រាជធានីភ្នំពេញ ៖ កូនស្រីចេញពីធ្វើការវិញប្រទះឃើញម្តាយដេកស្លាប់នៅលើពូកក្នុងផ្ទះ ដោយសង្ស័យថា កូនប្រុសបង្កើតដែលមានជំងឺសសៃប្រសាទវាយសម្លាប់ ហើយត្រូវបានសមត្ថកិច្ចឃាត់ខ្លួនកូនប្រុសយកទៅសួរនាំ តែការពិតស្ត្រីជាម្តាយស្លាប់ដោយសារជំងឺគាំងបេះដូង និងជំងឺថ្លើម ។ ហេតុការណ៍នេះដែរបានបង្កអោយមានការភ្ញាក់ផ្អើលឡើងកាលពីវេលាម៉ោង៦និង៥០នាទីព្រលប់ថ្ងៃទី២០…
រាជធានីភ្នំពេញ ៖ កូនស្រីចេញពីធ្វើការវិញប្រទះឃើញម្តាយដេកស្លាប់នៅលើពូកក្នុងផ្ទះ ដោយសង្ស័យថា កូនប្រុសបង្កើតដែលមានជំងឺសសៃប្រសាទវាយសម្លាប់ ហើយត្រូវបានសមត្ថកិច្ចឃាត់ខ្លួនកូនប្រុសយកទៅសួរនាំ តែការពិតស្ត្រីជាម្តាយស្លាប់ដោយសារជំងឺគាំងបេះដូង និងជំងឺថ្លើម ។ ហេតុការណ៍នេះដែរបានបង្កអោយមានការភ្ញាក់ផ្អើលឡើងកាលពីវេលាម៉ោង៦និង៥០នាទីព្រលប់ថ្ងៃទី២០ ខែកញ្ញា ឆ្នាំ២០១៨ នៅក្នុងផ្ទះជនរងគ្រោះ ស្ថិតនៅភូមិព្រៃកី(ខ)សង្កាត់ពងទឹក ខណ្ឌដង្កោ ។
ជនរងគ្រោះដែលស្លាប់ឈ្មោះ ម៉ៃ នួន ភេទស្រី អាយុ៦៣ឆ្នាំ មុខរបរនៅផ្ទះ ស្នាក់នៅផ្ទះអត់លេខ ភូមិព្រៃកី(ខ) សង្កាត់ពងទឹក ខណ្ឌដង្កោ ។ ចំណែកជនសង្ស័យដែលត្រូវជាកូនបង្កើត ត្រូវបានសមត្ថកិច្ចឃាត់ខ្លួន ឈ្មោះ ពិន ខន ភេទប្រុស អាយុ៣៨ឆ្នាំ មុខរបរមិនពិតប្រាកដ (មានជំងឺសសៃប្រសាទ) ស្នាក់នៅជាមួយម្តាយ ។
តាមសម្តីឈ្មោះ ឡុង សាមាន ភេទស្រី អាយុ២០ឆ្នាំ មុខរបរកម្មកររោងចក្រ ដែលជាត្រូវជាកូនបង្កើតរបស់ស្ត្រីរងគ្រោះបានអោយដឹងថា មុនពេលកើតហេតុ នាងបានចេញពីធ្វើការនៅរោងចក្រ លុះត្រលប់មកផ្ទះវិញ នាងបានឃើញទ្វារផ្ទះចំហរ ហើយនាងក៏បានដើរចូលទៅបើកភ្លើង ក៍ស្រាប់តែឃើញម្តាយរបស់នាងដេកផ្អៀងផ្កាប់មុខ ហើយដោយឃើញសភាពបែបនេះ នាងបានចូលទៅទាញម្តាយឱ្យផ្ងារវិញ ស្រាប់តែម្តាយរបស់នាងរឹងខ្លួន ហើយមានឈាមហូរតាមភ្នែក និងស្រមោចរោមស្លាប់បាត់ទៅហើយ ពេលនោះដែរ នាងក៍បានឃើញបងប្រុស របស់នាងដែលជាជនសង្ស័យ ដេកនៅលើគ្រែខាងមុខ តែនាងមិនបានសង្ស័យថាបងប្រុសរបស់នាងជាអ្នកសម្លាប់ម្តាយទេ ។
