ខេត្តព្រៃវែង ៖ ករណីដែលផ្ទុះឡើងក្នុងវត្តសុគន្ធារាម ហៅវត្តត្រពាំងស្គន់ ដែលស្ថិតនៅក្នុងភូមិត្រពាំងស្គន់ ឃុំស្មោងជើង ស្រុកកំចាយមារ កំពុងធ្វើអោយមានការភ្ញាក់ផ្អើលកក្រើកទាំងអាណាចក្រ និងពុទ្ធចក្រ ដោយសារតែពុទ្ធបរិស័ទ…
ខេត្តព្រៃវែង ៖ ករណីដែលផ្ទុះឡើងក្នុងវត្តសុគន្ធារាម ហៅវត្តត្រពាំងស្គន់ ដែលស្ថិតនៅក្នុងភូមិត្រពាំងស្គន់ ឃុំស្មោងជើង ស្រុកកំចាយមារ កំពុងធ្វើអោយមានការភ្ញាក់ផ្អើលកក្រើកទាំងអាណាចក្រ និងពុទ្ធចក្រ ដោយសារតែពុទ្ធបរិស័ទ និងគណៈកម្មការអាចារ្យវត្តមិនទទួលយកដំណោះស្រាយរបស់មន្ត្រីសង្ឃ និងធម្មការស្រុក ។
គណៈកម្មការវត្ត និងពុទ្ធបរិស័ទចំណុះជើងវត្តសុគន្ធារាមនេះបានអះអាងដូចគ្នាថា ព្រះតេជគុណ វ.វ.ស ចៅអធិការវត្ត និងជាព្រះអនុគុណស្រុកកំចាយមារបានលួចមានស្រី និងបាននាំស្រីចូលទៅដេកក្នុងកុដិស្ទើររៀងរាល់យប់ ដោយនាងជាស្រីស្នេហ៌បានជិះម៉ូតូចូលមកដេកក្នុងកុដិនៅពេលព្រលប់ និងចាកចេញទៅវិញនៅម៉ោង៥ទាបភ្លឺ រហូតដល់ពុទ្ធបរិស័ទ និងគណៈកម្មការលបតាមដាន និងចាប់បានស្ត្រីដែលស្រីស្នេហ៌របស់លោកបញ្ជូនទៅអោយសមត្ថកិច្ចថែមទៀតផង ប៉ុន្តែពេលយកស្ត្រីរូបនោះហើយសមត្ថកិច្ចបានត្រឹមតែធ្វើកំណត់ហេតុរួចក៏ដោះលែងស្ត្រីរូបនោះទៅវិញដោយគ្មានចំណាត់ការអ្វីទេ ។
ប្រភពដដែលនេះបានបន្តថា ដោយសមត្ថកិច្ចគ្មានចំណាត់ការពួកគាត់ក៏នាំគ្នាដាក់ពាក្យប្តឹងទៅមន្ត្រីធម្មការស្រុករហូតមានការកោះប្រជុំដោះស្រាយរឿងនេះកាលពីថ្ងៃទី១៨ កញ្ញា ប៉ុន្តែជាលទ្ធផលមន្ត្រីសង្ឃ និងមន្ត្រីធម្មការបែរជាចោទមកលើគណៈកម្មការវិញថា មួលបង្កាច់ចៅអធិការក្នុងបំណងកំចាត់លោកចេញពីវត្តទៅវិញទើបធ្វើអោយពុទ្ធបរិស័ទក្តៅក្រហាយមិនទទួលយកដំណោះស្រាយនេះ ។
ចំណែកស្ត្រីឈ្មោះ វ.ន.ប អាយុជាង៣០ឆ្នាំ មានទីលំនៅក្នុងស្រុកកំចាយមារ និងជាជនសង្ស័យដែលត្រូវគណៈកម្មការវត្តចាប់បានប្រគល់អោយសមត្ថកិច្ចបានឆ្លើយសារភាពថា រូបនាងពិតជាបានចូលទៅដេកក្នុងកុដិព្រះគ្រូចៅអធិការវត្តមែន ប៉ុន្តែគ្រាន់តែចូលទៅដេកធម្មតា មិនបានលួចរួមរ័កជាមួយលោកទេ ។
រីឯព្រះតេជគុណ វ.វ.ស មិនអាចសុំការបំភ្លឺបានទេ ដោយសារពេលឃើញក្រុមអ្នកសារព័ត៌មានភ្លាម ព្រះតេជគុណបានរត់គេចខ្លួនចេញពីវត្តបាត់ហើយទាក់ទងតាមទូរស័ព្ទក៏មិនចូលដែរព្រោះព្រះតេជគុណបិទទូរស័ព្ទ ។
ជុំវិញការចោទប្រកាន់ខាងលើនេះត្រូវបានលោក ជឹម ភក្តី ប្រធានការិយាល័យធម្មការ និងសាសនាស្រុកកំចាយមារលើកឡើងថា ការចោទប្រកាន់របស់ពុទ្ធបរិស័ទ និងគណៈកម្មការវត្ត គឺជាការចោទប្រកាន់គ្មានមូលដ្ឋានច្បាស់លាស់ ហើយលោក និងកោះហៅភាគីពាក់ព័ន្ធប្រជុំដោះស្រាយម្តងទៀត ដោយលោកប្រធានការិយាល័យមាននិយាយថា «រឿងនឹងលោកនឹងកោះហៅមន្ត្រីសង្ឃ ភាគីពាក់ព័ន្ធមកប្រជុំម្តងទៀត ដើម្បីបញ្ចប់រឿងដោយមានកំណត់ហេតុអីនិងត្រឹមត្រូវ……..ទោសកំហុងប៉ុណ្ណឹងវាមិនត្រូវអីដែលថា ត្រូវអោយព្រះអង្គសឹក ព្រះអង្គលាចាកសិក្ខាបទ ឬក៏ដេញព្រះអង្គចេញអីវាអត់បានទេ ពីព្រោះមិនមែនជាទោសបរាជិកទេ ពីព្រោះទោសវាតិចតួចដោយគ្រាន់តែអោយស្ត្រីស្នាក់នៅលើកុដិ ទោះបីជាយប់មែន» ។
ដោយឡែកលោក សឿង សុជាតិ អភិបាលស្រុកកំចាយមារបានលើកឡើងថា រឿងនេះពុទ្ធបរិស័ទមួយចំនួនចេះតែចោទប្រកាន់លោកដោយគ្មានភស្តុតាងជាក់ស្ដែងទេ រាល់យប់នៅក្នុងកុដិលោកមាននេនៗសឹងនៅទីនោះដែរតើទៅធ្វើអ្វីកើត ហើយទាំងព្រះសង្ឃ និងនារីនោះបានអះអាងថា មិនបានរួមភេទ ឬធ្វើខុសវិន័យឡើយ ៕
ចែករំលែកព័តមាននេះ