តាមប្រភពព័ត៌មាន Sky Sports បានឲ្យដឹងថា កីឡាករខ្សែការពាររបស់ក្លិបមេឃខៀវ Benjamin Mendy ត្រូវបានហាមឃាត់មិនឲ្យបើកបររថយន្តក្នុងរយៈពេល១ឆ្នាំ ក្រោយពីទទួលបានពិន្ទុពិន័យ២៤ពិន្ទុ នៅលើប័ណ្ណបើកបររបស់ខ្លួន ។
រថយន្ត Mercedes របស់កីឡាករជនជាតិបារាំងរូបនេះត្រូវបានប៉ូលីសឃើញបើកបរលើសល្បឿនកំណត់ ចំនួន៤ករណី ក្នុងរយៈពេលត្រឹមតែ២សប្តាហ៍ ។ តែគេមិនដឹងថា នរណាជាអ្នកបើកនោះទេ ។ នេះបើតាមការរាយការណ៍របស់ BBC ។
Mendy បានអះអាងថា រូបគេមិនបានបើកបរឡើយ ហើយត្រូវទទួលការពិន័យជាសាច់ប្រាក់២៥០០ផោន និងទទួលពិន្ទុពិន័យ២៤ពិន្ទុ (ខុសម្តង៦ពិន្ទុ) ។ តែគេមិនបានទៅស្តាប់ការកាត់ក្តីរបស់តុលាការឡើយ ។ ប្រធានចៅក្រមលោក Michael Blackhurst បានមានប្រសាសន៍ថា៖ «ពួកយើងត្រូវគិតគូរលើការធ្វើខុសច្បាប់ចរាចរណ៍ដល់ទៅ៤ដង ដែល២ដង ស្ថិតនៅក្នុងថ្ងៃតែមួយ ហើយមានភាពធ្ងន់ធ្ងរទៀត ។ ពួកគេមិនធ្វើដឹងលឺឡើយ ហើយពេលនេះសាមីខ្លួនមិនបានមកទៀត»។
មេធាវីការពារក្តីរបស់ Mendy លោក Gwyn Lewis បានប្រាប់ថា លោកក៏បានប្រាប់ឲ្យ Mendy មកជាមួយលោកដែរ ។
គួរបញ្ជាក់ផងដែរថា បទល្មើសលើកទីមួយកើតឡើងនៅថ្ងៃទី៩ ខែកុម្ភៈ និងលើកទីពីរ នៅថ្ងៃបន្ទាប់ ។ សម្រាប់លើកទីបី និងទីបួន គឺកើតក្នុងថ្ងៃទី២១ ខែកុម្ភៈ តែមួយ ៕
ចែករំលែកព័តមាននេះ