ខេត្តត្បូងឃ្មុំ ៖ ថ្នាំញៀនក្រាមពណ៌សចំនួន១៤កញ្ចប់ក្នុងនោះធំ៣កញ្ចប់ ថង់វេចខ្ចប់ ម៉ូតូ១គ្រឿងរួមនឹងជនសង្ស័យចំនួន២នាក់នៅភូមិជំនីក ឃុំជំនីកស្រុកក្រូចឆ្មារ ដោយជាប់ចោទបទរក្សាទុក និងចែកចាយសារធាតុញៀនដោយខុសច្បាប់ នៅព្រឹកថ្ងៃទី២២ ខែកញ្ញា ឆ្នាំ២០១៨ ត្រូវបានបញ្ជូនទៅឲ្យអយ្យការអមសាលាដំបូងខេត្តចាត់វិធានការតាមច្បាប់ ។
លោកអនុសេនីយ៏ឯក អាត សានូ អធិការរងនគរបាលស្រុកក្រូចឆ្មារទទួលផែនគ្រឿងញៀនប្រាប់ឲ្យដឹងថា កម្លាំងសង្ងាត់បានផ្តល់ព័ត៌មានមកថា នៅផ្ទះរបស់ឈ្មោះ ម៉ាអាត ស៊ីយៈ ភេទស្រី អាយុ២៤ ឆ្នាំខ្មែរអ៊ិស្លាម នៅភូមិខាងលើបានលក់ និងចែកចាយគ្រឿងញៀនដោយខុសច្បាប់បន្ទាប់ពីទទួលបាននូវព័ត៌មាននេះភ្លាម រូបលោកបានសុំគោលការណ៏ពីលោកអធិការនគរបាលស្រុក និងលោកឧត្តមសេនីយ៏ទោ បែន រ័ត្ន ស្នងការនគរបាលខេត្តដើម្បីរៀបចំកម្លាំងដើម្បីចេញប្រិតិបត្តិការបង្ក្រាប ។
លោកអធិការនគរបាលស្រុកក្រូចឆ្មារទទួលផែនគ្រឿងញៀនប្រាប់បន្តថា នៅវេលាម៉ោង៤រសៀលថ្ងៃទី២០ ខែកញ្ញា ឆ្នាំ២០១៨ បានស្ទាក់ចាប់ឃាត់ជនសង្ស័យម្នាក់ឈ្មោះ វូអាត អ៊ីសា ភេទប្រុស អាយុ១៩ឆ្នាំ តាមរយៈវិធានការញុះញង់ ដោយឆែកឃើញមានថ្នាំញៀន១កញ្ចប់ លុះពេលដែលសួរនាំបានឆ្លើយសារភាពថា ថ្នាំញៀននេះបានទិញនៅផ្ទះរបស់ឈ្មោះ ស៊ីយៈ ។
ជាមួយនោះក៏បានសុំគោលការណ៏ពីលោក ហៀង សុភក្ត្រ ព្រះរាជអាជ្ញាអមសាលាដំបូងខេត្តដើម្បីឆែកឆេរផ្ទះមានការអនុញ្ញាតដោយមានកម្លាំងនគរបាលស្រុកនគរបាលមូលដ្ឋានអាជ្ញាធរដែនដីបានឆែកឆេរលំនៅឋាន ។ ក្នុងពេលដែលចុះទៅប្រតិបត្តិការនោះបុរសជាប្តី គ្រាន់តែឃើញសមត្ថកិច្ចពីចំងាយបានរត់គេចខ្លួនបាត់ដោយចាប់បានតែស្ត្រីជាប្រពន្ធឈ្មោះ ស៊ីយៈ ដោយបានរឹបអូសបានថ្នាំញៀនចំនួន១៣កញ្ចប់ ក្នុងនោះមានធំ៣កញ្ចប់ ដបសម្រាប់សេពគ្រឿងញៀន ទូរស័ព្ទដៃ២គ្រឿង ។
លោកអនុសេនីយ៏ឯក អាត សានូ អធិការងនគរបាលស្រុកក្រូចឆ្មារបញ្ជាក់ថា ក្រោយពីបានសួរនាំរួចរាល់នៅព្រឹកថ្ងៃទី២២ កញ្ញា ជនសង្ស័យទាំង២នាក់ត្រូវបានបញ្ជូនទៅឲ្យលោកអយ្យការអមសាលាដំបូងខេត្តចាត់ការតាមច្បាប់ និងស្រាវជ្រាវតាមចាប់បក្សពួកមួយចំនួនទៀត មកផ្តន្ទាទោសតាមច្បាប់ ៕
ចែករំលែកព័តមាននេះ