ខេត្តកំពង់ស្ពឺ ៖ ជាងផ្ទះវ័យចំណាស់ម្នាក់បានទៅធ្វើផ្ទះឲ្យអ្នកភូមិ ស្រាប់តែជួបគ្រោះថ្នាក់នៅពេលលើកទ.ទឹកឡើងលើដំបូលប៉ះខ្សែភ្លើងស្រាតដែលគេរាយនៅមុខផ្ទះ បណ្តាលឲ្យឆក់ស្លាប់ភ្លាមៗមួយរំពេច។
ហេតុការណ៍នេះបានកើតឡើងនៅម៉ោង៩និង១០នាទីព្រឹកថ្ងៃទី២០ ខែកញ្ញា ឆ្នាំ២០១៨ ស្ថិតក្នុងភូមិជន្លង់ម្លូ ឃុំព្រៃរំដួល ស្រុកភ្នំស្រួច ខេត្តកំពង់ស្ពឺ។
ជនរងគ្រោះដែលស្លាប់ឈ្មោះឡុង ឌឿន ភេទប្រុស អាយុ៥៨ឆ្នាំ មុខរបរជាងផ្ទះ រស់នៅភូមិព្រៃរមៀត ឃុំព្រៃរំដួល ស្រុកភ្នំស្រួច ។ ចំណែកម្ចាស់ផ្ទះឈ្មោះប៉ុន តូច ភេទស្រី អាយុ៣៥ឆ្នាំ រស់នៅភូមិកើតហេតុខាងលើ។
ប្រភពព័ត៌មានពីម្ចាស់ផ្ទះបានប្រាប់សមត្ថកិច្ចថា មុនពេលកើតហេតុ គាត់បានជួលជនរងគ្រោះឲ្យមកធ្វើផ្ទះឲ្យគាត់ ខណៈពេលកំពុងតែធ្វើផ្ទះនោះ ជនរងគ្រោះបានលើកទ.ទឹកដើម្បីចាប់ភ្ជាប់លើដំបូលផ្ទះ ស្រាប់តែចៃដន្យអាក្រក់ ទ.ទឹកបានប៉ះនឹងខ្សែភ្លើងស្រាត ដែលគេរាយលើបង្គោលនៅខាងមុខផ្ទះគាត់ បណ្តាលឲ្យឆក់ជនរងគ្រោះធ្លាក់ពីលើដំបូលកម្ពស់៦ម៉ែត្រ មកដល់ដីស្លាប់ភ្លាមនៅនឹងកន្លែងកើតហេតុ។
ក្រោយពេលកើតហេតុ ម្ចាស់ផ្ទះបានរាយការណ៍ប្រាប់សមត្ថកិច្ច ឲ្យចុះមកពិនិត្យសព ហើយបញ្ជាក់ថា ជនរងគ្រោះពិតជាស្លាប់ដោយសារចរន្តអគ្គិសនីឆក់ពិតប្រាកដមែន។
បច្ចុប្បន្នសពត្រូវសមត្ថកិច្ចប្រគល់ឲ្យក្រុមគ្រួសារដើម្បីយកទៅចាត់ចែងធ្វើបុណ្យតាមប្រពៃណី៕
ចែករំលែកព័តមាននេះ