រាជធានីភ្នំពេញ ៖ បុរសម្នាក់បានឃាត់ខ្លួនប្រពន្ធរបស់ខ្លួន ជាមួយនឹងបុរសម្នាក់ផ្សេងទៀត នាំទៅប្រគល់ឱ្យនគរបាលប៉ុស្តិ៍ចោមចៅ១ជួយចាត់ការតាមច្បាប់ ដោយចោទប្រកាន់ប្រពន្ធថា បានលេងឆាតហ្វេសប៊ុកចុះឡើងៗជាមួយបុរសម្នាក់នោះ រហូតបង្កាត់ភ្លើងស្នេហ៍ជាមួយគ្នាយ៉ាងឆេះសន្ធោសន្ធៅ និងបានណាត់ជួបគ្នារួមរ័កមេត្រីយ៉ាងត្រេកត្រអាលជាមួយគ្នាជាញឹកញាប់ទៀត ។ ទីបំផុត ប្រពន្ធរបស់គាត់ បានចុះចេញពីផ្ទះចោលរូបគាត់ និងកូនប្រុសស្រី២នាក់ ទៅរស់នៅលួចលាក់ជាសហាយស្មន់ជាមួយបុរសខាងលើនោះ អស់រយៈពេលជាង១០ថ្ងៃមកហើយ ។
ចំណែករូបគាត់ រួមនឹងឪពុកក្មេក(ឪពុកបង្កើតប្រពន្ធ) បានតាមរកគ្រប់កន្លែង ក៏ស្រាប់តែប្រទះឃើញអ្នកទាំង២នាក់ កំពុងជិះម៉ូតូឌុបគ្នាតាមផ្លូវ ទើបឃាត់ខ្លួនប្រគល់ជូននគរបាល និងទាមទារជំងឺចិត្តចំនួន៤ពាន់ដុល្លារ ហើយផ្តាច់និស្ស័យស្នេហ៍ ដោយប្រគល់ប្រពន្ធទៅឲ្យប្រុសសហាយនោះតែម្ដង ។ ប៉ុន្តែដោយសារតែការដោះស្រាយមិនត្រូវរ៉ូវគ្នា ទើបនគរបាលប៉ុស្តិ៍ចោមចៅ១ ខណ្ឌពោធិ៍សែនជ័យ បញ្ជូនអ្នកទាំង២នាក់នេះទៅកាន់ប៉ុស្តិ៍ពងទឹក ខណ្ឌដង្កោ ចាត់ការបន្តវិញ ។
ហេតុការណ៍នេះ បានកើតឡើងកាលពីវេលាម៉ោង៣និង៣០នាទីរសៀលថ្ងៃទី២០ ខែកញ្ញា នៅតាមផ្លូវ
ស្ថិតក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ ។ បុរសជាប្ដីបានសុំមិនឲ្យបញ្ចេញឈ្មោះ ។ ចំណែកស្ត្រីជាប្រពន្ធឈ្មោះ នី ស៊ីណេត អាយុ៣១ឆ្នាំ ជាកម្មការិនីរោងចក្រកាត់ដេរ ស្នាក់នៅក្នុងភូមិវត្តស្លែង សង្កាត់ពងទឹក ខណ្ឌដង្កោ បានលួចលាក់ស្នេហាជាមួយបុរសឈ្មោះ យឹម ចាន់វណ្ណៈ អាយុ៣២ឆ្នាំ ស្នាក់នៅក្នុងបុរីសន្ដិភាព២ ភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ ។
បុរសជាប្ដីបានរៀបរាប់ប្រាប់ឲ្យនគរបាលថា រូបគាត់និងប្រពន្ធបានរៀបការជាមួយគ្នាតាមប្រពៃណីរយៈពេល១៣ឆ្នាំមកហើយ ដោយក្រាបសំពះផ្ទឹមក្បាលដល់កន្ទេល ក្រោមការចូលរួមដឹងឮនិងអបអរសាទរពីសំណាក់មេបាញាតិមិត្ត និងភ្ញៀវកិត្តិយសទាំងសងខាង ។ មិនតែប៉ុណ្ណោះ មានការដឹងឮពីអាជ្ញាធរមូលដ្ឋាន ហើយក៏បានចុះសំបុត្រអាពាហ៍ពិពាហ៍ត្រឹមត្រូវតាមច្បាប់ថែមទៀតផង ។ ចំណែកការរួមរស់ជាមួយគ្នាជាប្ដីប្រពន្ធរយៈពេល១៣ឆ្នាំកន្លងមកនេះ ទទួលបានចំណងដៃកូនប្រុសម្នាក់ បច្ចុប្បន្នអាយុ៨ឆ្នាំ និងកូនស្រីម្នាក់បច្ចុប្បន្នអាយុ១២ឆ្នាំ ។
