ខេត្តកំពង់ស្ពឺ ៖ មួយរយៈកាលនេះ បន្ទាប់ពីមានការផ្សាយអំពីល្បែងកន្ទុយលេខរីកដុះដាល និងបើកលេងយ៉ាងរំភើយនៅក្រុងច្បារមន និងផ្សារត្រពាំក្រឡឹងនោះ ធ្វើឱ្យសមត្ថកិច្ចក្តៅស្លឹកត្រចៀក បានចុះបង្ក្រាបជាបន្តបន្ទាប់ដើម្បីចាត់ការតាមនីតិវិធី។ ការបង្ក្រាបល្បែងមួយនេះ មតិខ្លះគាំទ្រចំពោះការខិតខំរបស់សមត្ថកិច្ច ឯអ្នកខ្លះទៀតថា ចាប់បានតែអ្នកអត់ខ្សែ ចំណែកអ្នកមានខ្សែដូចប្រពន្ធលោកប៉េអឹមគ្មានឃើញបង្ក្រាបសោះ ។
ការបង្ក្រាបល្បែងស៊ីសង (កន្ទុយលេខ) ធ្វើឡើងវេលាម៉ោង៣រសៀល កាលពីថ្ងៃទ២០ ខែកញ្ញា ឆ្នាំ២០១៨ ស្ថិតនៅផ្ទះរបស់ឈ្មោះហុក ស្រេង (ផ្ទះជួល) ក្នុងភូមិត្រពាំងក្រឡឹង ឃុំគីរីវ័ន្ត ស្រុកភ្នំស្រួច ខេត្តកំពង់ស្ពឺ ។
ហើយក្នុងកិច្ចប្រតិបត្តិការខាងលើ សមត្ថកិច្ចបានធ្វើកាឃាត់ខ្លួន មនុស្ស០២ នាក់ស្រី ១-ឈ្មោះឈុន រុន ភេទស្រី អាយុ៤២ឆ្នាំ (ប្រពន្ធរបស់ឈ្មោះហុក ស្រេង) នៅភូមិត្រពាំងក្រឡឹង ឃុំគីរីវ័ន្ត ស្រុកភ្នំស្រួច ខេត្តកំពង់ស្ពឺ។ និង២.ឈ្មោះហុក សៀងលីម ភេទស្រី អាយុ២១ឆ្នាំ (កូន)នៅភូមិត្រពាំងក្រឡឹង ឃុំគីរីវ័ន្ត ស្រុកភ្នំស្រួច ខេត្តកំពង់ស្ពឺ។
នគរបាលស្រុកភ្នំស្រួចបានឱ្យដឹងថា ការបង្ក្រាបល្បែងស៊ីសងកន្ទុយលេខនេះធ្វើឡើងដោយកម្លាំងការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋានគរបាលខេត្ត។ ហើយការបង្ក្រាបនេះផងដែរ សមត្ថកិច្ចដកហូតវត្ថុតាងរួមមាន ក្រដាសកត់កន្ទុយលេខមួយចំនួនធំ, សៀវភៅកត់លេខ០៣ក្បាល, ក្រដាសរាម មួយដុំ, ទូរស័ព្ទដៃ០២ គ្រឿង (សាំស៊ុង០១គ្រឿង និងអាយហ្វូន០១គ្រឿង) ព្រមទាំងម៉ាស៊ីនគិតលេខ០១គ្រឿង។ អត់ឃើញចាប់បានប្រាក់ទេ… ហេ! ហេ!
ហើយក្នុងពេលចាប់នេះផងដែរ អ្នកឈរមើលមួយចំនួនបាននាំគ្នានិយាយដាក់សមត្ថកិច្ចនគរបាលព្រហ្មទណ្ឌកំរិតស្រាលថា ចាប់បានតែអ្នកតូចតាចអត់ខ្សែអត់ខ្នង ចំណែកមេឆ្នោតធំៗមិនដែលឃើញអស់លោកបង្ក្រាបបានម្តងណាសោះ។ បើទោះជាយ៉ាងនេះក្តី ក៏សមត្ថកិច្ចនៅតែបំពេញតួនាទីភារកិច្ចរបស់ខ្លួន ហើយបន្តចងក្រងឯកសារបញ្ជីទៅសាលាដំបូងខេត្តចាត់ការបន្តតាមនីតិវិធី។
ចែករំលែកព័តមាននេះ