រាជធានីភ្នំពេញ ៖ បុរសម្នាក់បានឃាត់ខ្លួនស្ត្រីជាប្រពន្ធរបស់ខ្លួនរួមជាមួយបុរសម្នាក់ផ្សេងទៀតនាំទៅប្រគល់ជូន នគរបាលប៉ុស្តិ៍ចោមចៅ១ឲ្យជួយចាត់ការតាមច្បាប់។ ដោយគាត់បានធ្វើការចោទប្រកាន់ប្រពន្ធរបស់គាត់ថា បានលេងឆាតហ្វេសប៊ុកចុះឡើងជាមួយបុរសម្នាក់នោះរហូតបង្កាត់ភ្លើងស្នេហ៍ជាមួយគ្នាឲ្យឆេះយ៉ាងសន្ធោរសន្ធៅ និងបានរួមរ័កគ្នាជាញឹកញាប់ផងដែរ។ បន្ទាប់មកថែមទាំងបានចុះចេញពីផ្ទះចោលរូបគាត់ និងកូនប្រុសស្រី២នាក់ ទៅរស់នៅលួចលាក់សហាយស្មន់ជាមួយបុរសខាងលើនោះអស់រយៈពេលជាង១០ថ្ងៃកន្លងមកហើយ។
ពេលនោះគាត់បានតាមរកគ្រប់កន្លែងក៏ស្រាប់តែប្រទះឃើញអ្នកទាំង២កំពុងជិះម៉ូតូឌុបគ្នាតាមផ្លូវទើបឃាត់ខ្លួនប្រគល់ជូននគរបាលតែម្ដង ប៉ុន្តែបន្ទាប់មកនគរបាលប៉ុស្តិ៍ចោមចៅ១ ខណ្ឌពោធិ៍សែនជ័យ បានបញ្ជូនអ្នកទាំងពីរ ទៅកាន់ប៉ុស្តិ៍ពងទឹក ខណ្ឌដង្កោចាត់ការបន្តវិញ។ ហេតុការណ៍នោះបានកើតឡើង កាលពីវេលាម៉ោង៣ និង៣០នាទី រសៀលថ្ងៃទី២០ ខែកញ្ញា ឆ្នាំ២០១៨ នៅតាមផ្លូវស្ថិតនៅក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ (បុរសជាប្ដីបានសុំមិនឲ្យបញ្ចេញឈ្មោះនោះឡើយ)។ ចំណែកប្រពន្ធរបស់គាត់ឈ្មោះ នី ស៊ីណេត អាយុ៣១ ឆ្នាំមុខរបរ កម្មការិនីរោងចក្រកាត់ដេរ ស្នាក់នៅភូមិវត្តស្លែង សង្កាត់ពងទឹក ខណ្ឌដង្កោ។
បានលួចលាក់ស្នេហាជាមួយបុរសម្នាក់ឈ្មោះ យឹម ចាន់វណ្ណៈ អាយុ៣២ឆ្នាំ ស្នាក់នៅក្នុងបុរីសន្ដិភាព២ សង្កាត់ចោមចៅ២ ខណ្ឌពោធិ៍សែនជ័យ។ បុរសជាប្ដីបានរៀបរាប់ប្រាប់ឲ្យ នគរបាលដឹងថា គាត់ និងប្រពន្ធបានរៀបការតាមប្រពៃណីបានរយៈពេល១៣ឆ្នាំកន្លងមកហើយ ដោយក្រាបសំពះផ្ទះក្បាលដល់កន្ទេលក្រោមការចូលរួមអបអរសាទរពីសំណាក់មេបារញាតិមិត្ត និងភ្ញៀវកិត្តយសទាំងសងខាង។ មិនតែប៉ុណ្ណោះមានការដឹងឮពីអាជ្ញាធរហើយក៏បានចុះសំបុត្រអាពាហ៍ពិពាហ៍ ត្រឹមត្រូវតាមច្បាប់ថែមទៀតផង។ ចំណែកការរួមរស់ជាមួយគ្នាប្ដីប្រពន្ធរយៈពេល១៣ឆ្នាំមកនេះ ពួកគាត់បង្កើតបានកូនប្រុសម្នាក់អាយុ៨ឆ្នាំ និងកូនស្រីម្នាក់អាយុ១២ឆ្នាំថែមទៀតផង។
