រាជធានីភ្នំពេញ ៖ បើតាមព័ត៌មានបឋមបានឱ្យដឹងថា មុននេះមានករណីខ្មាន់កាំភ្លើងបាញ់ប្រហារបុរសម្នាក់ចំនួន៤គ្រាប់ បណ្តាលឱ្យស្លាប់ភ្លាមៗនៅកន្លែងកើតហេតុ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោងប្រហែល៥និង០៥នាទីព្រឹកព្រលឹម ថ្ងៃទី២៣ ខែកញ្ញា ឆ្នាំ២០១៨ នៅចំណុចតូបលេខ៦អា ស្ថិតក្នុងភូមិ២ សង្កាត់ផ្សារដើមគ ខណ្ឌទួលគោក ។ នេះបើយោងតាមគេហទំព័ររបស់អគ្គស្នងការនគរបាលជាតិ ។
បើតាមរបាយការណ៍របស់នគរបាលឱ្យដឹងថា ជនរងគ្រោះឈ្មោះ ធី ធូ ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅចល័តក្នុងផ្សារនាគមាស សង្កាត់ផ្សារដើមគ ខណ្ឌទួលគោក ត្រូវជនសង្ស័យបាញ់ចំក្បាលផ្នែកខាងក្រោយ១គ្រាប់ ចំណែកជនសង្ស័យរត់គេចខ្លួនបាត់។
សមត្ថកិច្ចខាងលើបន្តថា មុនពេលកើតហេតុនៅម៉ោង៤ល្ងាចថ្ងៃទី២២ ជនរងគ្រោះបានប្រើប្រាស់គ្រឿងញៀនរហូតបែកខ្លាំងក៏រត់ចូលផ្ទះគេកាន់កាំបិតអុកឡុកតែម្តង ប៉ុន្តែត្រូវសមត្ថកិច្ចនគរបាលប៉ុស្តិ៍ផ្សារដើមគសហការជាមួយសង្កាត់ធ្វើការឃាត់ខ្លួនយកទៅដាក់មណ្ឌល ។ លុះថ្ងៃទី២៣ កញ្ញា ជនរងគ្រោះក៏ត្រូវជនសង្ស័យម្នាក់មិនស្គាល់អត្តសញ្ញាណបាញ់៤គ្រាប់ បណ្តាលឱ្យស្លាប់ភ្លាមៗនៅនឹងកន្លែងកើតហេតុបង្កឱ្យមានការភ្ញាក់ផ្អើលតែម្តង។
បច្ចុប្បន្ននេះ កម្លាំងជំនាញកំពុងស្វែងរកតាមចាប់ខ្លួនជនល្មើស ដើម្បីយកមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