រាជធានីភ្នំពេញ ៖ សេចក្តីរាយការណ៍បឋមឲ្យដឹងថា ជនជាតិឡាវម្នាក់ ខ្មែរម្នាក់ ត្រូវបានកម្លាំងសមត្ថកិច្ចនគរបាលការិយាល័យទី៩ នៃមន្ទីរប្រឆាំងគ្រឿងញៀនក្រសួងមហាផ្ទៃចាប់ខ្លួន កាលពីយប់ថ្ងៃទី២០ កញ្ញា ស្ថិតនៅចំណុចលើផ្លូវលេខ៧០ សង្កាត់ទួលសង្កែ ខណ្ឌប្ញស្សីកែវ ខណៈពួកគេបាននិងកំពុងដឹកជញ្ជូនគ្រឿងញៀនជាង២គីឡូក្រាម ឆ្លងកាត់តាមបណ្តាខេត្ត ដើម្បីចូលមកជួញដូរក្នុងរាជធានីភ្នំពេញ ។
សេចក្តីរាយការណ៍បន្តថា ជនសង្ស័យម្នាក់ឈ្មោះ ឡោ សុគន្ធា ភេទប្រុស អាយុ៤០ឆ្នាំ ជនជាតិខ្មែរ មានទីលំនៅភូមិសំអាង ឃុំ សំអាង ស្រុក ថាឡាបរិវ៉ាត់ ខេត្តស្ទឹងត្រែង និងម្នាក់ឈ្មោះ សុីងធីន អ៊ូថង ភេទប្រុសអាយុ២៨ឆ្នាំ ជនជាតិឡាវ មានទីលំនៅវៀងច័ន្ទ ប្រទេសឡាវ ។
ប្រភពបន្តថា ការឆ្មក់ចាប់ក្រុមជួញដូរគ្រឿងញៀន មកពីប្រទេសឡាវនេះ ដឹកនាំដោយលោកវរសេនី
ឯក យិន បញ្ញារិទ្ធ នាយការិយាល័យទី៩ នៃមន្ទីរប្រឆាំងគ្រឿងញៀន ។ ជាមួយ និងការចាប់ឃាត់ខ្លួនជនសង្ស័យ២នាក់ខាងលើនេះ សមត្ថកិច្ចដកហូតថ្នាំញៀនប្រមាណជាង២គីឡូក្រាម និងទូរស័ព្ទចំនួន២គ្រឿង ។ ជនសង្ស័យត្រូវបានសមត្តកិច្ចកំពុងសាកសួរ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមផ្លូវច្បាប់ ៕
ចែករំលែកព័តមាននេះ