រាជធានីភ្នំពេញ ៖ នៅថ្ងៃទី២១ ខែកញ្ញា ឆ្នាំ២០១៨នេះ បានសម្រេចលើកលែងទោសដល់បុរសជនជាតិអូស្ត្រាលីម្នាក់អាយុ៦៨ឆ្នាំ ដែលត្រូវបានតុលាការផ្តន្ទាទោសពីបទចារកម្ម និងការប្រមូលផ្តុំព័ត៌មានជាអាទិ៍ដែលអាចធ្វើឲ្យប៉ះពាល់ការការពារជាតិដាក់ពន្ធនាគារ៦ឆ្នាំ ។
គួរបញ្ជាក់ថា លោកសេង លាង ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ នៅព្រឹកថ្ងៃទី៣១ ខែសីហា ឆ្នាំ២០១៨ បានសម្រេចប្រកាសសាលក្រមផ្តន្ទាទោសបុរសជនជាតិអូស្ត្រាលីបង្ហោះ Drone ស៊ើបការណ៍ព័ត៌មានពីកម្ពុជាបញ្ជូនទៅឲ្យបរទេសដាក់ពន្ធនាគារកំណត់រយៈពេល៦ឆ្នាំ ពីបទចារកម្មប្រមូលផ្តុំព័ត៌មានជាអាទិ៍ដែលអាចធ្វើឲ្យអន្តរាយការការពារជាតិយោងតាមមាត្រា៤៤៦ នៃក្រមព្រហ្មទណ្ឌនៃព្រះរាជាណាចក្រកម្ពុជា ។
ការសម្រេចផ្តន្ទាទោសខាងលើធ្វើឡើងបន្ទាប់ពីតុលាការបានបើកសវនាការជំនុំជម្រះ កាលពីថ្ងៃទី១៦.២០.២៣.២៤.២៧.២៨.នឹងថ្ងៃទី២៩ ខែសីហា ជាថ្ងៃបិទបញ្ចប់សវនាការលើសំណុំរឿងនេះ ។
បុរសជនជាតិអូស្ត្រាលីមានឈ្មោះ James Ricketson អាយុ៦៨ឆ្នាំ ត្រូវបានកម្លាំងសមត្ថកិច្ចការិយាល័យស៊ើបអង្កេត និងអនុវត្តនីតិវិធីផែនអន្តោប្រវេសន៍រាជធានីភ្នំពេញ ឃាត់ខ្លួនជនបរទេសម្នាក់នេះ នៅចំណុចម្តុំរូបសំណាក់ព្រះគម្លង់ ក្នុងទឹកដីខណ្ឌដូនពេញពាក់ពន្ធករណីបង្ហោះកាមេរ៉ាថត ផ្តិតយករូបភាពនានាពីលើអាកាស ដើម្បីទៅផ្សព្វផ្សាយនៅក្រៅប្រទេសដែលសាលារាជធានីភ្នំពេញមិនអនុញ្ញាត កាលពីរសៀលថ្ងៃទី០៣ ខែមិថុនា ឆ្នាំ២០១៧ កន្លងទៅ ។
បន្ទាប់ពីឃាត់ខ្លួនទើបដឹងថា ជនជាតិអូស្ត្រាលីម្នាក់នេះជាផលិតករភាពយន្តអូស្ត្រាលីម្នាក់ មានររឿងអាស្រូវជាច្រើនទៀត និងមានរឿងខ្លះត្រូវបានតុលាការប្រទេសកម្ពុជាផ្តន្ទាទោសរួចហើយដែរ ។ ក្នុងនោះដូចជា មានរឿងជួញដូរកុមារខ្មែរលក់ទៅក្រៅប្រទេស ដែលត្រូវផ្តន្ទាទោសពីរឆ្នាំ តែទោសនោះត្រូវព្យួរ និងមានសំណុំរឿងរដ្ឋប្បវេណីមួយទៀត ត្រូវតុលាការបានផ្តន្ទាទោសពិន័យជាប្រាក់ចូលថវិការដ្ឋចំនួន៥លានរៀល និងសងទៅដើមបណ្តឹង៦លាន រៀល តែសាលក្រមបានប្រកាសធ្វើឡើងកំបាំងមុខជនជាប់ចោទនៅក្នុងអំឡុងឆ្នាំ២០១៤ ដោយសារគេចខ្លួនទៅប្រទេសអូស្ត្រាលី ។
ប្រភពព័ត័មានត្រូវបានសមត្ថកិច្ចបង្ហើបឲ្យដឹងទៀតថា ជនសង្ស័យរូបនេះបានលួចចូលមកកម្ពុជាវិញក្នុងឆ្នាំ២០១៥ ដោយការស្នាក់នៅមិនពិតប្រាកដ ។ លុះថ្ងៃទី០៣ មិថុនា ត្រូវបានកម្លាំងជំនាញការិយាល័យស៊ើបអង្កេត និងអនុវត្តនិតិវិធីស្នងការនគរបាលរាជធានីភ្នំពេញ បានឃើញជនបរទេសរូបនេះដើរបង្ហោះកាមេរ៉ាដ្រូនថតរូបពីលើអាកាសផ្តិតយកពីសកម្មភាពថ្ងៃត្រៀមបោះឆ្នោតក្រុមប្រឹក្សាឃុំ-សង្កាត់ ដែលសាលារាជធានីភ្នំពេញហាមឃាត់ ៕
ចែករំលែកព័តមាននេះ