ខេត្តសៀមរាប ៖ រថយន្តយីឌុបដឹកស្រូវបង្កប់ឈើពេញមួយគ្រឿងបានដឹកចេញពីខេត្តឧត្តរមានជ័យតាមបណ្តោយផ្លូវលេខ៦៤ កាត់ស្រុកស្វាយលើ រួចហួសចូលមកតាមស្រុកសូត្រនិគម ដើម្បីឆ្ពោះទៅកាន់ខេត្តតាកែវត្រូវបានកម្លាំងនគរបាលចម្រុះ នៃអធិការដ្ឋាននគរបាលស្រុកសូទ្រនិគម ដឹកនាំដោយលោកវរសេនីយ៏ឯក ណុប សារ៉ាក់ អធិការនគរបាលស្រុកសូនិគម បានធ្វើការបង្ក្រាបបានភ្លាមៗ ទាំងរថយន្ត និងមនុស្សចំនួន៣នាក់ក្នុងនោះមានម្ចាស់ឈើម្នាក់ផងដែរ ។
ក្នុងប្រតិបត្តិការស្ទាក់ចាប់រថយន្តដឹកឈើខុសច្បាប់នោះបានធ្វើឡើងនៅវេលាម៉ោង១០និង០៧នាទីព្រឹក ថ្ងៃទី២២ ខែកញ្ញា ឆ្នាំ២០១៨ ស្ថិតនៅចំណុចផ្លូវជាតិលេខ៦៤ ពីស្វាយលើទៅផ្លូវជាតិលេខ៦ ក្នុងភូមិអូរលុះ ឃុំដំដែក ស្រុកសូទ្រនិគម ខេត្តសៀមរាប ។
លោកវរសេនីយ៏ឯក ណុប សារ៉ាក់ អធិការស្រុកសូទ្រនិគមបានប្រាប់ឱ្យដឹងថា ក្រោយពីទទួលបានព័ត៌មានថា មានរថយន្ដយីឌុបដឹកស្រូវបង្កប់ឈើខុសច្បាប់១គ្រឿងកំពុងរត់ឆ្លងកាត់ក្នុងភូមិសាស្ត្រស្រុកសូទ្រនិគម ខណៈពេលនោះលោកបានបញ្ជាកម្លាំងឱ្យចុះបង្ក្រាបរថយន្តដឹកឈើខុសច្បាប់នោះបាន១គ្រឿង នៅចំណុចភូមិអូរលុះ ឃុំដំដែក ស្រុកសូទ្រនិគម ខេត្តសៀមរាប បន្ទាប់ពីបង្ក្រាបបានកម្លាំងជំនាញរបស់អធិការស្រុកក៏បានយកមករក្សាទុកនៅអធិការដ្ឋាន ហើយរាយការណ៍ជូនលោកស្នងការរងនគរបាលខេត្តទទួលផែនការងារប្រឆាំងបទល្មើសសុំកម្លាំងជំនាញការិយាល័យប្រឆាំងបទល្មើសសេដ្ឋកិច្ចខេត្ត ចូលរួមសហការត្រួតពិនិត្យ ។
លោកអធិការបានបន្តទៀតថា ជាលទ្ធផលគឺកម្លាំងសមត្ថកិច្ចបានពិនិត្យឃើញប្រភេទឈើផ្ចឹកចំនួនបឋម២០ម៉ែត្រគូប រថយន្ត១គ្រឿង ពណ៌សទ្រុងខៀវ ពាក់ផ្លាកលេខ តាកែវ 3A-1718០ ចំណុះ២៥តោន និងមនុស្សចំនួន៣នាក់ក្នុងនោះម្ចាស់ឈើម្នាក់ផងដែរ រួចធ្វើការប្រគល់ឱ្យមន្ត្រីជំនាញរដ្ឋបាលព្រៃឈើស្រុកសូទ្រនិគមដើម្បីអនុវត្តទៅតាមនីតិវិធីដោយអនុលោមទៅតាមច្បាប់ ស្តីពីព្រៃឈើ ។
លោកបានបញ្ជាក់ថា ម្ចាស់ឈើឈ្មោះ ស សៀក ភេទប្រុស អាយុ៣៨ឆ្នាំ បច្ចុប្បន្នរស់នៅភូមិគ្រាំងតូច ឃុំប្រាំបីមុំ ស្រុកបាទី ខេត្តតាកែវ ។ ចំណែកកម្មករ២នាក់ទៀតមិនបានយកឈ្មោះនោះទេ ព្រោះថ្នាក់លើយកតែម្ចាស់ឈើទៅតុលាការប៉ុណ្ណោះ ៕
ចែករំលែកព័តមាននេះ