ខេត្តមណ្ឌលគិរី ៖ បើតាមសេចក្តីរាយការណ៍ពីស្រុកកោះញែក បានឲ្យដឹងថា សកម្មជនការពារព្រៃឈើ៣នាក់ និងអ្នកយកព័ត៌មាន២នាក់ បានរងនូវការគំរាមកំហែងពីឧកញ៉ា សឹង្ហ សំអុល ក្រោយពេលពួកគេព្យាយាមផ្តិតយករូបភាពពីដែលសង្ស័យជាប់ពាក់ព័ន្ធនឹងបទល្មើសព្រៃឈើក្នុងក្រុមហ៊ុនម៉ាស្ទ័រខេសាន់ ស្របពេលដែលគេឃើញមានរថយន្តធុនធំចំនួន២០គ្រឿង បានផ្ទុកឈើពេញរួចជាស្រេចក្នុងដីក្រុមហ៊ុន។ ករណីនេះបានកើតឡើងនៅម៉ោង៩ព្រឹក ថ្ងៃទី២២ កញ្ញា ២០១៨ នៅភូមិសាស្ត្រឃុំ សុខសាន្ត ស្រុកកោះញែក ខេត្តមណ្ឌលគិរី ។
លោក ណាប់ ពិសី ចាងហ្វាងគេហទំព័រ ពន្លឺខ្មែរ បានប្រាប់កោះសន្តិភាពនៅថ្ងៃទី២៣ កញ្ញា ២០១៨ ថា «លោកបានចូលទៅតំបន់កើតហេតុតាំងពីយប់ថ្ងៃទី២១ រហូតដល់ព្រឹកថ្ងៃទី២២ ទើបជួបប្រទះបញ្ហា ដោយក្រុមរបស់លោកមានចំនួន៥នាក់ ៣នាក់ជាមន្ត្រីអង្គការខាងការពារព្រៃឈើ និង២នាក់ទៀត (រួមនឹងលោក ណាប់ ពិសី) ជាអ្នកយកព័ត៌មាន»។
លោកររៀបរាប់សាច់រឿងថា «លោកឧកញ៉ាសឹង្ហ សំអុល និងបក្ខពួកបានដឹកនាំសន្តិសុខប្រមាណជិត២០នាក់ ជិះរថយន្តចំនួន២គ្រឿង និងម៉ូតូចំនួន១២គ្រឿង មកស្ទាក់ឃាត់រថយន្តអ្នកឃ្លាំមើលបទល្មើសព្រៃឈើ និងអ្នកសារព័ត៌មានដែលកំពុងធ្វើសកម្មភាពផ្តិតយករូបភាពនៅចំណុចក្បែរខ្ទមអ្នកតាជ័យ ក្នុងភូមិសាស្ត្រក្រុមហ៊ុនមាស្ទ័រខេសាន់ ដែលមានទីតាំងក្នុងភូមិល្ហក ឃុំសុខសាន្ត ស្រុកកោះញែក ខេត្តមណ្ឌលគិរី» ។
លោក ណាប់ ពិសី បន្តថា «ខណៈនោះឧកញ៉ាសឹង្ហ សំអុល បានបញ្ជាកូនចៅខ្លួនឲ្យឆែកឆេររកកូនយន្តហោះ (ដ្រូន) ក្នុងរថយន្តដូចចោរប្លន់ ហើយចាប់បោកទៅលើដីធ្វើឲ្យខូចខាតប្រើការលែងកើត ព្រមទាំងប្រើពាក្យគំរាមកំហែងថា នឹងឲ្យស្នងការ និងអភិបាលខេត្តឃាត់ខ្លួនទៀតផង។ មិនត្រឹមតែប៉ុណ្ណោះឧកញ៉ាម្នាក់នេះនៅបានគំរាមដុតរថយន្តរបស់ក្រុមការងារអ្នកឃ្លាំមើលបទល្មើសព្រៃឈើចោលថែមទៀត ប៉ុន្តែទំនងឧកញ៉ា សឹង្ហ សំអុល បារម្ភក្រែងបញ្ហានេះ កាន់តែរីកធំក៏ស្រុះស្រួលប្រគល់កូនយន្តហោះមកវិញ ដើម្បីបញ្ចប់បញ្ហា»។