បុរសជាប្ដីដដែលបានបន្ត ទៀតថា ពីមុនប្រពន្ធបានស្រឡាញ់គាត់ខ្លាំងណាស់ មិនដែលមានការថ្នាំងថ្នាក់គ្នាធំដុំអ្វីឡើយ ហើយគាត់ក៏មិននឹកស្មានថា នាងផិតក្បត់បែបនេះឡើយ។ ម្យ៉ាងទៀតគាត់មិនបានដឹងថាប្រពន្ធលួចលាក់ស្នេហា ជាមួយបុរសឈ្មោះ យឹម ចាន់វណ្ណៈ នោះតាំងពីពេលណានោះឡើយ ប៉ុន្តែគាត់ទើបតែដឹងរយៈពេលជាង១ខែចុង ក្រោយនេះប៉ុណ្ណោះ។ ការបែកធ្លាយនូវទំនាក់ទំនងស្នេហារវាងប្រពន្ធរបស់គាត់ និងបុរសឈ្មោះ យឹម ចាន់វណ្ណៈ នោះគឺតាមរយៈការលេងឆាតហ្វេសប៊ុករបស់អ្នកទាំង២នាក់នោះ។ គាត់ក៏ធ្លាប់បានសួរនាំប្រពន្ធរឿងលេងឆាត នោះដែរ ហើយនាងបានប្រាប់ថា គ្រាន់តែលេងធម្មតាទេទើបគាត់មិនសូវរវល់។
លុះក្រោយមកស្រាប់តែប្រពន្ធ បានលួចចុះចោលគាត់ និងកូនប្រុសស្រីទៅរស់នៅជាមួយប្រុសសហាយ ខាងលើបាត់រយៈពេលជាង១០ថ្ងៃ កន្លងមកហើយ។ ពេលនោះគាត់រួមជាមួយឪពុកក្មេក បានតាមរកគ្រប់កន្លែង និងបានដាក់ពាក្យប្ដឹងនៅប៉ុស្តិ៍នគរបាលពងទឹកហើយដែរ រហូតមកដល់ថ្ងៃកើតហេតុទើបឃើញនាងកំពុងជិះម៉ូតូ ជាមួយសហាយក៏ឃាត់ខ្លួនទាំងនាក់នាំទៅប្រគល់ជូននគរបាលប៉ុស្តិ៍ចោមចៅ១តែម្ដង។ នគរបាលបានឲ្យដឹងថា ក្រោយពេលឃាត់ខ្លួនបុរសជាប្ដីបានប្រគល់ប្រពន្ធទៅឲ្យប្រុសសហាយ ហើយគាត់បានទាមទារជំងឺចិត្តពីប្រុស សាហាយ ចំនួន៤ពាន់ដុល្លារ។
ខណៈនោះក៏មានការចចារគ្នាយូរដែរ ប៉ុន្តែមិនបានត្រូវរ៉ូវគ្នាឡើយ ទើបនគរបាលប៉ុស្ដិ៍ចោមចៅ១ ខណ្ឌពោធិ៍សែនជ័យ បានបញ្ជូនអ្នកទាំង២ទៅកាន់ប៉ុស្តិ៍ពងទឹក ខណ្ឌដង្កោដើម្បីដោះស្រាយបន្តវិញ។ ប្រភពខាងលើបានបន្តថា បន្ទាប់មកនគរបាលប៉ុស្តិ៍ពងទឹកបាននាំ អ្នកទាំងទៅកាន់សាលាសង្កាត់ពងទឹក និងបានដោះស្រាយគ្នានៅទីនោះ ហើយ បុរសជាប្ដីបានសម្រេចចិត្តដាច់ខាតលែងយកប្រពន្ធនោះទៀតហើយ។ ពួកគេក៏បានសម្រេចលែងលះគ្នា ខណៈនោះបុរសជាប្ដីបានទាមទារសំណងជំងឺចិត្តពីប្រុសសហាយនៅត្រឹមចំនួន៣ពាន់ដុល្លារវិញ និងបានយកកូនទាំង២នាក់គឺកូនប្រុសអាយុ៨ឆ្នាំ និងកូនស្រីអាយុ១២ឆ្នាំទៅចិញ្ចឹម៕
ចែករំលែកព័តមាននេះ