ចាប់ពីឆ្នាំ២០២១ទៅ រថយន្តរាប់លាននៅទូទាំងពិភពលោក អាចនឹងសុទ្ធតែប្រើប្រាស់ប្រព័ន្ធAndroidបំពាក់លើអេក្រង់ទាំងអស់។ ក្រុមហ៊ុន Google ពេលនេះបានចាប់ដៃគូជាមួយ ក្រុមហ៊ុនរថយន្តធំៗមួយចំនួន ដូចជា Renault, Nissan និងMitsubishi ជាដើម ដែលលក់រថយន្តច្រើនជាងក្រុមហ៊ុនឯទៀតបូកចូលគ្នា ដើម្បីបង្កើតប្រព័ន្ធប្រតិបត្តិការនៅពីក្រោយប្រព័ន្ធកម្សាន្តនិងប្រព័ន្ធGPS ។
ប្រព័ន្ធនេះនឹងអាចឲ្យម្ចាស់រថយន្តយកកម្មវិធី (App) ពីក្នុងPlay Store មើលផែនទីតាម Google Map និងបញ្ជាដោយនិយាយតាមរយៈ Google Assistant ។
លោក Kal Mos ប្រធានសហភាព Renault-Nissan-Mitsubishi ពិភពលោក បានប្រាប់ថា ៖« នៅពេលអនាគត Google Assistant នឹងអាចក្លាយទៅជាវិធីចម្បងក្នុងការបញ្ជាពីអ្នកបើកបររថយន្តទៅរថយន្ត »។
កាលពីឆ្នាំមុន សហភាព Renault-Nissan-Mitsubishi បានលក់រថយន្តបានចំនួន ១០,៦លានគ្រឿងទូទាំងពិភពលោក ហើយលក់បាន៥,៥៤លានគ្រឿងនៅត្រឹមថ្ងៃទី៣០ ខែមិថុនា ក្នុងឆ្នាំនេះ ។
ដូច្នេះ យើងប្រហែលជារំពឹងថា នឹងមានចំនួនស្រដៀងគ្នានៅពេលដាច់ឆ្នាំ២០១៨។ ប្រព័ន្ធ Android នឹងមិនមាននៅលើរថយន្តទាំងនេះទេ រហូតដល់បីឆ្នាំទៀត ។ ខាងសហភាព Renault-Nissan-Mitsubishi បានព្យាករណ៍ថា នឹងអាចលក់រថយន្តបាន១៤លានគ្រឿងនៅឆ្នាំ២០២២ ។
យោងតាមកាសែត The Wall Street Journal បានឲ្យដឹងថា Googleបានព្យាយាមចូលទៅក្នុងវិស័យបច្ចេកវិទ្យារថយន្តអស់រយៈពេលជាងដប់ឆ្នាំមកហើយ ។ តែវាត្រូវបានរាំងស្ទះដោយសារតែក្រុមហ៊ុនរថយន្តធំៗមួយចំនួនគិតថា វាជាការប្រជែងរបស់ពួកគេ។ ដល់ថ្នាក់ថា ក្រុមហ៊ុនរថយន្ត Mercedes និង BMW សុខចិត្តបង្កើតជាកម្មវិធីGPSផ្ទាល់ខ្លួន ជាងការប្រើប្រាស់កម្មវិធីរបស់Google ។
គួរបញ្ជាក់ផងដែរថា កម្មវិធីដែលប្រើប្រាស់ក្នុងការកម្សាន្ដក្នុងរថយន្ត នឹងមិនមានតែ Google នោះទេ ព្រោះថា យើងក៏មាន Apple ផងដែរ ដែលប្រឡូកក្នុងវិស័យនេះ។ ដូចនេះហើយទើបក្រុមហ៊ុនរថយន្តមួយចំនួន នៅមិនទាន់សម្រេចថាយក Apple ឬ Google មកដាក់នៅលើប្រព័ន្ធកម្សាន្ដរបស់ខ្លួន ៕
ចែករំលែកព័តមាននេះ