បើនិយាយពីបញ្ហាជីវិតវិញ សត្វលោកទាំងអស់បានជួបប្រទះសព្វរស់ជាតិនៃជីវិតទាំងសុខ ទាំងទុក្ខលំបាកគ្រប់យ៉ាង តែទោះជាយ៉ាងណាទុក្ខច្រើនជាងសុខគ្មានអ្នកណាមួយកន្លងបានឡើយ ។
អ្នកខ្លះដេកលក់ស្រួល ដឹងខ្លួនក្រោកឡើងវិញក៏សុខស្រួល ឯអ្នកខ្លះដេកលក់មិនស្ងប់ ចិត្តចេះតែងរវើរវាយក្នុងរឿងហេតុផ្សេងៗ ហើយពេលបើកភ្នែកក៏ជួបទុក្ខលំបាកសព្វបែបយ៉ាង ព្រោះហេតុនោះបានជាលោកពោលថា ជីវិតយើងនេះប្រជុំទៅដោយបញ្ហា ប្រជុំទៅដោយទុក្ខលំបាកគ្មានទីបំផុត ។
ដើម្បីបន្ធូរការលំបាកខ្លះបុគ្គលគួររៀនអប់រំចិត្តតាមផ្លូវធម៌ជារឿងសំខាន់ ព្រោះព្រះធម៌ធ្វើឱ្យមនុស្សលែងមានចិត្តលោភលន់ លែងច្រណែនឈ្នានីស លែងហ៊ានបៀតបៀនគ្នា ហើយទុក្ខលំបាកផ្សេងៗទៀតក៏រសាយនាំជីវិតទៅរកសេចក្តីស្ងប់សុខបានច្រើន ។
ប៉ុន្តែបើចិត្តមិនបានអប់រំតាមផ្លូវធម៌ទេ ជីវិតមិនអាចទ្រាំទ្រនឹងបញ្ហាដែលកើតឡើងរាល់ថ្ងៃបានឡើយ ព្រោះជីវិតប្រជុំទៅដោយបញ្ហា ។ តាមធម្មតាជីវិតយើងទាំងអស់គ្នាហ្នឹង តែងតែពើបប្រទះនូវរឿងរ៉ាវជាប់មកជាមួយរាល់ថ្ងៃ បន្តិចបញ្ហានេះ បន្តិចរឿងនោះចូលមកមិនចេះចប់ដូចស្រមោលអន្ទោលតាមប្រាណ បើយើងមិនមានបញ្ញាសម្រាប់ដោះស្រាយបញ្ហាទេ នឹងជួបការលំបាកតានតឹងក្នុងចិត្តជានិច្ច ។
ចែករំលែកព័តមាននេះ