ខេត្តកំពត ៖ នៅក្នុងសាលមហោស្រពខេត្តកំពតនារសៀលថ្ងៃទី២២ ខែកញ្ញា ឆ្នាំ២០១៨ មានធ្វើពិធីបិទសន្និបាតការងារបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ របស់គណៈកម្មាធិការជាតិរៀបចំបោះឆ្នោតដែលហៅកាត់ (គជប)។ ក្រោមអធិបតីភាព…
ខេត្តកំពត ៖ នៅក្នុងសាលមហោស្រពខេត្តកំពតនារសៀលថ្ងៃទី២២ ខែកញ្ញា ឆ្នាំ២០១៨ មានធ្វើពិធីបិទសន្និបាតការងារបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ របស់គណៈកម្មាធិការជាតិរៀបចំបោះឆ្នោតដែលហៅកាត់ (គជប)។
ក្រោមអធិបតីភាព សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម ស៊ិក ប៊ុនហុក ប្រធានគណកម្មាធិការជាតិរៀបចំការបោះឆ្នោត និងលោកជាវ តាយ អភិបាលនៃគណៈអភិបាលខេត្តកំពត និងលោក លោកស្រី ជាសមាជិកគណៈកម្មាធិការជាតិរៀបចំការបោះឆ្នោត លោក លោកស្រីតំណាងលេខាធិការដ្ឋាននៃគណៈបញ្ជាការសន្តិសុខអចិន្ត្រៃយ៍ ព្រមទាំងសមាជិក សមាជិកា នៃគណៈកម្មការមកពីគ្រប់បណ្តាខេត្តចំនួន២៥ ខេត្ត-ក្រុង ទូទាំងប្រទេស ។
អង្គសន្និបាតបូកសរុបការងារបោះឆ្នោតរបស់គណកម្មាធិការជាតិរៀបចំការបោះឆ្នោតនៅក្នុងខេត្តកំពត ដែលត្រូវបានបញ្ចប់នារសៀលនេះ គឺបន្ទាប់ចាប់ផ្តើមដំណើរការបើកតាមរបៀបវីរៈរបស់ខ្លួន តាំងពីព្រឹកថ្ងៃទី២១ ខែកញ្ញា ឆ្នាំ២០១៨ ដែលអស់រយៈពេល២ថ្ងៃកន្លងមកនេះ ។ អង្គសន្និបាតបានរៀបចំជាក្រុមពិភាក្សាចំនួន៥ក្រុម ដើម្បីធ្វើការពិភាក្សាប្តូរយោបល់តាមក្រុមនីមួយៗ ដកស្រង់បទពិសោធន៍តាមបណ្តាក្រុម ដើម្បីអនុវត្តឲ្យកាន់តែល្អថែមទៀត ការងារបោះឆ្នោតនៅអាណត្តិក្រោយៗទៀត ។
ថ្លែងក្នុងពីបិទសន្និបាតនាឱកាសនោះសម្តេចក្រឡាហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថា ការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨នេះ ជាការបោះឆ្នោតដែលរៀបចំឡើងស្របតាមរដ្ឋធម្មនុញនៃព្រះរាជាណាចក្រកម្ពុជា និងជាការបោះឆ្នោតស្របតាមគោលការណ៍លទ្ធិប្រជាធិបតេយ្យ សេរីពហុបក្ស ។
