រាជធានីភ្នំពេញ ៖ បុរស៣នាក់នាំគ្នាទៅឆក់ត្រី ត្រូវបានខ្សែភ្លើងឆក់បណ្តាលឲ្យស្លាប់ម្នាក់នៅនឹងកន្លែង ចំណែកបងប្អូនមកដល់មិនអស់ចិត្តបាននាំជនរងគ្រោះទៅសង្គ្រោះមន្ទីរពេទ្យ តែជាអកុសលជនរងគ្រោះបានស្លាប់បាត់ទៅហើយ បង្កអោយមានការភ្ញាក់ផ្អើលកាលពីវេលាម៉ោង៦និង១០នាទីល្ងាចថ្ងៃទី២០ខែកញ្ញាឆ្នាំ២០១៨នៅដី វាលស្រែ ក្នុងការដ្ឋានបុរីពិភពថ្មីកំបូល២ភូមិស្ងួនពេជ្រ សង្កាត់កំបូល ខណ្ឌពោធិ៍សែនជ័យ ។
ជនរងគ្រោះដែលស្លាប់ឈ្មោះ លី ម៉ៅ ភេទប្រុស អាយុ៣៥ឆ្នាំ មុខរបរបុគ្គលិកអនាម័យ ក្នុងបុរីពិភពថ្មី កំបូល ស្នាក់នៅក្នុងការដ្ឋានក្នុងបុរីពិភពថ្មីផ្សារកំបូល មានស្រុកកំណើតនៅក្រុងសួងខេត្ត ត្បូងឃ្មុំ។
តាមប្រភពព័ត៌មានពីនគរបាលប៉ុស្តិ៍កន្ទោកបានឲ្យដឹងថានៅមុនពេលកើតហេតុ ជនរងគ្រោះនិងមិត្តភក្តិ២នាក់ទៀតតែងនាំគ្នាទៅឆក់ត្រីពីរបីដងរួចមកហើយ លុះនៅថ្ងៃកើតហេតុ អ្នកទាំ៣នាក់បានទៅឆក់ត្រីនៅខាងក្រោយបុរីពិភពថ្មីដោយតខ្សែភ្លើងចេញពីបុរីខាងលើ បន្ទាប់មកពួកគាត់បាននាំគ្នារាយខ្សែភ្លើងរួចរាល់ ដោយម្នាក់ជាអ្នកកាន់ខ្សែភ្លើង ម្នាក់ជាអ្នកកាន់ត្រី និងម្នាក់ទៀតអ្នកអូសខ្សែភ្លើង ។
បន្ទាប់មកជនរងគ្រោះដែលជាអ្នកកាន់ត្រី ពេលដែលអូសខ្សែភ្លើងនោះក៏ជាប់ដុំថ្ម ហើយជនរងគ្រោះបានទៅទាញខ្សែដែលទាក់នឹងដុំថ្មនោះ បន្ទាប់មកជនរងគ្រោះក៏ត្រូវខ្សែភ្លើងឆក់បណ្ដាលឱ្យស្លាប់នៅកន្លែងកើតហេតុតែម្ដង បន្ទាប់មកមិត្តភក្ដិជនរងគ្រោះទាំង២នាក់ខាងលើ បាននាំគ្នាទាញផ្តាច់ខ្សែភ្លើងដើម្បីផ្តាច់ចរន្តអគ្គិសនី ។
ប្រភពព័ត៌មានបានបន្តទៀតថា ពេលឆក់ភ្លាមៗ ពួកគាត់បានទាក់ទងទៅមេការក្នុងការដ្ឋានខាងលើ ហើយបានទាក់ទងទៅក្រុមគ្រួសារមកភ្លាមៗផងដែរ។
តាមប្រភពព័ត៌មានពីឈ្មោះលី ស្រាង ត្រូវជាប្អូនជនរងគ្រោះបាននិយាយថា ពេលដឹងថាបងប្រុសរបស់គាត់ត្រូវខ្សែភ្លើងឆក់ គាត់បានដឹកបងប្រុសយកទៅសង្គ្រោះនៅមន្ទីរពេទ្យដើម្បីជួយសង្គ្រោះដែរ តែអកុសលបងប្រុសរបស់គាត់បានស្លាប់បាត់ទៅហើយ។
ក្រោយពេលកើតហេតុ ដោយប្អូនប្រុសរបស់ជនរងគ្រោះឃើញករណីឆក់ជាក់ស្ដែង ប្អូនប្រុសរបស់ជនរងគ្រោះមិនមានប្តឹងផ្តល់អ្វីនោះទេ ហើយសមត្ថកិច្ចនគរបាលប៉ុស្តិ៍កន្ទោកក៏បានធ្វើលិខិតប្រគល់សពអោយក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