រាជធានីភ្នំពេញ ៖ មន្ត្រីនគរបាលប៉ុស្តិ៍អូឡាំពិកម្នាក់ដែលមានរហ័សនាមថា «បាសាក់១៥E» បានសន្លប់បាត់ស្មារតីដេកស្តូកស្តឹងដោយឈាមកកក្នុងខួរក្បាល រងរបួសយ៉ាងធ្ងន់ធ្ងរ ខណៈពេលដែលរូបគាត់បានជិះម៉ូតូមួយគ្រឿងធ្វើការដើរល្បាតនៅពេលយប់តែម្នាក់ឯង ហើយត្រូវបានរថយន្តមិនស្គាល់ម៉ាកមួយគ្រឿងបើកមកបុកពីក្រោយទៀត បណ្តាលឲ្យដួលបោកក្បាលទៅលើថ្នល់ ហើយបើករត់គេចខ្លួនបាត់ស្រមោល។…
រាជធានីភ្នំពេញ ៖ មន្ត្រីនគរបាលប៉ុស្តិ៍អូឡាំពិកម្នាក់ដែលមានរហ័សនាមថា «បាសាក់១៥E» បានសន្លប់បាត់ស្មារតីដេកស្តូកស្តឹងដោយឈាមកកក្នុងខួរក្បាល រងរបួសយ៉ាងធ្ងន់ធ្ងរ ខណៈពេលដែលរូបគាត់បានជិះម៉ូតូមួយគ្រឿងធ្វើការដើរល្បាតនៅពេលយប់តែម្នាក់ឯង ហើយត្រូវបានរថយន្តមិនស្គាល់ម៉ាកមួយគ្រឿងបើកមកបុកពីក្រោយទៀត បណ្តាលឲ្យដួលបោកក្បាលទៅលើថ្នល់ ហើយបើករត់គេចខ្លួនបាត់ស្រមោល។
ករណីគ្រោះថ្នាក់ចរចរណ៍នេះដែរ បានកើតឡើងកាលពីវេលាម៉ោង១១និង៤៥នាទីយប់ថ្ងៃទី ២២ ខែកញ្ញា ឆ្នាំ២០១៨ នៅចំណុចផ្លូវបំបែកជា៥ ក្បែរផ្សារអូឡាំពិក(ភ្លើងស្តុបផ្សារអូឡាំពិក) ផ្លូវព្រះសីហនុ ក្នុងសង្កាត់អូឡាំពិក ខណ្ឌចំការមន ។
តាមប្រភពព័ត៌មានពីនគរបាលខណ្ឌចំការមនម្នាក់បានប្រាប់ឱ្យដឹងថា បុរសរងគ្រោះមានឈ្មោះ មាស សាឯមវីរី អាយុ៣០ឆ្នាំ មានទីលំនៅក្នុងសង្កាត់ព្រែកប្រា ខណ្ឌច្បារអំពៅ សព្វថ្ងៃជាមន្ត្រីនគរបាលបម្រើការងារនៅនគរបាលប៉ុស្តិ៍អូឡាំពិក និងមានរហ័សនាមហៅថា«បាសាក់ ១៥E» ។
មុនកើតហេតុមន្ត្រីនគរបាលរងគ្រោះបានជិះម៉ូតូម៉ាកស៊ីរុសមួយគ្រឿងជិះដើរល្បាតនៅក្នុងភូមិសាស្ត្ររបស់ខ្លួន ដើម្បីទប់ស្កាត់អំពើរចោរកម្ម និងបទល្មើសផ្សេងៗដូចសព្វមួយដងនោះ ។ តាមប្រភពដដែលបានប្រាប់ឱ្យដឹងទៀតថា ពេលដែលលោក «បាសាក់១៥E» បានជិះម៉ូតូធ្វើការល្បាតមកដល់ចំណុចខាងលើនោះក៏ស្រាប់តែមានរថយន្តមិនស្គាល់ម៉ាកមួយគ្រឿងបានបើកមកបុកម៉ូតូរបស់គាត់ចំពីក្រោយ បណ្តាលឲ្យដួលបោកក្បាលទៅលើថ្នល់សន្លប់បាត់ស្មារតីឈឹងតែម្នាក់ឯង ។
ក្រោយពេលកើតហេតុរថយន្តបង្កមួយគ្រឿងនោះក៏បានបន្ថែមល្បឿនបន្តដំណើររត់គេចខ្លួនទៅបាត់ស្រមោលតែម្តង ដោយបានបន្សល់ទុកតែជនរងគ្រោះនៅដេកសន្លប់នៅលើផ្លូវតែម្នាក់ឯងប៉ុណ្ណោះ និងបង្កឲ្យមានការភ្ញាក់ផ្អើលទៅដល់កម្លាំងនគរបាលក្នុងខណ្ឌចំការមនចុះមកដល់កន្លែងកើតហេតុ និងហៅរថយន្តសាមុយរបស់មន្ទីរពេទ្យមិត្តភាពខ្មែរសូវៀតឲ្យមកដឹកយកទៅធ្វើការសង្គ្រោះ ។ ក្រោយពេលកើតរហេតុក្រោយពីបញ្ជូនមន្ត្រីនគរបាលដែលមានរហ័សនាម«បាសាក់១៥E» រងគ្រោះទៅកាន់មន្ទីរពេទ្យមិត្តភាពខ្មែរសូវៀតរួចហើយត្រូវបានក្រុមគ្រូពេទ្យបញ្ជាក់ប្រាប់ថា «រូបគាត់បានរងរបូសត្រង់ក្បាលធ្ងន់ធ្ងរ ដោយឈាមកកក្នុងខួរក្បាល» រងរបួសធ្ងន់ធ្ងរ ។
លុះដល់ព្រឹកថ្ងៃទី២៣ ខែកញ្ញា ឆ្នាំ២០១៨នេះដែរ គេក៏បានឃើញមានវត្តមានរបស់លោក ព្រុំ សមខាន់ អភិបាលខណ្ឌចំការមន លោកវរៈសេនីយ៍ឯក យិន សាន្ត អធិការនគរបាលខណ្ឌចំការមន រួមទាំងមន្ត្រីក្រោមឱវាទជាច្រើននាក់ក៏បានចុះទៅសួរសុខទុក្ខ និងពាំនាំនូវថវិកាមួយចំនួនជូនទៅដល់មន្ត្រីនគរប៉ុស្តិ៍អូឡាំពិករងគ្រោះដល់មន្ទីរពេទ្យមិត្តភាពខ្មែរសូវៀតផងដែរ ។ តែរហូតមកទល់នឹងព្រឹកនេះដែរលោកបាសាក់១៥E ស្ថិតនៅក្នុងសភាពសន្លប់បាត់ស្មារតីដដែល និងនៅមិនទាន់ដឹងខ្លួននៅឡើយទេ និងមានអាការៈភ្ញាក់ៗម្តង ដោយសាររូបលោកបានរងការប៉ះទង្គិចត្រង់ក្បាលធ្ងន់ធ្ងរពេក ៕
ចែករំលែកព័តមាននេះ