សម្តេចក្រឡាហោម ស ខេង បានបន្ថែមទៀតថា តាមស្មារតីរដ្ឋធម្មនុញនៃព្រះរាជាណាចក្រកម្ពុជាត្រង់មាត្រាទី១ បានកំណត់នូវការគ្រប់គ្រងប្រទេសតាមរបបរាជានិយមអាស្រ័យរដ្ឋធម្មនុញ និងរបបប្រជាធិបតេយ្យ សេរីពហុបក្សរបប គ្រប់គ្រងនេះគ្មានជនណាម្នាក់អាចកែប្រែ និងផ្លាស់ប្តូរបានឡើយ ។
ទន្ទឹមនេះតាមស្មារតីនៃមាត្រា៧៨ នៃរដ្ឋធម្មនុញបានកំណត់អំពីនីតិកាលរបស់រដ្ឋសភាមានរយៈពេល៥ឆ្នាំ ហើយរដ្ឋសភាមិនអាចត្រូវរលាយមុនផុតអាណតិ្តបានឡើយ ។ ការរំលាយរដ្ឋសភាមុនផុតអាណតិ្តអាចធ្វើទៅបានតែក្នុងករណីដែលរដ្ឋាភិបាលត្រូវបានរំលាយពីរលើកក្នុងរយៈពេល១២ខែតែប៉ុណ្ណោះ ។ នេះជាករណីដែលតម្រូវឱ្យមានការរៀបចំបោះឆ្នោតមុនផុតនីតិកាលរដ្ឋសភា ។
ចំពោះការបន្តនីតិកាលរបស់រដ្ឋសភាអាចធ្វើទៅបានតែក្នុងពេលប្រទេសជាតិមានសង្គ្រាម ឬកាលៈទេសៈ ពិសេសដទៃទៀតដែលមិនអាចបោះឆ្នោតបាន ហើយការបន្តនីតិកាលរបស់រដ្ឋសភានេះ ត្រូវធ្វើឡើងបានមួយដងមួយឆ្នាំតាមសំណើររបស់ព្រះមហាក្សត្រ និងត្រូវសម្រេចដោយមតិយល់ព្រមពីរភាគបីយ៉ាងតិច ។
ថ្លែងក្នុងពិធីបិទសន្និបាតនាពេលនេះ លោក ស៊ិក ប៊ុនហុក ប្រធានគណកម្មាធិការជាតិរៀបចំការបោះឆ្នោតបានគូសបញ្ជាក់ថា ការរៀបចំសន្និបាតនាពេលនេះ គឺដើម្បីបូកសរុប និងវាយតម្លៃលើលទ្ធផលការងារបោះឆ្នោតជ្រើសតាំងតំណាងរាស្ត្រនីតិកាលទី៦ ដែលបានប្រព្រឹត្តទៅកាល ពីថ្ងៃទី២៩ ខែកក្កដា ឆ្នាំ២០១៨ កន្លងមកនេះ និងស្វែងយល់ពីបញ្ហាប្រឈមចំណុចខ្លាំងចំណុចខ្សោយ ព្រមទាំងដំណោះស្រាយ ដើម្បីបទពិសោធន៍យកទៅធ្វើការកែលំអការបោះឆ្នោតលើកក្រោយៗទៀត ឱ្យទទួលបានលទ្ធផលកាន់តែជោគជ័យបន្ថែមទៀត ។
លោក បានបញ្ជាក់ទៀតថា ដោយផ្អែកលើបទពិសោធន៍ និងបានអនុវត្តនៃការផ្សព្វផ្សាយលទ្ធផលបោះឆ្នោតបឋមសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ គឺក្នុងគោលដៅបង្កើនជំនឿទុកចិត្តពីភាគីពាក់ព័ន្ធនឹងការបោះឆ្នោតមកលើគណៈកម្មាធិការរៀបចំបោះឆ្នោតគ្រប់លំដាប់ថ្នាក់ និងផ្តល់លទ្ធផលបោះឆ្នោតបឋមបានឆាប់រហ័សត្រឹមត្រូវទូលំទូលាយ និងតម្លាភាពដល់ភាគីពាក់ព័ន្ធទាំងអស់ព្រមទាំងដើម្បីធ្វើជាព័ត៌មានអំពីលទ្ធផលនៃការបោះឆ្នោត មុនដំណើរការបូកសរុបលទ្ធផលបោះឆ្នោតបណ្តោះអាសន្ន និងលទ្ធផលបោះឆ្នោតជាផ្លូវការ ៕
ចែករំលែកព័តមាននេះ