ប្រភពដដែលបន្តទៀតថា កាលពីគ្រាមុន ប្រពន្ធស្រឡាញ់គាត់ខ្លាំងណាស់ មិនដែលមានការថ្នាំងថ្នាក់គ្នាអ្វីធំដុំឡើយ ហើយគាត់ក៏មិននឹកស្មានថា នាងផិតក្បត់រូបគាត់បែបនេះសោះ ។ ម្យ៉ាងទៀតគាត់មិនបានដឹងថា ប្រពន្ធលួចលាក់ស្នេហាជាមួយបុរសឈ្មោះ យឹម ចាន់វណ្ណៈ នោះតាំងពីពេលណាមកទេ គឺទើបតែដឹងរយៈពេលជាង១ខែចុងក្រោយនេះប៉ុណ្ណោះ ។
ការបែកធ្លាយពីទំនាក់ទំនងស្នេហារវាងប្រពន្ធ់គាត់និងបុរសឈ្មោះ យឹម ចាន់វណ្ណៈ នោះគឺតាមរយៈការលេងឆាតហ្វេសប៊ុកសាសងគ្នារបស់អ្នកទាំង២នាក់នោះ ។ ម្យ៉ាងទៀត គាត់ក៏ធ្លាប់បានសួរនាំប្រពន្ធរឿងលេងឆាតនោះដែរ ហើយនាងប្រាប់ថាគ្រាន់តែលេងធម្មតាប៉ុណ្ណោះ ទើបគាត់មិនរវីរវល់ ។ លុះក្រោយមក ស្រាប់តែប្រពន្ធលួចចុះចោលគាត់ និងកូនប្រុសស្រីទៅរស់នៅជាមួយប្រុសសហាយខាងលើ បាត់រយៈពេលជាង១០ថ្ងៃមកហើយ ។
បន្ទាប់ពីបាត់ប្រពន្ធ រូបគាត់និងឪពុកក្មេក (ឪពុកបង្កើតរបស់ប្រពន្ធ) បានតាមរកគ្រប់ទីកន្លែង និងបានដាក់ពាក្យប្ដឹងនៅប៉ុស្តិ៍នគរបាលពងទឹកថែមទៀតផង ។ រហូតមកដល់រសៀលថ្ងៃទី២០ កញ្ញា ស្រាប់តែឃើញប្រពន្ធកំពុងជិះម៉ូតូជាមួយប្រុសសហាយ ក៏ឃាត់ខ្លួនទាំង២នាក់ នាំទៅប្រគល់ជូននគរបាលប៉ុស្តិ៍ចោមចៅ១តែម្ដង ។ មន្ត្រីនគរបាលឲ្យដឹងថា ក្រោយពេលឃាត់ខ្លួន បុរសជាប្ដីបានប្រគល់ប្រពន្ធទៅឲ្យប្រុសសហាយ ហើយគាត់ទាមទារជំងឺចិត្តពីប្រពន្ធចំនួន៤ពាន់ដុល្លារ ។ ខណៈនោះ ក៏មានការចរចាគ្នាយូរដែរ ប៉ុន្តែមិនត្រូវរ៉ូវគ្នា ទើបនគរបាលប៉ុស្ដិ៍ចោមចៅ១ ខណ្ឌពោធិ៍សែនជ័យ បញ្ជូនអ្នកទាំង២ទៅកាន់ប៉ុស្តិ៍ពងទឹក ខណ្ឌដង្កោ ដើម្បីដោះស្រាយបន្តវិញ ។
ប្រភពខាងលើបន្តថា បន្ទាប់មកនគរបាលប៉ុស្តិ៍ពងទឹក បាននាំអ្នកទាំង២ទៅកាន់សាលាសង្កាត់ពងទឹក និងដោះស្រាយគ្នានៅទីនោះ ហើយបុរសជាប្ដីបានសម្រេចចិត្តដាច់ខាតលែងយកប្រពន្ធនេះទៀតហើយ ។ គាត់បានសម្រេចលែងលះប្រពន្ធនេះ និងទាមទារសំណងជំងឺចិត្តពីប្រពន្ធមកនៅត្រឹមចំនួន៣ពាន់ដុល្លារវិញ និងយកកូនទាំង២នាក់ គឺកូនប្រុសអាយុ៨ឆ្នាំនិងកូនស្រីអាយុ១២ឆ្នាំទៅចិញ្ចឹម ។
ជាមួយនេះ បានប្រគល់ប្រពន្ធទៅឲ្យបុរសឈ្មោះ យឹម ចាន់វណ្ណៈ ដោយឲ្យនាងចុះចេញទៅតែខ្លួនទទេប៉ុណ្ណោះ ។ ដោយសារតែស្មោះស្ម័គ្រជាមួយប្រុសស្នេហ៍ថ្មី នាងជាប្រពន្ធបានសុខចិត្តបង់លុយ៣ពាន់ដុល្លារទៅឲ្យប្ដីដើម ផ្ដាច់និស្ស័យជាង១៣ឆ្នាំ ដោយចុះចេញតែខ្លួនទទេ ទៅនៅជាមួយប្រុសសហាយជាការបញ្ចប់រឿង ៕
ចែករំលែកព័តមាននេះ