ប្រភពដដែលបានបន្តទៀតថា បន្ទាប់ពីឃើញហេតុការណ៍បែបនេះហើយ នាងបានស្រែកយំឆោឡោផ្អើលអ្នកជិតខាងឱ្យជួយ រហូតផ្អើលដល់សមត្ថកិច្ចមូលដ្ឋានចុះទៅកន្លែងកើតហេតុ ដើម្បីពិនិត្យហេតុការណ៍នេះ ហើយក៍បានឃាត់ខ្លួនបុរសម្នាក់ដែលជនសង្ស័យត្រូវជាកូនប្រុសបង្កើតរបស់ស្ត្រីរងគ្រោះ ដែលគេថាជាមនុស្សមានជំងឺសរសៃប្រសាទ មានអាការៈស្រវឹង បន្ទាប់មកបានចាប់បុរសជាកូនដាក់ខ្នោះដោយសង្ស័យថា កូនប្រុសម្នាក់នេះជាអ្នកវាយសម្លាប់ម្តាយ យកទៅសាកសួរនៅប៉ុស្តិ៍នគរបាលពងទឹក និងបានរាយការណ៍ទៅខាងជំនាញកោសលវិច័យខណ្ឌដង្កោនិងជំនាញកោសល្យវិច័យក្រុងភ្នំពេញ អោយចុះមកពិនិត្យសពជនរងគ្រោះតែម្តង ។
បើតាមសម្តីសាក្សីបំភ្លឺជាអ្នកជិតខាងឈ្មោះ អ៊ិន សុខខុម ភេទស្រី អាយុ៤០ឆ្នាំ បានអោយដឹងថា កាលពីវេលាម៉ោង៩ព្រឹកថ្ងៃកើតហេតុ រូបគាត់បានឮបុរសជាកូនហើយក៏ត្រូវជនសង្ស័យ មានអាការៈស្រវឹង ហើយអង្គុយនិយាយម្នាក់ឯងថា «ថ្ងៃហ្នឹងអញនឹងសម្លាប់ង៉ែងឱ្យបាន» ហើយពេលនោះស្ត្រីជនរងគ្រោះជាម្តាយ បានដើរពីលើថ្នល់មកផ្ទះវិញ ឃើញកូននិយាយបែបនេះ ក៏បានទាស់សម្តីគ្នា ជេរគ្នាមួយប្រាវ ហើយក៏បានស្ងាត់សម្លេងតែម្តង លុះមកដល់ពេលកើតហេតុ កូនស្រីរបស់ជនរងគ្រោះបានត្រលប់មកពីធ្វើការវិញ ក៏ផ្អើលថាម្តាយរបស់ខ្លួនស្លាប់តែម្តង ។
ក្រោយពេលកើតហេតុ បើតាមការបញ្ជាក់ ពីជំនាញកោសលវិច័យក្រុង និងសំរេចដោយលោក ឧកញ្ញា នង សុវណ្ណរត្ន័ វេជ្ជបណ្ឌិតជំនាញប្រចាំ កោសលវិច័យរាជធានីភ្នំពេញ បានអោយដឹងថា ជនរងគ្រោះមានជំងឺប្រចាំកាយ លើសឈាម និងជំងឺថ្លើម (ហើយស្លាប់ដោយគាំងបេះដូងឬជំងឺថ្លើម) ហើយមិនទាក់ទងនិងករណី ឃាតកម្ម នោះទេ ។
ចំណែកបុរសជាកូនដែលគេសង្ស័យថា វាយសម្លាប់ម្តាយ ត្រូវបានសមត្ថកិច្ចដោះលែងអោយមកចូលរួម បុណ្យសពម្តាយនៅឯផ្ទះវិញផងដែរ ៕
ចែករំលែកព័តមាននេះ