ខេត្តមណ្ឌលគិរី ៖ តាមសេចក្តីរាយការណ៍បានឲ្យដឹងថា កុមារាម្នាក់បានស្លាប់បាត់បង់ជីវិតយ៉ាងអាណោចអាធម៌ បន្សល់ទុក្ខក្តីសោកស្តាយយ៉ាងខ្លាំងដល់ឪពុកម្តាយ ដោយហេតុការនេះកើតឡើងនៅភូមិអូរអាម ឃុំស្រែខ្ទុម ស្រុកកែវសីមា កាលពីម៉ោងប្រមាណជា១រសៀល ថ្ងៃទី២២ កញ្ញា ២០១៨ ។
នគរបាលមូលដ្ឋានដែលបានចុះស្រាវជ្រាវរកមូលហេតុករណីស្លាប់កុមារខាងលើជាលទ្ធផលបានបង្ហាញថា ក្មេងប្រុសរងគ្រោះបានទៅលេងទឹកនៅស្រះចម្ងាយប្រហែល៥ម៉ែត្រពីផ្ទះ និងបានរអិលជើងធ្លាក់លង់ទឹកស្លាប់តែម្តង ខណៈឪពុកម្តាយរវល់មិនបានចាប់អារម្មណ៍មើលកូន ។
នគរបាលប៉ុស្តិ៍ស្រែខ្ទុមបានបញ្ជាក់ថា ក្មេងរងគ្រោះឈ្មោះ ខ្លិច សុវណ្ណារ៉ា អាយុ០៣ឆ្នាំ មានឪពុកឈ្មោះ ឈឿន ខ្លិល ម្តាយឈ្មោះ សេក ស៊ីណា ទាំងពីរនាក់ជាគ្រូបង្រៀនដូចគ្នា ។
ក្រោយនគរបាលស្រាវជ្រាវរួច ដោយមិនពាក់ព័ន្ធ និងអំពើឃាតកម្មទើបសមត្ថកិច្ចបន្តប្រគល់សពជូនសាច់ញាតិ ធ្វើបុណ្យតាមប្រពៃណី ៕
ចែករំលែកព័តមាននេះ