រាជធានីភ្នំពេញ ៖ ប្រកាសបើកចលនាប្រឡងប្រណាំងភោជនីដ្ឋាន និងអាហារដ្ឋានទេសចរស្អាតលើកទី១ ក្រោមវត្តមានលោក ជា បូរ៉ា រដ្ឋមន្ត្រីស្តីទីក្រសួងទេសចរនៅថ្ងៃទី២០ ខែកញ្ញា ឆ្នាំ២០១៨…
រាជធានីភ្នំពេញ ៖ ប្រកាសបើកចលនាប្រឡងប្រណាំងភោជនីដ្ឋាន និងអាហារដ្ឋានទេសចរស្អាតលើកទី១ ក្រោមវត្តមានលោក ជា បូរ៉ា រដ្ឋមន្ត្រីស្តីទីក្រសួងទេសចរនៅថ្ងៃទី២០ ខែកញ្ញា ឆ្នាំ២០១៨ ខណៈដែលពិធីនេះត្រូវបានរៀបចំធ្វើឡើងនៅភោជនីយដ្ឋានទន្លេបាសាក់២ ដោយមានការចូលរួមពីប្រតិបត្តិករភោជនីយដ្ឋាន និងអាហារដ្ឋានទេសចរ យុវជន សិស្សនិស្សិត រួមទាំងផ្នែកពាក់ព័ន្ធជាច្រើននាក់ផងដែរ ។
លោកជា បូរ៉ា រដ្ឋមន្ត្រីស្តីទីក្រសួងទេសចរបានថ្លែងថា ការរៀបចំនូវចលនាប្រឡងប្រណាំង «ភោជនីយដ្ឋាន និងអាហារដ្ឋានទេសចរស្អាត»លើកទី១ ឆ្នាំ២០១៨នេះឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការអភិវឌ្ឍ និងផ្តល់សេវាប្រកបដោយគុណភាព និងភាពកក់ក្តៅដល់ភ្ញៀវទេសចរក៏ដូចជា ចូលរួមថែរក្សាបរិស្ថាន សោភ័ណ្ឌភាព និងភាពស្អាតនៅតាមទីតាំងផ្តល់សេវាកម្មម្ហូបអាហារ និងភេសជ្ជៈ ព្រមទាំងតំបន់គោលដៅទេសចរនៅក្នុងព្រះរាជាណាចក្រកម្ពុជា ។ លោកបន្តថា ចលនាប្រឡងប្រណាំងនេះក៏ជាសារមួយក្រើនរំលឹក និងប្រកាសជូនប្រជាពលរដ្ឋ និងភាគីពាក់ព័ន្ធឱ្យចូលរួមគ្រប់គ្រងសម្រាប់នៅតុអាហារប្រកបដោយការទទួលខុសត្រូវខ្ពស់ ដើម្បីសោភ័ណ្ឌភាព និងភាពស្អាតដែលជាកត្តាសំខាន់មិនអាចខ្វះបានក្នុងការអភិវឌ្ឍវិស័យទេសចរប្រកបដោយចិរភាព ។
លោករដ្ឋមន្ត្រីស្តីទីក៏បានរម្លឹកឡើងវិញថា ក្រោមការដឹកនាំដ៏ត្រឹមត្រូវ និងឈ្លាសវៃប្រកប ដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជាបច្ចុប្បន្នមានសុខសន្តិភាព ស្ថិរភាពនយោបាយ សន្តិសុខ សណ្ឋាប់ធ្នាប់ពេញលេញ និងមានការអភិវឌ្ឍរីកចម្រើនលើគ្រប់វិស័យ ក្នុងនោះវិស័យទេសចរមានការរីកចម្រើនគួរជាទីមោទនៈ ។
ទន្ទឹមនោះវិស័យទេសចរកម្ពុជាត្រូវបានចាត់ទុកជាវិស័យអាទិភាពមួយដើរតួជា «មាសបៃតង» រួមចំណែកដល់ការអភិវឌ្ឍសេដ្ឋកិច្ច-សង្គម និងការការពារបរិស្ថានពោល គឺចូលរួមដល់ការកសាងសេដ្ឋកិច្ចបៃតងនៅកម្ពុជាដែលជាផ្នែកគាំទ្រដល់ការសម្រេចបាននូវគោលដៅអភិវឌ្ឍ ក្រោយឆ្នាំ២០៣០ របស់អង្គការសហប្រជាជាតិ ។ ជាក់ស្តែងក្នុងឆ្នាំ២០១៧ កម្ពុជាទទួលបានភ្ញៀវទេសចរអន្តរជាតិប្រមាណជា៥.៦លាននាក់កើនឡើង១១.៨% និងភ្ញៀវទេសចរក្នុងស្រុកប្រមាណជា១១លាននាក់បានរួមចំណែកប្រមាណជា១៣% នៃផលិតផលក្នុងស្រុកសរុបរបស់កម្ពុជា (GDP) និងតំណាងឱ្យប្រមាណ៣០% នៃវិស័យសេវាកម្មនៅកម្ពុជា ។
