ទីក្រុងសេអ៊ូល ៖ ប្រភពមួយចំនួនបាននិយាយកាលពីថ្ងៃព្រហស្បតិ៍ថា ផលិតផលដែកថែបកូរ៉េខាងត្បូងត្រូវបានអនុគ្រោះពីកូតាអាមេរិកជាលើកដំបូងតាំងពីសហរដ្ឋអាមេរិកដាក់កូតាលើការនាំចូលដែកថែបកូរ៉េខាងត្បូងកាលពីប៉ុន្មានខែមុន ។
កាលពីថ្ងៃចន្ទកន្លងមកនេះ ក្រសួងពាណិជ្ជកម្មអាមេរិកបានយល់ព្រមលើសំណើរបស់ក្រុមហ៊ុនផលិតឧបករណ៍ផ្នែកសុខាភិបាលអាមេរិកគឺ Micro Stamping ឲ្យដកបំពង់ដែកថែបរបស់ក្រុមហ៊ុន SL របស់កូរ៉េចេញពីបញ្ជីកូតា ។
ក្រុមហ៊ុន SL គឺជាក្រុមហ៊ុនផលិតបំពង់ដែកថែបដែលផ្គត់ផ្គង់ដល់វិស័យជាច្រើនដូចជាវិស័យសុខាភិបាល កម្ចាត់មេរោគ និងឧស្សាហកម្មបច្ចេកវិទ្យាខ្ពស់ដែលរួមមានសម្រាប់ម្ជុលចាក់ថ្នាំជាដើម ។
វាជាករណីដំបូងតាំងពីសហរដ្ឋអាមេរិកបានដាក់កូតាប្រចាំឆ្នាំលើការនាំចូលត្រឹម ២,៦៣លានតោនប៉ុណ្ណោះសម្រាប់ផលិតផលដែកថែបកូរ៉េខាងត្បូង ឬស្មើ៧០%នៃចំនួននាំចេញជាមធ្យមក្នុងរយៈពេល៣ឆ្នាំកន្លងមកនេះ ។
ជាដំបូង សហរដ្ឋអាមេរិកមិនអនុញ្ញាតឲ្យមានការអនុគ្រោះលើការនាំចេញដែកថែបកូរ៉េខាងត្បូងទេ ព្រោះពួកគេសម្រេចថាដាក់កូតាជំនួសពន្ធ២៥%ទៅហើយ ។ ប៉ុន្តែកាលពីចុងខែសីហា លោកប្រធានាធិបតីដូណាល់ត្រាំ (Donald Trump) បានចេញបញ្ជាអនុញ្ញាតឲ្យមានការអនុគ្រោះកូតាតាមករណីសម្រាប់ដែកថែបកូរ៉េ អាហ្សង់ទីន និងប្រេស៊ីល ដោយយោងទៅតាមស្ថានការណ៍នៃវិស័យដែកថែបអាមេរិក ។
ក្រសួងពាណិជ្ជកម្ម និងក្រុមហ៊ុនផលិតដែកថែបកូរ៉េបានសហការខិតខំទាមទារការអនុគ្រោះកូតានេះបន្ថែមពីរដ្ឋាភិបាលអាមេរិក ៕
ចែករំលែកព័តមាននេះ