រាជធានីភ្នំពេញ ៖ ការធ្វើកូដកម្មតវ៉ារបស់គ្រូនិងសិស្សវិទ្យាល័យព្រះស៊ីសុវត្ថិ ដែលបន្តជាប់គ្នា៣ថ្ងៃមកហើយនោះ បានជំរុញឱ្យលោករដ្ឋមន្ត្រីក្រសួងអប់រំ យុវជន និងកីឡា ត្រូវតែមានវត្តមានដោះស្រាយបញ្ហាផងដែរ ទើបរលកនៃការទាមទាររបស់គ្រូនិងសិស្សបានស្ងប់ចិត្ត ។ការតវ៉ានេះបានផ្តើមពីការផ្លាស់ប្តូរនាយកវិទ្យាល័យ លោក មូល ស៊ុយហេង ឲ្យទៅបម្រើការងារនៅនាយកដ្ឋានមួយនៃក្រសួង និងការតវ៉ាមួយទៀតនោះ គឺសុំឱ្យដកវិទ្យាល័យពីសាលាជំនាន់ថ្មី ។
លោក ហង្ស ជួនណារុ៉ន រដ្ឋមន្ត្រីក្រសួងអប់រំ យុវជន និងកីឡា នាព្រឹកថ្ងៃទី២០ ខែកញ្ញា បានអញ្ជើញមកធ្វើការដោះស្រាយជាមួយលោកគ្រូអ្នកគ្រូនៃវិទ្យាល័យនេះ ដោយតម្រូវឱ្យមានការបោះឆ្នោតលើករណីលោកនាយក ដែលលោករដ្ឋមន្ត្រីធ្វើជាសាក្សី ។ ការបោះឆ្នោតនេះគឺដើម្បីចង់ដឹងថា តើលោក មូល ស៊ុយហេង ដែលជានាយកចាស់នៃវិទ្យាល័យព្រះសុីសុវត្ថិមានការគាំទ្រប៉ុន្មានឲ្យនៅដដែលឬក៏ផ្លាស់ចេញ ដោយមានលោកគ្រូអ្នកគ្រូចូលរួមចំនួន១៥២រូប ។
លោករដ្ឋមន្ត្រីមានប្រសាសន៍ថា កិច្ចប្រជុំនេះគឺជាកិច្ចប្រជុំសម្ងាត់ ហើយមានរបៀបវារៈត្រូវធ្វើការបោះឆ្នោតជាលក្ខណៈប្រជាធិបតេយ្យ ដូច្នេះរឿងទុកលោក មូល ស៊ុយហេង នាយកចាស់ ឬមិនទុកវាអាស្រ័យទៅលើការបោះឆ្នោតរបស់លោកគ្រូអ្នកគ្រូ ។ លោកអញ្ជើញមកនេះ ក៏ធ្វើតាមសំណើរបស់លោកគ្រូអ្នកគ្រូដែលបានស្នើសុំកាលពីថ្ងៃទី១៩ ខែកញ្ញាដែរ ។ នាឱកាសនោះ លោករដ្ឋមន្ត្រីក៏បានសុំឲ្យអ្នកសាព័ត៌
មានចេញក្រៅសាលប្រជុំដែរ ព្រោះជាការប្រជុំផ្ទៃក្នុង ។
អ្នកគ្រូម្នាក់ដែលបានចូលរួមបោះឆ្នោតសម្ងាត់ហើយសុំមិនបញ្ចេញឈ្មោះនិយាយថា ផ្អែកតាមលទ្ធផលនៃការបោះឆ្នោតដែលមានលក្ខណៈប្រជាធិបតេយ្យសេរីរួចមកឃើញថា លោក មូល ស៊ុយហេង ទទួលបានការគាំទ្រចំនួន៩៧សំឡេងលើ៥៤សំឡេងនៃចំនួនគ្រូ១៥២នាក់ តែ១សំឡេងមោឃៈ ដែលបានចូលរួមប្រជុំក្នុងចំណោមគ្រូសរុបទាំងអស់ដែលមានចំនួន២៣៦នាក់ ។ គេសង្កេតឃើញថា បើទោះបីជាសំឡេង
ឆ្នោតបានទៅលើលោក មូល ស៊ុយហេង នាយកវិទ្យាល័យចាស់ក៏ដោយ ក៏ក្រុមអធិការកិច្ចរបស់ក្រសួង កំពុងតែសួរនាំរឿងទំនាស់ខាងលើនេះដែរ ។
