រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជានឹងដឹកនាំគណៈប្រតិភូជាន់ខ្ពស់កម្ពុជាចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ (UN ) និងកិច្ចប្រជុំពាក់ព័ន្ធផ្សេងទៀតនៅសប្តាហ៍ក្រោយ…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជានឹងដឹកនាំគណៈប្រតិភូជាន់ខ្ពស់កម្ពុជាចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ (UN ) និងកិច្ចប្រជុំពាក់ព័ន្ធផ្សេងទៀតនៅសប្តាហ៍ក្រោយ ។
នេះបើតាមការប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ។ សេចក្តីប្រកាសព័ត៌មានចេញផ្សាយនៅថ្ងៃទី២១ កញ្ញាបានឲ្យដឹងថា សម្តេចតេជោនឹងដឹកនាំគណៈប្រតិភូចេញពីទឹកដីកម្ពុជា ចាប់ពីថ្ងៃទី២៥-២៩ ខែកញ្ញា ឆ្នាំ២០១៨ នៅទីក្រុងញូវយ៉ក សហរដ្ឋអាមេរិក ។ សម្រាប់ដំណើរចូលរួមប្រជុំនៅលើទឹកដីអាមេរិកដ៏កម្ររបស់សម្តេចតេជោ នេះក៏មានបងប្អូនខ្មែរដែលរស់នៅអាមេរិកមកពីរដ្ឋជាច្រើនប្រទេសបានត្រៀមលក្ខណៈស្វាគមន៍សម្តេចតេជោផងដែរ ។ ប៉ុន្តែស្របពេលនឹងការស្វាគមន៍ពីសំណាកអ្នកគាំទ្រ ក្រុមប្រឆាំងបានត្រៀមខ្លួនទុកជាមុនដែរ សម្រាប់ការធ្វើបាតុកម្មប្រឆាំងវត្តមានសម្តេច ទោះបីជាយ៉ាងណាក៏ដោយសម្តេចស្វាគមន៍វិញដែរចំពោះបាតុកម្មប្រឆាំងវត្តមានសម្តេចលើទឹកដីអាមេរិកនេះ ។
ប្រភពបានឲ្យដឹងថា មហាសន្និបាតនឹងប្រព្រឹត្តទៅក្រោមមូលបទ«ធ្វើឲ្យអង្គការសហប្រជាជាតិមានសារៈសំខាន់ពាក់ព័ន្ធជាមួយប្រជាជនទាំងអស់ក្នុងភាពជាអ្នកដឹកនាំសកល និងការទទួលខុសត្រូវរួមសម្រាប់សង្គមប្រកបដោយសន្តិភាព សមធម៌ និងនិរន្តរភាព» ។ អញ្ជើញអមដំណើរសម្តេចតេជោរួមមាន លោកប្រាក់ សុខុន ឧបនាយករដ្ឋមន្ត្រីរដ្ឋមន្ត្រីការបរទេសខ្មែរ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីព្រមទាំងឥស្សរៈជនសំខាន់ៗមួយចំនួនទៀត ។
សេចក្តីប្រកាសព័ត៌មានបន្តថា នៅទីក្រុងញូវយ៉កសម្តេចតេជោនឹងធ្វើសេចក្តីថ្លែងការណ៍មួយផ្តោតលើការវិវត្តនាពេលថ្មីៗ និងសមិទ្ធិផលសំខាន់ៗដែលរាជរដ្ឋាភិបាលសម្រេចបាន និងបញ្ហាតំបន់ និងអន្តរជាតិដែលជាការព្រួយបារម្ភរួម ។ ក្នុងឱកាសនៃការអញ្ជើញចូលរួមក្នុងមហាសន្និបាត UN នាយករដ្ឋមន្ត្រីនឹងជួបពិភាក្សាទ្វេភាគីដាច់ដោយឡែកពីគ្នាជាមួយលោក អង់តូនីញ៉ូហ្គូតេរ៉េស (António Guterres) អគ្គលេខាធិការអង្គការសហប្រជាជាតិលោកបូយកូបូរីស្សូវ (Boyko Borissov) នាយករដ្ឋមន្ត្រីប៊ុលហ្គារី លោកខាដហ្កា ប្រ៉ាសាទ ស្សាម៉ា អូលី (Khadga Prasad Sharma Oli) នាយករដ្ឋមន្ត្រីនេប៉ាល់ និងជួបពិភាក្សាដោយមិត្តភាពជាមួយប្រមុខរដ្ឋ និងរដ្ឋាភិបាលនៃប្រទេសមួយចំនួនទៀត ។
