រាជធានីភ្នំពេញ ៖ ស្របពេលវិស័យទេសចរណ៍កំពុងដើរតួនាទីសំខាន់ក្នុងការជំរុញកំណើនសេដ្ឋកិច្ចជាតិ ដោយផ្ដល់ប្រាក់ចំណូលប្រមាណជាង៣ពាន់លានដុល្លារអាមេរិកក្នុងមួយឆ្នាំចាក់បញ្ចូលក្នុងសេដ្ឋកិច្ចជាតិនោះ អ្នកពាក់ព័ន្ធក្នុងវិស័យទេសចរណ៍ ក៏បានត្រៀមទទួលទេសចរថ្មីៗជាច្រើនបន្ថែមទៀត ដែលនឹងមកដល់កម្ពុជានៅពេលខាងមុខ ក្នុងនោះវិស័យម្ហូបអាហារ និងសេវាកម្ម គឺជាកត្តាស្លាប់រស់មួយក្នុងការទាក់ទាញភ្ញៀវទេសចរ ។
លោក ប៉ាក់ សុខុម រដ្ឋលេខាធិការក្រសួងទេសចរណ៍ បានថ្លែងនៅក្នុងពិព័រណ៍ម្ហូបអាហារនិងសណ្ឋាគារ កាលពីពេលថ្មីៗនេះថា វិស័យទេសចរណ៍ អាចរីកចម្រើនហើយទទួលបានភ្ញៀវទេសចរអន្តរជាតិបន្ថែម ដោយសារវិស័យម្ហូបអាហារ និងសេវាកម្ម គឺជាកត្តាសំខាន់មួយ ។ លោកសង្កត់ធ្ងន់ថា ៖« គ្មានភ្ញៀវទេសចរ ណាមួយទៅលេងប្រទេសណាហើយ មិនទទួលទានម្ហូបប្រទេសគេនោះទេ គឺត្រូវតែទទួលទាន ហើយបើ សិនជាម្ហូបយើងល្អ សេវាកម្មយើងរហ័ស គេពេញចិត្ត គេនឹងមកម្ដងទៀត ។ ទន្ទឹមនឹងនេះ គេក៏នឹងផ្សព្វផ្សាយម្ហូប និងសេវាកម្មយើងទៅដល់មិត្តភក្តិបងប្អូននៅប្រទេសរបស់គេ ហើយគេក៏អាចនាំគ្នាមកសាកល្បងម្ដងទៀតបានដែរ ។ ផ្ទុយទៅវិញ បើសិនជាយើងមានតែកន្លែងទេសចរណ៍ស្អាតៗល្បីៗតែសេវាកម្មយើងអន់ ម្ហូបយើងមិនមានអនាម័យ ពេលគេហូបទៅ ធ្វើឲ្យមានបញ្ហាដល់សុខភាព នោះគេមកតែម្ដង គេនឹងរាងចាល ហើយផ្សព្វផ្សាយអ្វីដែលអាក្រក់ពីប្រទេសយើងទៅកាន់ប្រជាជនក្នុងប្រទេសគេទៀត » ។
លោកបន្តថា បច្ចុប្បន្ននេះ ក្រសួងទេសចរណ៍ដែលជាស្ថាប័នសាមី បានជំរុញឲ្យម្ចាស់ភោជនីយដ្ឋាន និងសណ្ឋាគារ ត្រូវគោរពឲ្យបាននូវស្ដង់ដាម្ហូបអាហារ ដើម្បីផ្ដល់ជូនទៅ ភ្ញៀវទេសចរ ហើយដើម្បីគោរពតាមស្ដង់ដានោះ ក្រសួងក៏បានឲ្យម្ចាស់ភោជនីយដ្ឋាន និងសណ្ឋាគារទាក់ទងជាមួយសហគមន៍កសិករ ទទួលទិញបន្លែធម្មជាតិ មកធ្វើម្ហូបសម្រាប់ភ្ញៀវទេសចរ ដោយជៀសវាងយកបន្លែដែលមានគីមីមកចម្អិន ។ បន្ថែមពីនេះ នៅពេលដែលភោជនីយដ្ឋាន និងសណ្ឋាគារ យកបន្លែពីសហគមន៍កាន់តែច្រើននោះ នឹងធ្វើកសិករនៅតាមសហគមន៍ទទួលបានចំណូលបន្ថែមសម្រាប់លើកកម្ពស់ជីវភាពគ្រួសារផងដែរ ។
