ខេត្តកំពង់ធំ ៖ ក្មេងបួននាក់ចុះលេងទឹកត្រពាំង បណ្តាលឱ្យលង់ស្លាប់ម្នាក់ ហេតុការណ៍នេះ បានបង្កឲ្យមានការភ្ញាក់ផ្អើលមួយកើតឡើងកាលពីវេលាម៉ោង៣និង៣០នាទីរសៀល ថ្ងៃទី២២ ខែកញ្ញា ឆ្នាំ២០១៨ ស្ថិតនៅចំណុចត្រពាំងអណ្តាស់ ក្នុងភូមិទូកពីរ ឃុំគគីរធំ ស្រុកបារាយណ៍ ខេត្តកំពង់ធំ ។
លោកវរសេនីយ៍ទោ សន តាល់ អធិរងនគរបាលស្រុកបារាយណ៍ បានឲ្យដឹងថា ជនរងគ្រោះដែលស្លាប់ឈ្មោះ ហិន លីហួរ ភេទប្រុស អាយុ៦ឆ្នាំ មានឪពុកឈ្មោះពេជ្រ ហាប់ អាយុ៥១ឆ្នាំ តែបានលែងលះគ្នា និងចុះចោលប្រពន្ធឈ្មោះ ហូ មុំ អាយុ៤៧ឆ្នាំ អស់រយៈពេលជាយូឆ្នាំមកហើយ ដោយទុកឲ្យប្រពន្ធរស់នៅជាស្ត្រីមេម៉ាយមើលថែទាំកូនៗចំនួនបីនាក់សុទ្ធតែប្រុសទាំងអស់ ។ ចំណែកក្មេងប្រុសរងគ្រោះដែលបានលង់ទឹកស្លាប់នេះជាកូនទី៣ ។
លោកអធិការរងបន្តថា បើយោងតាមការឲ្យដឹងពីសាច់ញាតិនិយាយថា នៅមុនកើតហេតុ ស្ត្រីឈ្មោះហូ មុំត្រូវជាម្តាយរបស់ក្មេងប្រុសរងគ្រោះជាប់រវល់ទៅចំការ ក៏បានទុកកូនៗឲ្យនៅជាមួយជីដូន ហើយកូនៗរបស់គាត់ពីរនាក់បងប្អូន និងកូនអ្នកជិតខាងពីរនាក់ទៀតដែលមានអាយុប្រហាក់ប្រហែលគ្នា បាននាំគ្នាចុះទៅមុជទឹកត្រពាំងខាងលើលេង ខណៈនៅពេលកំពុងលេងទឹកយ៉ាងសប្បាយនោះ ស្រាប់តែពួកគេបាត់មិនឃើញកុមារារងគ្រោះ ។
ពេលនោះក្មេងម្នាក់ទៀតក៏បាននាំគ្នារត់មកហៅចាស់ៗឲ្យទៅជួយរក ហើយចាស់ៗក្នុងភូមិជាច្រើននាក់ក៏ផ្អើលឈូឆរនាំគ្នាចុះរាវរកក្នុងទឹកត្រពាំងដែលក្មេងៗលេង ក៏ប្រទះឃើញក្មេងប្រុសរងគ្រោះឈ្លក់ទឹកស្លាប់យ៉ាងអាណោចអាធ័មបាត់ទៅហើយ និងបានរាយការប្រាប់សមត្ថកិច្ច បន្ទាប់ពីទទួលបានព័ត៌មានភ្លាម សមត្ថកិច្ចប៉ុស្តិបានសហការគ្នាចុះទៅពិនិត្យ រកឃើញថា ក្មេងប្រុសរងគ្រោះពិតជាបានចុះលេងទឹកត្រពាំ ងបណ្តាលឲ្យលង់ស្លាប់ប្រាកដមែន ក៏ប្រគល់សពជូនសាច់ញាតិដើម្បីចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