ខេត្តរតនគិរី ៖ ឃ្លាំងកែច្នៃនិងស្តុកកៅស៊ូក្រែបមួយកន្លែង ត្រូវព្រះអគ្គីឆេះអស់ទាំងស្រុង ដោយសារចំហេះធ្លាយចេញពីឡចំហុយ ។ ហេតុការណ៍អគ្គិភ័យនេះ បានកើតឡើងនៅវេលាម៉ោង១០និង២០នាទីព្រឹកថ្ងៃទី១៨ កញ្ញា ស្ថិតនៅភូមិប៉ាឡែ ឃុំកិចុង ស្រុកបរកែវ ។
ប្រភពពីសមត្ថកិច្ចឱ្យដឹងថា ទីតាំងដែលត្រូវភើ្លងឆេះនោះ ជាឃ្លាំងកែច្នៃនិងស្តុកកៅស៊ូរបស់លោក ហ៊
នឿន ដែលបានជួលទៅឱ្យក្រុមហ៊ុន Cam Popular Plantation Co.TLD ជាក្រុមហុ៊នឥណ្ឌាផលិតកៅស៊ូក្រែប ។
ក្នុងហេតុការណ៍នេះ បណ្តាលឱ្យមានការខូចខាតទាំងស្រុង រួមមានឃ្លាំងធំមួយ ទំហំទទឹង៣០ម៉ែត្រ បណ្តោយ៤០ម៉ែត្រ ធ្វើអំពីបេតុងប្រក់សង្ក័សី ។ ចំណែកបន្ទប់ស្នាក់នៅរបស់កម្មករទំហំ១៥ម៉ែត្រ គុណ៤០ម៉ែត្រចំនួន១ខ្នង ស្មើ១០បន្ទប់ ធ្វើពីឈើប្រក់ស័ង្កសីឆេះពាក់កណ្តាល ។ ក្នុងនោះ មានគ្រែ៣ សាឡុង១ឈុត តុវែង៤សន្លឹក កៅស៊ូចំនួន១៤តោន និងឧបករណ៍ផលិតជ័រក្រែបផងដែរ ។ ទោះបីជាបែបនេះក្តី ពុំមានគ្រោះថ្នាក់ដល់មនុស្សណាម្នាក់ទេ ។
បានកត់សម្គាល់ថា ខណៈពេលភ្លើងកំពុងឆេះ ក៏មានរថយន្តពន្លត់អគ្គិភ័យរបស់អធិការដ្ឋានស្រុកអណ្តូងមាសមួយគ្រឿង មកជួយអន្តរាគមន៍ដែរ ប៉ុន្តែដូចជាចង្រៃពេក ពេលមកដល់កន្លែងកើតហេតុ ស្រាប់តែខូចប្រព័ន្ធ បញ្ជាមិនអាចប្រើការបានឡើយ ។
ជាមួយគ្នានោះ ក៏មានរថយន្តពន្លត់អគ្គិភ័យមួយគ្រឿង មកពីស្រុកបរកែវ ក៏មកជួយអន្តរាគមន៍ដែរ ដោយប្រើប្រាស់អស់ទឹក៦ជើង ។ ទោះជាបែបនេះក៏ដោយ ការឆេះកៅស៊ូមិនអាចពន្លត់បានតាមបំណងឡើយ គឺឆេះអស់ទាំងស្រុងតែម្តង ៕
ចែករំលែកព័តមាននេះ