ប្រធានសហព័ន្ធទេសចរណ៍កម្ពុជា លោក លូ ម៉េង បានមានប្រសាសន៍ថា វាមានសារសំខាន់ក្នុងការជំរុញឲ្យវិស័យភោជនីយដ្ឋាន និងសណ្ឋាគារត្រូវមានស្ដង់ដាអន្តរជាតិ ដើម្បីឲ្យភ្ញៀវទេសចរដែលមកលេងក្នុងប្រទេសកម្ពុជា ទទួលបានដូចអ្វីដែលមាននៅប្រទេសគាត់ ក៏ដូចជានៅបណ្ដាប្រទេសជាច្រើនទៀតដែលគាត់ធ្លាប់បានទៅ ។ លោកបន្តថា ក្នុងវិស័យទេសចរណ៍នេះបានផ្ដល់ប្រយោជន៍ច្រើនណាស់ដល់ប្រជាពលរដ្ឋកម្ពុជា ។ ជាក់ស្ដែង នឹងផ្ដល់ឱការងាររាប់ពាន់កន្លែង និងទទួលបានប្រាក់ចំណូលសម្រាប់ផ្គត់ផ្គង់គ្រួសារ ហើយបច្ចុប្បន្នក្នុងវិស័យទេសចរណ៍ ក៏កំពុងខ្វះខាតធនធានច្រើនសម្រាប់បម្រើការ ខណៈការបណ្ដុះបណ្ដាលនៅមានតិចតួចនៅឡើយ ។
លោកមានប្រសាសន៍៍ថា ៖« ក្នុងមួយឆ្នាំ យើងត្រូវការធនធានជំនាញផ្នែកចុងភៅប្រមាណ៤ពាន់ទៅ៥ពាន់នាក់ ក៏ប៉ុន្តែមានសាលាមួយដែលបណ្ដុះបណ្ដាលជំនាញចុងភៅនេះ បានត្រឹមតែជាង១០០នាក់ប៉ុណ្ណោះក្នុងមួយឆ្នាំ ដូចនេះ យើងត្រូវការជំនាញផ្នែកចុងភៅជាច្រើនទៀត ដើម្បីបម្រើការងារនៅតាមភោជនីយដ្ឋាន និងសណ្ឋាគារ ។ ក្រៅពីជំនាញចុងភៅនេះ ជំនាញផ្សេងទៀតក្នុងវិស័យទេសចរណ៍ក៏កំពុងខ្វះខាតដែរ ហើយជាពិសេសនោះ គឺភាសាក៏ជាកត្តាសំខាន់មួយដែរ ។ ជាក់ស្ដែងក្នុងពេលបច្ចុប្បន្ននេះ ខណៈភ្ញៀវចិនកំពុងឈរលំដាប់កំពូលជាភ្ញៀវទេសចរច្រើនជាងគេនៅកម្ពុជា យើងកំពុងត្រូវការអ្នកចេះភាសាចិន » ។
សូមបញ្ជាក់ថា តាមចក្ខុវិស័យរបស់ក្រសួងទេសចរណ៍កម្ពុជារំពឹងថា កម្ពុជានឹងទទួលបានភ្ញៀវទេសចរអន្តរជាតិចំនួន៦,២លាននាក់ក្នុងឆ្នាំ២០១៨នេះ និងប្រមាណ៧លាននាក់ក្នុងឆ្នាំ២០២០ ដែលនឹងនាំមកនូវប្រាក់ចំណូលប្រមាណ៥ពាន់លានដុល្លារអាមេរិក ចាក់បញ្ចូលក្នុងសេដ្ឋកិច្ច ព្រមទាំងបង្កើតឱកាសការងារបានប្រមាណ១លាននាក់ដោយផ្ទាល់ ។
ក្រសួងទេសចរណ៍ក៏រំពឹងផងដែរ ក្នុងឆ្នាំ២០៣០ កម្ពុជានឹងទទួលភ្ញៀវទេសចរមកទស្សនាក្នុងតំបន់ផ្សេងៗប្រមាណ១៥លាននាក់បង្កើតការងារបានប្រមាណ២លាននាក់ និងនាំប្រាក់ចំណូលបានប្រមាណ១០ពាន់លានដុល្លារអាមេរិក ក្នុងនោះក្រសួងបានព្យាយាមកែច្នៃតំបន់ទេសចរណ៍ដែលមានស្រាប់ ដើម្បីធ្វើឲ្យទាក់ទាញដល់ភ្ញៀវទេសចរអន្តរជាតិផងដែរ ៕
ចែករំលែកព័តមាននេះ