រាជធានីភ្នំពេញ ៖ អាជ្ញាធរជាតិប្រយុទ្ធប្រឆាំងគ្រឿងញៀនបានអះអាងថា មូលដ្ឋានអាជីវកម្មមួយចំនួនងាយនឹងកើតមានបទល្មើសផ្សេងៗដូច្នេះសមត្ថកិច្ចនឹងចុះទៅធ្វើកិច្ចសន្យាជាមួយម្ចាស់អាជីវកម្ម ព្រមទាំងបិទសេចក្តីប្រកាសចំនួន២៣៩៨កន្លែង រាប់ទាំងផ្ទះសំណាក់ និងខុនដូរផងដែរ ដើម្បីអប់រំផ្សព្វផ្សាយ និងទប់ស្កាត់បញ្ហាគ្រឿងញៀន ។…
រាជធានីភ្នំពេញ ៖ អាជ្ញាធរជាតិប្រយុទ្ធប្រឆាំងគ្រឿងញៀនបានអះអាងថា មូលដ្ឋានអាជីវកម្មមួយចំនួនងាយនឹងកើតមានបទល្មើសផ្សេងៗដូច្នេះសមត្ថកិច្ចនឹងចុះទៅធ្វើកិច្ចសន្យាជាមួយម្ចាស់អាជីវកម្ម ព្រមទាំងបិទសេចក្តីប្រកាសចំនួន២៣៩៨កន្លែង រាប់ទាំងផ្ទះសំណាក់ និងខុនដូរផងដែរ ដើម្បីអប់រំផ្សព្វផ្សាយ និងទប់ស្កាត់បញ្ហាគ្រឿងញៀន ។
ក្នុងកិច្ចប្រជុំស្តីពីវិធានការលុបបំបាត់ការប្រើប្រាស់ និងការជួញដូរគ្រឿងញៀននៅសាលារាជធានីភ្នំពេញនាព្រឹកថ្ងៃទី២០ ខែកញ្ញា ឆ្នាំ២០១៨ លោកនាយឧត្តមសេនីយ៍ មាស វិរិទ្ធ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា ស្របពេលដែលរាជធានីភ្នំពេញក៏ដូចជានៅទូទាំងប្រទេសបញ្ហាគ្រឿងញៀននៅតែជាបញ្ហាស្មុគស្មាញនៅឡើយនោះសមត្ថកិច្ចគ្រប់ជំនាញ និងអាជ្ញាធរពាក់ព័ន្ធបានយកចិត្តទុកដាក់ណាស់ក្នុងការប្រយុទ្ធប្រឆាំងលើបញ្ហាគ្រឿងញៀនដោយបានដាក់ចេញជាផែនការសកម្មភាពជាបន្តបន្ទាប់ផងដែរ ។
ជាក់ស្តែងសម្រាប់ពេលនេះ អាជ្ញាធរ និងសមត្ថកិច្ចចម្រុះនឹងចុះត្រួតពិនិត្យលើបញ្ហាជួញដូរ និងការប្រើប្រាស់គ្រឿងញៀននៅតាមកន្លែងសប្បាយភាពប្រមាណ១០ទីតាំងក្នុងរាជធានីភ្នំពេញ ខណៈដែលទីតាំងទាំងនោះសមត្ថកិច្ច និងអាជ្ញាធរចូលមិនទាន់ដល់ ។
លោកបន្តថា ការបង្កើតឲ្យមានកិច្ចប្រជុំនេះក្នុងគោលបំណងដើម្បីឲ្យអាជ្ញាធរ និងសមត្ថកិច្ចពាក់ព័ន្ធអនុវត្តការងារប្រយុទ្ធប្រឆាំងគ្រឿងញៀនឲ្យកាន់តែល្អប្រសើរទៅតាមការណែនាំរបស់អាជ្ញាធរជាតិ ប្រយុទ្ធប្រឆាំងគ្រឿង សំដៅធ្វើយ៉ាងណារក្សាបរិស្ថានសន្តិសុខឲ្យបានល្អប្រសើរនៅក្នុងរាជធានីភ្នំពេញ និងមិនឲ្យមានការនាំចូលនូវរុក្ខជាតិញៀនក្នុងប្រទេសកម្ពុជាយើងផងដែរ ។
