ខេត្តព្រះសីហនុ ៖ មនុស្សស្លាប់០២នាក់ និងរបួសធ្ងន់-ស្រាល០៥នាក់ នៅក្នុងហេតុការណ៍ បុកបន្តកន្ទុយគ្នា ហើយផ្លូវបំបែកស្ថានីយរថភ្លើងក្នុងភូមិ០៣ សង្កាត់លេខ០៣ ក្រុង-ខេត្តព្រះសីហនុ ។
នៅក្នុងហេតុការណ៍គ្រោះថ្នាក់ចរាចរណ៍ដ៏រន្ធត់ បណ្តាលឲ្យបុរស និងស្ត្រីម្នាក់ស្លាប់នៅក្នុងកន្លែងកើតហេតុ និងមនុស្សក្មេង-ចាស់ចំនួន០៥នាក់ ផ្សេងទៀតរងរបួសស្រាល-ធ្ងន់ ។ ក្រោយកើតហេតុបានរថយន្តគ្លីនិកឯកជនដឹកយកទៅព្យាបាល ។
សមត្ថកិច្ចនគរបាលការិយាល័យចរាចរផ្លូវគោកនៃស្នងការរដ្ឋាននគរបាលខេត្តព្រះសីហនុ បានឲ្យដឹងថា ហេតុការណ៍ខាងលើបានកើតឡើងនៅវេលាម៉ោង១០និង០០នាទីព្រឹក ថ្ងៃទី២២ ខែកញ្ញ ឆ្នាំ២០១៨ នៅចំណុចខាងមុខស្ថានីយប្រេង ផ្លូវបំបែកស្ថានីយរថភ្លើង ស្ថិតក្នុងភូមិ០៣ សង្កាត់លេខ០៣ ក្រុង-ខេត្តព្រះសីហនុ ។
ប្រភពខាងលើបានបន្តថា ហេតុការណ៍គ្រោះថ្នាក់ចរាចរណ៍ខាងលើបង្កឡើងដោយរថយន្តបែនដឹកដីមួយគ្រឿង ពណ៌ស មិនមានស្លាកលេខ បើកបរចុះមកពីចំណោតលោកយាយម៉ៅក្នងល្បឿនលឿន ដោយសារតែមានបញ្ហាហ្វ្រាំងមិនជាប់ក៏ទៅបុករថយន្តដែលកំពុងធ្វើដំណើរខាងមុខ រួចក៏បុករះបន្តកន្ទុយគ្នា និងមានរថយន្តតាក់ស៊ីដែលកំពុងតែចតរង់ចាំដឹកអ្នកធ្វើដំណើរ បណ្តាលឲ្យរងការខូចខាតរថយន្តជាច្រើនគ្រឿង១- រថយន្តម៉ាកសឺដេស ពណ៌ខ្មៅ ពាក់ស្លាកលេខភ្នំពេញ 2.L.0858 ជារថយន្តរបស់លោក អ៊ុក កាលីន ប្រធានច្រកកំពង់ផែសេដ្ឋកិច្ចទំនប់រលកនៃសាលាខេត្តព្រះសីហនុ ។ ២- រថយន្តតូរីស១២កៅអី ពណ៌សលាយប្រផេះ ពាក់ស្លាកលេខភ្នំពេញ3D-4876 ។ ៣- រថយន្តម៉ាកហាយឡិនឌ័រ ពណ៌ទឹកប្រាក់ ពាក់ស្លាកលេខភ្នំពេញ 2C- 9963 ។ ៤- រថយន្តម៉ាកហ៊ីយ៉ាន់ ដាយពណ៌ស មិនមានស្លាកលេខ ។ ៥- រថយន្តកូរ៉េ ពណ៌ស ពាក់ស្លាកលេខ ព្រះសីហនុ 2A-9386 ។ និងខូចខាតម៉ូតូចំនួន០២គ្រឿងទៀត ។ មួយគ្រឿងម៉ាកវេវ អាល់ហ្វា ជាម៉ូតូជនរងគ្រោះ ដែលស្លាប់បាត់បង់ជីវិត បានរងការខូចខាតទាំងស្រុង ។
០២- ម៉ូតូម៉ាកហុងដាសេ១២៥ សេរី២០១៧ ពណ៌ខ្មៅបុកដាច់ស្លាកលេខបាត់ ។
បច្ចុប្បន្នសពជនរងគ្រោះដែលស្លាប់បាត់បង់ជីវិតនៅមិនទាន់ស្គាល់អត្តសញ្ញាណនៅឡើយហើយត្រូវបានសមត្ថកិច្ចនគរបាលដឹកយកទៅតម្កល់ទុកនៅវត្តក្រោមហៅវត្ត(ឥន្ទញ្ញាណ) រង់ចាំសាច់ញាតិយកទៅធ្វើបុណ្យទៅតាមប្រពៃណី ។
នៅពេលវេលាខាងលើក៏មានករណីគ្រោះថ្នាក់ចរាចរណ៍បង្កឡើង ដោយរថយន្តបុកម៉ូតូនៅ ក្នុងភូមិ០៤ សង្កាត់លេខ០៤ បណ្តាលឲ្យអ្នកបើកបរម៉ូតូស្លាប់ភ្លាមៗនៅកន្លែងកើតហេតុ ។ សពនៅមិនទាន់ស្គាល់អត្តសញ្ញាណនៅឡើយ ហើយត្រូវបានសមត្ថកិច្ចនគរបាលដឹកយកមករក្សាទុកជាមួយសពកើតហេតុខាងលើនេះដែរ ។
ដោយឡែករថយន្តបង្ក និងម៉ូតូជនរងគ្រោះត្រូវបានដឹកយកមករក្សាទុកនៅការិយាល័យនគរបាលចរាចរណ៍ខាងលើរង់ចាំដោះស្រាយនៅពេលក្រោយ ៕
ចែករំលែកព័តមាននេះ