ដោយឡែករយៈពេល០៧ខែ ដើមឆ្នាំ២០១៨នេះ កម្ពុជាទទួលបានភ្ញៀវទេសចរអន្តរជាតិចំនួន ៣,៤៥៥,៧១៦ នាក់ កើនឡើង១១.១% (ធៀបនឹងរយៈពេលដូចគ្នាក្នុងឆ្នាំ២០១៧) ។ ជាមួយគ្នានេះយើងបានដាក់ចេញនូវចក្ខុវិស័យប្រកបដោយសុទិដ្ឋិនិយម គឺកម្ពុជានឹងទទួលបានភ្ញៀវទេសចរអន្តរជាតិចំនួនប្រមាណ៦.១លាននាក់នៅឆ្នាំ២០១៨ ប្រមាណ៧លាននាក់នៅឆ្នាំ២០២០ ប្រមាណ១១លាននាក់ នៅឆ្នាំ២០២៥ និងប្រមាណ១៥លាននាក់ នៅឆ្នាំ២០៣០ និងភ្ញៀវទេសចរក្នុងស្រុកប្រមាណ១៣លាននាក់ នៅឆ្នាំ២០២០ និងប្រមាណ១៨លាននាក់នៅឆ្នាំ២០៣០ ជាមួយចំណូលសរុបប្រមាណ១០ពាន់លានដុល្លារអាមេរិក បង្កើតឱកាសការងារដោយផ្ទាល់ប្រមាណ២លាននាក់ ។
លោកអះអាងថា តាមរយៈនៃការសិក្សានេះក៏បានបង្ហាញថា ម្ហូបអាហារ និងភេសជ្ជៈរួម ចំណែកយ៉ាងចម្បងក្នុងការទាក់ទាញឲ្យភ្ញៀវទេសចរត្រឡប់មកកម្សាន្តម្តងទៀត នៅតំបន់គោលដៅណាមួយ ។ ក្នុងន័យនេះគុណភាពម្ហូបអាហារ ពិសេសអនាម័យនៅភោជនីយដ្ឋាន និងអាហារដ្ឋានទេសចរណ៍ពិតជាទាមទារឲ្យមានការយកចិត្តទុកដាក់ខ្ពស់ ពីសំណាក់ក្រសួង មន្ទីរទេសចរ ប្រតិបត្តិការ និងភាគីពាក់ព័ន្ធទាំងអស់ក្នុងវិស័យទេសចរ ពិសេសពីសំណាក់ ប្រតិបត្តិករផ្នែកភោជនីយដ្ឋាន និងអាហារដ្ឋានផ្ទាល់ ។ ពាក់ព័ន្ធចលនាប្រឡងប្រណាំងខាងលើនេះលោកជា បូរ៉ា ក៏បានលើកឡើងអំពីបញ្ហាប្រឈមមួយចំនួនរាំងស្ទះដល់សោភ័ណ្ឌភាព ភាពស្អាត និងអនាម័យនៅតាមភោជនីយដ្ឋាន និងអាហារដ្ឋានទេសចរណ៍នៅទូទាំងប្រទេសផងដែរ ។ យ៉ាងណាក៏ដោយលោករំពឹងថា តាមរយៈចលនាប្រឡងប្រណាំង «ភោជនីយដ្ឋាន និងអាហារដ្ឋានទេសចរស្អាត»នេះនឹងជួយឲ្យដំណើរការអាជីវកម្មរបស់លោក លោកស្រី មានលក្ខណៈល្អប្រសើរជាងមុន និងមានអតិថិជនច្រើនជាងមុន ដោយសារតែចលនាប្រឡងប្រណាំងនេះជួយពង្រឹងអនាម័យ បង្កើនសោភ័ណ្ឌភាព និងភាពស្អាតផ្នែករូបវន្តនៅទីតាំងអាជីវកម្មដែលវាជាកត្តាចាំបាច់បំផុតទាក់ទាញចំណាប់អារម្មណ៍អតិថិជន និងទេសចរឲ្យចូលប្រើប្រាស់សេវាកម្មរបស់លោក លោកស្រីមិនខាន ។
លោកជា បូរ៉ា ក៏បានវាយតម្លៃខ្ពស់ចំពោះមូលដ្ឋានអាជីវកម្មភោជនីយដ្ឋាន និងអាហារដ្ឋានទេសចរដែលចូលរួមក្នុងចលនាប្រឡងប្រណាំង «ភោជនីយដ្ឋាន និងអាហារដ្ឋានទេសចរស្អាត» លើកទី០១ ឆ្នាំ២០១៨នេះដែលបានឆ្លុះបញ្ចាំងពីទំនួលខុសត្រូវសង្គមនៅក្នុងដំណើការប្រតិបត្តិការអាជីវកម្មរបស់ខ្លួន និងធ្វើគំរូល្អដល់ប្រតិបត្តិករដទៃទៀត ៕
ចែករំលែកព័តមាននេះ