ខេត្តព្រះសីហនុ ៖ តាមរបាយការណ៍សមត្ថកិច្ចស្រុកព្រៃនប់បានអោយដឹងថា មានករណីគ្រោះថ្នាក់ចរាចរណ៍មួយកើតឡើងរវាងរថយន្តធុនធំ១គ្រឿងបុកជាមួយម៉ូតូមួយគ្រឿង បណ្តាលឱ្យស្លាប់២នាក់នៅនឹងកន្លែង ស្ថិតលើផ្លូវជាតិលេខ៤ ចន្លោះគីឡូម៉ែត្រ ២០៥-២០៦ ត្រង់ចំណុច ស្ពានទឹកសាប ស្ថិតនៅក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ កាលពីវេលាម៉ោង៧និង១០នាទីព្រឹកថ្ងៃទី២៣ ខែកញ្ញា ឆ្នាំ២០១៨ ។
ជនរងគ្រោះដែលស្លាប់ទាំង២នាក់ខាងលើរួមមាន អ្នកបើកបរម៉ូតូដោយឈ្មោះ ស៊ុយ វណ្ណនេត ភេទប្រុស អាយុ២១ឆ្នាំ មានទីលំនៅភូមិត្នោត ឃុំស្រងែ ស្រុកទ្រាំង ខេត្តតាកែវ ចំណែកអ្នករួមដំណើរម្នាក់ មិនទាន់ស្គាល់អត្តសញ្ញាណ។
ប្រភពព័ត៌មានបានឱ្យដឹងថា មុនពេលកើតហេតុ រថយន្តធុនធំ១គ្រឿងម៉ាក DONGFENG ពណ៌ស ពាក់ស្លាកលេខ ភ្នំពេញ ៣E-០២២២ សណ្តោងរឺម៉កដឹកថ្ម អ្នកបើកបរមិនស្គាល់អត្តសញ្ញាណ បើកបរក្នុងទិសដៅពីភ្នំពេញឆ្ពោះមកខេត្តព្រះសីហនុ លុះមកដល់ចំណុចខាងលើក៏បានបុកពីក្រោយម៉ូតូមួយគ្រឿងជិះគ្នា២នាក់ម៉ាកហុងដា ធុនC125 ពណ៌ខ្មៅ ពាក់ស្លាកលេខ តាកែវ ១M-០៥4៤០ ដែលធ្វើដំណើរក្នុងទិសដៅស្របគ្នា បណ្ដាលឲ្យស្លាប់ទាំងអ្នកបើកបរម៉ូតូ និងអ្នករួមដំណើរនៅនឹងកន្លែងកើតហេតុ ។
ក្នុងករណីខាងលើនោះដែរ ជនរងគ្រោះឈ្មោះ ស៊ុយ វណ្ណនេត ដែលស្លាប់នៅនឹងកន្លែងកើតហេតុ រង់ចាំស្វែងរកក្រុមគ្រួសារមកទទួលយកទៅធ្វើបុណ្យតាមប្រពៃណី ចំណែកជនរងគ្រោះម្នាក់ដែលជាអ្នករួមដំណើរ មិនស្គាល់អត្តសញ្ញាណ បានស្លាប់នៅនឹងកន្លែងកើតហេតុដែរនោះ កំពុងស្វែងរកអត្តសញ្ញាណ ។
ចំណែកអ្នកបើកបររថយន្តបានរត់គេចខ្លួនបាត់ក្រោយពេលកើតហេតុ។ រីឯវត្ថុតាង រថយន្ត និងម៉ូតូត្រូវបានបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកព្រៃនប់ដើម្បីរង់ចាំការដោះស្រាយតាមនីតិវិធី ៕
ចែករំលែកព័តមាននេះ