រាជធានីភ្នំពេញ ៖ រថយន្តកូរ៉ូឡាមួយគ្រឿងបើកបរដោយបុរសម្នាក់ក្នុងស្ថានភាពស្រវឹង ទើបតែត្រឡប់មកពីចូលរួមកម្មវិធីវិញ មិនទាន់ដល់ផ្ទះផង រថយន្តរេចង្កូតជ្រុលទៅបុករបាំងថ្មពុះចែកទ្រូងផ្លូវបណ្តាលឲ្យខ្ទាតខុសទម្រង់ដើមមួយកង់ ចំណែករថយន្តដាច់កាឡេ ផ្ទុះពោង បណ្តាលឱ្យអ្នកបើកបររងរបួសបែកក្បាល កាលពីវេលាម៉ោង១០យប់ ថ្ងៃទី២២ ខែកញ្ញា ឆ្នាំ២០១៨ ស្ថិតនៅតាមបណ្តោយផ្លូវសហព័ន្ធរុស្សី ភូមិក្បាលរំរី២ សង្កាត់កាកាប២ ខណ្ឌពោធិសែនជ័យ ។
រថយន្តខាងលើម៉ាកកូរ៉ូឡា ពណ៌ស្ករ ពាក់ស្លាកលេខ ភ្នំពេញ ២M-០៦៦០ បើកបរដោយឈ្មោះ ឯល សំណាង ភេទប្រុស អាយុ៣២ឆ្នាំ មុខរបរ ជាមេការសំណង់ស្នាក់នៅក្នុងបុរីសែនមនោរម្យ ភូមិកន្ទោកជើង សង្កាត់កន្ទោក ខណ្ឌពោធិសែនជ័យ ។
តាមប្រជាពលរដ្ឋជាអ្នកឃើញហេតុការណ៍បានឲ្យដឹងថា មុនកើតហេតុ រថយន្តខាងលើបើកបរក្នុងល្បឿនលឿនតាមបណ្តោយផ្លូវសហព័ន្ធរុស្សីក្នុងទិសដៅពីកើតទៅលិច ខណៈដែលមេឃកំពុងរលឹម លុះដល់ចំណុចកើតហេតុ បានរេចង្កូតបុកទ្រូងផ្លូវតែម្តង ដាខ់កាឡេ ទៅមុខលែងរួច បណ្តាលឱ្យអ្នកបើកបររងរបួសបែកក្បាល ចំណែករបាំងថ្មពុះចែកទ្រូងផ្លូវវៀចមួយកង់ ។
តាមសម្តីអ្នកបើកបររថយន្តវិញ បានឲ្យដឹងថា គាត់ទើបតែត្រឡប់មកពីចូលរួមកម្មវិធី នៅម្តុំផ្សារទួលទំពូង ក្នុងគោលបំណង់ឆ្ពោះទៅផ្ទះ លុះបើកបរមកដល់ចំណុចខាងលើ ងងឹតមុខ និងវិលមុខ ទើបរេចង្កូតបុកទ្រូងផ្លូវតែម្តង ។
ក្រោយកើតហេតុ ជនរងគ្រោះត្រូវបាន សមត្ថកិច្ចឲ្យទៅមន្ទីរពេទ្យដើម្បីព្យាបាលរបួស ចំណែករថយន្តត្រូវបានសមត្ថកិច្ចអូសយកទៅរក្សាទុក រង់ចាំដោះស្រាយផលប៉ះពាល់នៅពេលក្រោយ ៕
ចែករំលែកព័តមាននេះ