ខេត្តកណ្តាល ៖ បុរសម្នាក់សង្ស័យបែកថ្នាំ បានយកដុំថ្មដេញគប់ និងយកកាំបិតកាប់បំផ្លាញទ្រព្យសម្បត្តិអ្នកដទៃ ត្រូវនគរបាលក្រុងតាខ្មៅធ្វើការឃាត់ខ្លួនចាប់វាយខ្នោះ។ ហេតុការណ៍គួរអោយភ្ញាក់ផ្អើលនេះបានកើតឡើងនៅ ថ្ងៃទី១៩ កញ្ញា ២០១៨ វេលាម៉ោង១៦និង៣០នាទី នៅចំណុច ភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានអោយដឹងថា ជនរងគ្រោះក្នុងករណីនេះចំនួន២នាក់ ទី១-ឈ្មោះឃឹម សុភក្រា ភេទប្រុស អាយុ៣៤ឆ្នាំ មុខរបរមន្ត្រីក្រសួងផែនការ ទីលំនៅភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល និងទី២-ឈ្មោះសឿន សេងលី ភេទប្រុស អាយុ៤០ឆ្នាំ មុខរបររកស៊ីដឹកដី ទីលំនៅភូមិជ្រៃរយោង ឃុំកណ្តោក ស្រុកកណ្តាលស្ទឹង ខេត្តកណ្តាល ។ ចំណែកជនសង្ស័យឈ្មោះឈុន ធារ៉ា ភេទប្រុស អាយុ២៥ឆ្នាំ មុខរបរមិនពិតប្រាកដ ទីលំនៅភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល ។
លោកអធិការបានបញ្ជាក់ថា កាលពីវេលាកើតហេតុខាងលើ ពេលដែលជនរងគ្រោះទី១កំពុងតែលក់ដូរនៅក្នុងផ្ទះរបស់ខ្លួន ស្រាប់តែជនសង្ស័យបានជិះម៉ូតូមកឈប់នៅជិតទីនោះក្នុងសភាពបែកថ្នាំ រួចហើយបានដើរកាន់កាំបិតប៉័ងតោមកបបួលជនរងគ្រោះកាប់គ្នា តែជនរងគ្រោះមិនតបតទេ ក៏ស្រាប់តែជនសង្ស័យបានយកកាំបិតកាប់បំផ្លាញទ្រព្យសម្បត្តិរបស់ជនរងគ្រោះ ។
ប្រភពដដែលបានបន្តថា បន្ទាប់មក ជនសង្ស័យបានដើរចេញមកដល់ផ្លូវវិញបានឃើញរថយន្តរបស់ជនរងគ្រោះទី២ បើកមកដល់ភ្លាម ជនសង្ស័យបានកាន់កាំបិតឈរកាក់ពីមុខហើយបានកាប់ទៅលើគំរបម៉ាស៊ីនរថយន្តមួយកាំបិត និងបានយកដុំឥដ្ឋតាន់គប់ បណ្តាលឲ្យរថយន្តរងកាខូចខាត។
បន្ទាប់មកសមត្ថកិច្ចបានចុះអន្តរាគមន៍ធ្វើការឃាត់ ខ្លួនជនល្មើសរួមទាំងវត្ថុតាងបញ្ជូនមកកាន់អធិការដ្ឋាននគរបាលក្រុងតាខ្មៅដើម្បីបន្តចាត់ការតាមនីតិវិធី៕
ចែករំលែកព័តមាននេះ