លោកគ្រូបង្រៀនថ្នាក់ទី៨ម្នាក់សុំមិនឲ្យបង្ហាញឈ្មោះនិយាយថា ការបោះឆ្នោតជាសម្ងាត់និងមានការបិទទ្វារបន្ទប់ប្រជុំ គឺមានវត្តមានលោក ហង្ស ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា អញ្ជើញចូលរួម និងពិនិត្យជាលទ្ធផលគឺ៩៧ឡេងលើ៥៤សំឡេងដែលសុំរក្សាទុកលោក មូល ស៊ុយហេង ជានាយកវិទ្យាល័យដដែល ។ ប៉ុន្តែយើងមិនដឹងថា ថ្នាក់ក្រសួងឯកភាពតាមការបោះឆ្នោតនេះដែរឬក៏អត់នោះទេ ជាក់ស្តែងយ៉ាងណាយើងនៅរង់ចាំមើលសេចក្តីសម្រេចរបស់ក្រសួងបន្តទៀត ។ រីឯករណីមួយទៀត ដែលលោកគ្រូអ្នកគ្រូនិងសិស្សានុសិស្សសំណូមពរឲ្យផ្លាស់សាលាជំនាន់ថ្មីចេញពីវិទ្យាល័យព្រះសុីសុវត្ថិ នៅមិនទាន់មានចម្លើយពីក្រសួងអប់រំ យុវជននិងកីឡាទេ ។
តាមប្រភពព័ត៌មានឲ្យដឹងទៀតថា ក្នុងកិច្ចប្រជុំសម្ងាត់នេះដែរ លោករដ្ឋមន្ត្រី មិនបានលើករឿងហ្នឹងមកនិយាយឡើយ ។ បញ្ហានេះយើងមិនដឹងថា តើរយៈពេលបុ៉ន្មានថ្ងៃ បុ៉ន្មានខែទើបក្រសួងឆ្លើយតបបញ្ហានេះ ។ ម្យ៉ាងវិញទៀតយើងមិនដឹងថា ក្រសួងនឹងគោរពតាមការបោះឆ្នោតសម្ងាត់ពីលោកគ្រូអ្នកគ្រូដែលបានចូលរួមបោះឆ្នោត១៥១នាក់ មានសំឡេងគាំទ្រដល់ទៅ៩៧លើ៥៤សំឡេងនេះដែរឬទេ?
លោកគ្រូខាងលើបានបញ្ជាក់យ៉ាងខ្លីថា បើក្រសួងអប់រំ យុវជន និងកីឡា ដែលមានលោក ហង្ស ជួនណារ៉ុន ជារដ្ឋមន្ត្រី ដែលបានចូលរួមជាសាក្សីក្នុងការបោះឆ្នោតនេះ មិនយកទៅអនុវត្តទេ មានតែយើងនាំគ្នាធ្វើកូដកម្មបន្តរហូតទាល់តែមានការឆ្លើយតបណាមួយដែលយើងអាចទទួលយកបាន ។ ក្រោយពីកិច្ចប្រជុំបិទទ្វារបានបញ្ចប់ លោករដ្ឋមន្ត្រី ក៏ដូចជាថ្នាក់ដឹកនាំផ្សេងៗ ដែលចូលរួមមិនបានផ្តល់កិច្ចសម្ភាសន៍ដល់អ្នកកាសែតឡើយ ។
គួរបញ្ជាក់ថា បន្ទាប់ពីលោកគ្រូអ្នកគ្រូនិងសិស្សានុសិស្ស នាំគ្នាធ្វើកូដកម្មអស់រយៈពេល៣ថ្ងៃប្រឆាំងការដកលោកនាយកវិទ្យាល័យព្រះសុីសុវត្ថិនោះ នៅព្រឹកថ្ងៃទី១៩ ខែកញ្ញា ឆ្នាំ២០១៨ គណ:កម្មការមួយដឹកនាំដោយលោក ជ័យ សារិន អគ្គាធិការនៃអគ្គាធិការដ្ឋានក្រសួងអប់រំយុវជន និងកីឡា តំណាងលោករដ្ឋមន្ត្រីក្រសួងអប់រំ យុវជន និងកីឡា និងយោងតាមលិខិតបង្គាប់ការចុះថ្ងៃទី១២ ខែកញ្ញា ឆ្នាំ២០១៨ របស់លោក ហែម សុីណារ៉េត ប្រធានមន្ទីរអប់រំយុជននិងកីឡា រាជធានីភ្នំពេញ វិទ្យាល័យព្រះស៊ីសុវត្ថិ ត្រូវផ្លាស់ប្តូរសមាសភាពថ្នាក់ដឹកនាំថ្មីរបស់ខ្លួនជាបណ្តោះអាសន្ន គឺលោក អ៊ុក សម្បត្តិ ដែលជាអនុប្រធានមន្ទីរអប់រំ ទទួលបន្ទុកធ្វើជាប្រធានគណៈគ្រប់គ្រងបណ្តោះអាសន្ននៅវិទ្យាល័យព្រះសុវត្ថិ ដោយមានអនុប្រធាន៣រូប និងសមាជិក៥រូប ៕
ចែករំលែកព័តមាននេះ