងរបួសផងដែរ ក្នុងនោះច្រើននាក់ស្ថិតក្នុងសភាពធ្ងន់ធ្ងរ។ ហើយវាកើតមានខណៈភាពតានតឹងកើនឡើងខ្ពស់រវាងអ៊ីរ៉ង់ និងសហរដ្ឋអាមេរិក ដែលត្រៀមបង្កើននាដើមខែវិច្ឆិកា បណ្ដាទណ្ឌកម្មសេដ្ឋកិច្ចប្រឆាំងអ៊ីរ៉ង់។
រដ្ឋមន្ត្រីការបរទេសអ៊ីរ៉ង់ លោក MOHAMMAD JAVAD ZARIF បានចោទប្រកាន់ពួកភេរវករ ជ្រើសរើស និងហ្វឹកហ្វឺន ព្រមទាំងផ្ដល់លុយកាក់ ដោយរបបបរទេសមួយថា ជាអ្នកវាយប្រហារនៅក្រុង AHVAZ ហើយក៏បរិហារដែរ ចំពោះពួកអ្នកជួយជ្រោមជ្រែងតំបន់ដល់ភេរវកម្ម ព្រមទាំងចៅហ្វាយនាយអាមេរិក។ ចំណែកកងឆ្មាំបដិវត្តន៍អ៊ីរ៉ង់ បានចោទពួកអ្នកវាយប្រហារថា មានទំនាក់ទំនងជាមួយក្រុមបំបែកខ្លួននិយមមួយ ជួយទ្រទ្រង់ដោយអារ៉ា់ប៊ីសាអ៊ូឌីត។
ក្នុងចំណោមអ្នកស្លាប់មានកុមារីម្នាក់ និងអតីតយុទ្ធជនម្នាក់ ស្ថិតលើកៅអីរុញ។ អ្នកកាសេតម្នាក់ក៏ត្រូវស្លាប់ដែរ។ យោងតាមអ្នកនាំពាក្យយោធាអ៊ីរ៉ង់ថា ភេរវករ៣នាក់បានត្រូវបាញ់សម្លាប់នៅកន្លែងវាយប្រហារ រួចសមាជិកទី៤របស់កងកុំម៉ង់ដូរបួសធ្ងន់ស្លាប់នៅមន្ទីរពេទ្យ៕
ចែករំលែកព័តមាននេះ