ក្នុងអំឡុងពេលស្នាក់នៅទីក្រុងញូវយ៉កសម្តេចតេជោនឹងជួបសហគមន៍ខ្មែររស់នៅអាមេរិក និងកាណាដាផងដែរ ។ ក្នុងកម្រិតថ្នាក់រដ្ឋមន្ត្រីវិញឧបនាយករដ្ឋមន្ត្រីនឹងជួបពិភាក្សាទ្វេភាគីជាបន្តបន្ទាប់ជាមួយសមភាគីមកពីប្រទេសអូស្ត្រាលី កាណាដា ហ្ស៊កហ្ស៊ី អេស្តូនី ហុងហ្គ្រីស៊ែប៊ី និងមន្ត្រីជាន់ខ្ពស់ក្រសួងការបរទេសអាមេរិកក្រសួងការបរទេសចក្រភពអង់គ្លេស និងពីបណ្តាប្រទេសមួយចំនួនទៀត ។
ឧបនាយករដ្ឋមន្ត្រីនឹងចុះហត្ថលេខាជាមួយលោក Zohrab Mnatsakanyan រដ្ឋមន្ត្រីការបរទេសនៃសាធារណរដ្ឋអារមេនីលើអនុស្សរណៈស្តីពីការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសខ្មែរ និងក្រសួងការបរទេសអារមេនី ។ គណៈប្រតិភូកម្ពុជាក៏នឹងអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ានក្រៅផ្លូវការ (IAMM) កិច្ចប្រជុំរដ្ឋមន្ត្រីការបរទេសអាស៊ានជាមួយប្រធានកិច្ចប្រជុំមហាសន្និបាត UN និងអគ្គលេខាធិការអង្គការសហប្រជាជាតិ (AUMM) កិច្ចប្រជុំថ្នាក់រដ្ឋមន្ត្រីស្តីពីចលនាមិនចូលបក្សសម្ព័ន្ធកិច្ចប្រជុំថ្នាក់រដ្ឋមន្ត្រីនៃប្រទេសដែលមានការអភិវឌ្ឍយឺត កិច្ចប្រជុំក្រុមប្រទេស ៧៧ និងចិន និងកិច្ចប្រជុំជាច្រើនទៀត ។
សូមបញ្ជាក់ថា សម្តេចក៏បានធ្លាប់បានធ្វើជាអនុប្រធាននៃមហាសន្និបាត UN លើកទី៥៧នេះផងដែរ កាលពីឆ្នាំ២០០១ ។ មាន១៩៣ប្រទេសជាសមាជិកអង្គការសហប្រជាជាតិ ។
គួរបញ្ជាក់ថា កាលពីពេលជួបសំណេះសំណាលជាមួយកម្មករកាលពេលថ្មីកន្លងមកនេះនៅពេលដែរសម្តេចអញ្ជើញចូលរួមកិច្ចប្រជុំនៅ UN មានពលរដ្ឋខ្មែរនៅអាមេរិកមកពីច្រើនបានត្រៀមលក្ខណៈទទួលស្វាគមន៍សម្តេចជាច្រើនរយនាក់ ប៉ុន្តែស្របពេលជាមួយគ្នានេះក៏មានពលរដ្ឋខ្មែរមួយទៀតក៏បានត្រៀមលក្ខណៈធ្វើបាតុកម្មប្រឆាំងវត្តមានរបស់សម្តេចតេជោផងដែរ ដែលដឹកនាំដោយអតីតបក្សប្រឆាំងផ្ទាល់តែម្តង ។ សម្ដេចតេជោលើកឡើងទៀតថា ក្នុងឱកាសសម្ដេចនឹងចូលរួមកិច្ចប្រជុំអង្គការសហប្រជាជាតិ ដើម្បីចង់និយាយបញ្ហាមួយចំនួនដែលទាក់ទងទៅនឹងពិភពលោកតែប៉ុណ្ណោះមិនមែនទៅនិយាយអំពីបញ្ហាកម្ពុជានោះទេ ៕
ចែករំលែកព័តមាននេះ