ខេត្តកំពង់ឆ្នាំង ៖ ក្រោយពីទទួលពាក្យបណ្ដឹង របស់ប្រជាពលរដ្ឋអ្នករស់នៅរាជធានីភ្នំពេញ ដែលអះអាងថា ជាជនរងគ្រោះបានប្ដឹងទៅអាជ្ញាធរខេត្ត និងស្ថាប័ន្នតុលាការ នៅព្រឹកថ្ងៃទី ២០ ខែកញ្ញា ឆ្នាំ២០១៨ នេះ សមត្ថកិច្ចចម្រុះដឹកនាំដោយក្រុមអធិការកិច្ចរបស់សាលាខេត្តកំពង់ឆ្នាំង ចុះទៅពិនិត្យស្ថានភាពដល់ដីទំនាស់ នៅចំណុចតោម ស្ថិតក្នុងភូមិត្រពាំងអំពិល ឃុំក្តុលអភិវឌ្ឍន៍ ស្រុកទឹកផុស ខេត្តកំពង់ឆ្នាំង ដើម្បីពិនិត្យផ្ទៀងផ្ទាត់ជាមួយបណ្ឌ័កម្មសិទ្ធ ដែលចេញដោយមន្ត្រីជំនាញ ។
បើតាមស្ត្រីឈ្មោះ សេង ហុង អាយុ៣០ឆ្នាំ មានទីលំនៅភូមិ១៤ សង្កាត់បឹងសាឡាង ខណ្ឌទួលគោក រាជធានីភ្នំពេញ បានរៀបរាប់ថា ដីចំណុចខាងលើ ប្ដីរបស់គាត់ទិញជាយូរឆ្នាំណាស់មកហើយ ដោយបានបោះបង្គោលធ្វើព្រំដីយ៉ាងត្រឹមត្រូវ តាំងពីមុនពេលក្រុមយុវជនស្ម័គ្រចិត្តរបស់សម្តេចតេជោ ចុះវាស់វែងដីធ្លីជូនប្រជាពលរដ្ឋមកម្ល៉េះ ។ នៅពេលក្រុមយុវជនស្ម័គ្រចិត្តចុះវាស់វែងដីធ្លីចុះមកដល់ទីនេះ ប្តីគាត់ដាក់ពាក្យស្នើសុំទៅមន្ត្រីជំនាញ និងក្រុមយុវជនស្ម័គ្រចិត្ត ។
ស្ត្រីខាងលើបន្តថា ក្រោយមកប្តីគាត់ក៏ទទួលបានប័ណ្ឌកម្មសិទ្ធិដោយស្របច្បាប់យ៉ាងត្រឹមត្រូវ ពីមន្ត្រីជំនាញ មានចំនួន៧ប័ណ្ឌ ស្មើនឹង៣៦ហិកតា ។ ក្រោយមកប្តីគាត់បានស្លាប់ទៅ គាត់និងកូនៗបានកាន់លើដីនោះបន្ត ប៉ុន្តែក្រោយមកក្នុងអំឡុងពេលប្រមាណ ២-៣ ខែចុងក្រោយនេះ ស្រាប់តែមានជនខិលខូចមួយក្រុមដែលគេដឹងថា ឈ្មោះណុង ណាក់ មានទីលំនៅឃុំក្តុល ជាមេក្លោង បានលួចដាក់គ្រឿងចក្រចូលឈូសឆាយរំលោភយកដីរបស់គាត់ដោយធ្វើសកម្មភាពពេលយប់ ឈូសបណ្តើរដាំដើមស្វាយបណ្តើរពេលខ្លះចូលដាំពេលថ្ងៃ និងធ្វើរបងព័ទ្ធយកដីរបស់គាត់អស់៣៦ហិកតា ។
ស្ត្រីខាងលើបន្តទៀតថា នៅពេលមានសកម្មភាពលួចឈូសឆាយដីរបស់គាត់បែបនេះ គាត់បានដាក់បណ្ដឹងទៅអាជ្ញាធរភូមិ ឃុំ ស្រុក ដែរ ប៉ុន្តែត្រូវគេប្រាប់ថាឱ្យគាត់ដាក់ចូលទៅមន្ទីរសុរិយោដីខេត្តទៅ ទើបគាត់ដាក់បណ្តឹងទៅតុលាការ និងដាក់ទៅអាជ្ញាធរខេត្តដើម្បីសុំជួយអន្តរាគមន៍ដោះស្រាយបញ្ហានេះផងដែរ ។
ទោះយ៉ាងនេះក្តី បើតាមការបញ្ជាក់របស់ក្រុមអធិការកិច្ចដែលបានចុះទៅពិនិត្យដល់កន្លែងកើតហេតុដោយបានធ្វើការវាស់វែងតាមប្រព័ន្ធនិយាមកាម បាននិយាយប្រាប់អ្នកសារព័ត៌មាន ថា ក្រុមគាត់មកនេះដោយទទួលបញ្ជាពីអភិបាលខេត្តតែប៉ុណ្ណោះ ដើម្បីមកពិនិត្យលើបញ្ហាទំនាស់ដីធ្លីរនេះ ។ ប៉ុន្តែក្រោយពីការពិនិត្យឃើញថា ស្ត្រីឈ្មោះសេង ហុង ពិតជាមានប័ណ្ណកាន់កាប់ដីធ្លីចំនួន៧ក្បាលដី ស្មើចំនួន៣៦ហិកតាពិតប្រាកដមែន។ ការងារបន្ទាប់ក្រុមអធិការកិច្ច និងបូកសរុបលទ្ធផលនៃការចុះអង្កេត ថ្ងៃនេះដាក់ជូនទៅថ្នាក់លើដើម្បីសម្រេច ៕
ចែករំលែកព័តមាននេះ