លោកនាយឧត្តមសេនីយ៍ មាស វិរិទ្ធ បានស្នើឲ្យសមត្ថកិច្ចមូលដ្ឋានទាំងអស់ត្រូវតែពង្រឹងមូលដ្ឋានរបស់ខ្លួនឡើងវិញ ដោយហេតុថា គ្រឿងញៀនវាបានហូរទៅដល់មូលដ្ឋានភូមិទៅហើយ ហើយការទប់ស្កាត់ការប្រើប្រាស់ និងជួញដូរគ្រឿងញៀន ដែលយើងមិនទាន់ចូលទៅដល់ ពិសេសក្លឹបកំសាន្ត និងទីកន្លែងសប្បាយ ដោយយើងបានកំណាត់ទីតាំងចំនួន១០កន្លែងរួចហើយ ដើម្បីធ្វើការត្រួតពិនិត្យជាពិសេសអាជ្ញាធរខណ្ឌ សង្កាត់ តែបើធ្វើមិនបានត្រូវរាយការណ៍មកអាជ្ញាធររាជធានីដើម្បីចាត់តាំងអនុវត្តការងារនេះបន្ត ។
លោកបន្តថា មូលដ្ឋានអាជីវកម្មងាយនឹងកើតបទល្មើសណាស់ ដូច្នេះយើងត្រូវចុះទៅធ្វើកិច្ចសន្យាជាមួយម្ចាស់អាជីវកម្មលើបញ្ហាគ្រឿងញៀននេះ ហើយយើងក៏នឹងធ្វើការបិទសេចក្តីប្រកាសចំនួន២៣៩៨កន្លែងផងដែរដែលមានទាំងផ្ទះសំណាក់ និងខុនដូរផងដែរ ។
អគ្គលេខាធិការដ្ឋាន អាជ្ញាធរជាតិ ប្រយុទ្ធប្រឆាំងគ្រឿងញៀន បានស្នើឲ្យអាជ្ញាធររាជធានីភ្នំពេញអនុវត្តឲ្យបានជាគំរូមុនគេ ជាពិសេសវិធានការចាប់ពិនិត្យមើលទឹកនោម ចំពោះប្រើប្រាស់ថ្នាំគ្រវី នៅតាមក្លឹបបន្ទាប់មកក្រុងព្រះសីហនុ និងសៀមរាបបើមានបញ្ហានៅកន្លែងណាអាជ្ញាធរនៅទីនោះជាអ្នកទទួលខុសត្រូវ តែបើទីតាំងណាធ្វើខុសពីការណែនាំយើងមានសិទ្ធិក្នុងការបិទទីតាំងនោះតែម្តង ។
ចំណែកនាយឧត្តមសេនីយ៍ ម៉ក់ ជីតូ អគ្គស្នងការងនរគបាលជាតិបានលើកឡើង និងជម្រុញឲ្យសមត្ថកិច្ចបន្តអនុវត្តធ្វើយ៉ាងណាឲ្យភូមិ-សង្កាត់មានសុវត្ថិភាព ស្របតាមការដាក់ចេញរបស់រាជរដ្ឋាភិបាល ។ ចំពោះការចុះពិនិត្យក្នុងក្លឹបនិងកន្លែងសប្បាយភាពនានាពាក់ព័ន្ធបញ្ហាគ្រឿងញៀននេះ បើយើងគិតពីទីតាំងនោះជារបស់នរណា យើងអនុវត្តការងារនេះមិនកើតនោះទេ គឺដាច់ខាតត្រូវតែអនុវត្តការងារនេះឲ្យបានល្អ ហើយបើមាននរណាមករារាំងយើងអនុវត្តតាមច្បាប់ ៕
ចែករំលែកព័តមាននេះ