ខេត្តព្រះសីហនុ ៖ នៅក្នុងហេតុការណ៍គ្រោះថ្នាក់ចរាចរដ៏រន្ធត់បណ្តាលឲ្យបុរស និងស្ត្រីម្នាក់ស្លាប់នៅហ្នឹងកន្លែងកើតហេតុ និងមនុស្សក្មេងចាស់ចំនួន៥នាក់ផ្សេងទៀតរងរបួសស្រាលធ្ងន់ ។ ហេតុការណ៍ខាងលើបានកើតឡើងនៅវេលាម៉ោង១០និង០០នាទីព្រឹក ថ្ងៃទី២២ ខែកញ្ញា ឆ្នាំ២០១៨ នៅចំណុចខាងមុខស្ថានីយប្រេងស៊ូគីមុិច ផ្លូវបំបែកស្ថានីយរថភ្លើង ស្ថិតក្នុងភូមិ០៣ សង្កាត់លេខ០៣ ក្រុង-ខេត្តព្រះសីហនុ ។
ប្រភពខាងលើបានបន្តថា ហេតុការណ៍គ្រោះថ្នាក់ចរាចរខាងលើបង្កឡើងដោយរថយន្តបែនដឹកដីមួយគ្រឿង ពណ៌ស មិនមានផ្លាកលេខ បើកបរចុះមកពីចំណោតលោកយាយម៉ៅក្នងល្បឿនលឿនដោយសារតែមានបញ្ហាហ្វ្រាំងមិនជាប់ក៏ទៅបុករថយន្តដែលកំពុងធ្វើដំណើរខាងមុខរួចក៏បុករះបន្តកន្ទុយគ្នា និងមានរថយន្តតាក់សុីដែលកំពុងតែចតរង់ចាំដឹកអ្នកធ្វើដំណើរបណ្តាលឲ្យរងការខូចខាតរថយន្តជាបន្តបន្ទាប់ ។
បច្ចុប្បន្នសពជនរងគ្រោះដែលស្លាប់បាត់បង់ជីវិតនៅមិនទាន់ស្គាល់អត្តសញ្ញាណនៅឡើយហើយត្រូវបានសមត្ថកិច្ចនគរបាលដឹកយកទៅតម្កល់ទុកនៅវត្តក្រោម ហៅវត្តឥន្ទញ្ញាណ រង់ចាំសាច់ញាតិយកទៅធ្វើបុណ្យទៅតាមប្រពៃណី ។
ដោយឡែកវត្ថុតាងរថយន្តបង្ក និងរថយន្តរងគ្រោះត្រូវបានសមត្ថកិច្ចនគរបាលការិយាល័យចរាចរផ្លូវគោកនៃស្នងការដ្ឋានខេត្តព្រះសីហនុស្ទូចយកទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