ក្នុងកិច្ចសម្ភាសន៍ដដែលនោះលោកចាងហ្វាងគេហទំព័រពន្លឺខ្មែរ និងក្រុមអ្នកឃ្លាំមើលបទល្មើសព្រៃឈើលើកឡើងថា «បើឧកញ៉ា សឹង្ហ សំអុល ពិតជារកស៊ីត្រឹមត្រូវមែននោះ ហេតុអ្វីបានជាដាក់កម្លាំងប្រដាប់អាវុធឲ្យយាមការពារតាមដងផ្ល្លូវច្រក-ចូល និងដាក់កម្លាំងសន្តិសុខច្រើនសន្ធឹកបែបនេះ»។ ម្យ៉ាងទៀតបើក្រុមហ៊ុនម៉ាស្ទ័រខេសាន់ មិនរកស៊ីឈើខុសច្បាប់ រឿងអីខ្លាចគេថតរូបយកទៅផ្សាយ ហើយមិនបង្ហាញឯកសារច្បាប់ឲ្យអ្នកព័ត៌មានបានដឹងផង»។
ជុំវិញវត្តមានរថយន្តធុនធំដឹកឈើក្នុងក្រុមហ៊ុនម៉ាស្ទ័រខេសាន់ នាយខណ្ឌរដ្ឋបាលព្រៃឈើមណ្ឌលគិរី លោក អុំ វណ្ណសុភៈ ប្រាប់អ្នកកាសែតយ៉ាងខ្លីថា «រាល់ការដឹកជញ្ជូនឈើរបស់ឧកញ៉ា សឹង្ហ សំអុល ត្រូវតែវាស់វែងសិន ទើបអាចលើកឡើងឡានបាន» តែកាលពីថ្ងៃទី២២ សីហា បែរជាឈើលើកឡើងឡានរួច២០គ្រឿង ដោយមិនមានការវាស់វែងទៅវិញ។
លោក សុង ឃាង ប្រធានមន្ទីរកសិកម្មខេត្តមណ្ឌលគិរីក៏បាននិយាយខ្លីថា «និយាយជារួមរាល់ការដឹកឈើទាំងនោះ សុទ្ធតែមានច្បាប់ ទើបគេហ៊ានធ្វើ»។
ទោះជាយ៉ាងណាគិតត្រឹមវេលាម៉ោង១រសៀល ថ្ងៃទី២៣ កញ្ញា ២០១៨ កោះសន្តិភាពមិនអាចសុំការបំភ្លឺពីឧកញ៉ា សឹង្ហ សំអុល ឬតំណាងក្រុមហ៊ុនរបស់លោកទេ។
ក្រោយមានការស្នើរសុំរបស់រដ្ឋមន្ត្រីក្រសួងបរិស្ថាន អនុញ្ញាតឲ្យមានការឈូសឆាយដីព្រៃ និងប្រមូលផលអនុផលព្រៃឈើឡើងវិញពីប្រមុខរាជរដ្ឋាភិបាលកម្ពុជា គេសង្កេតឃើញថា នៅខេត្តមណ្ឌលគិរី មានសកម្មភាពដឹកឈើតាមរយៈរថយន្តធុនយក្សរបស់ក្រុមឧកញ៉ាៗចេញទៅតំបន់ផ្សេងៗរាប់សិបគ្រឿង។ ដោយការដឹកជញ្ជូនឈើទាំងនោះ ត្រូវបានមហាជននិយាយថា មួយភាគធំអាចជាកន្ទេលធំបន្លំដេក ព្រោះរាល់សកម្មភាពរបស់ក្រុមឈ្មួញទាំងនោះ តែងលាក់កំបាំងច្បាប់អនុញ្ញាតដឹកជញ្ជូនជានិច្ច៕
ចែករំលែកព័តមាននេះ