រាជធានីភ្នំពេញ ៖ កម្លាំងសមត្ថកិច្ចផ្នែកគ្រឿងញៀនខណ្ឌដង្កោ នៅព្រឹកថ្ងៃទី១៩ កញ្ញា បានបញ្ជូនអតីតព្រះចៅអធិការវត្តកំពង់ក្តុល មាជ សុវណ្ណ ទៅអយ្យការអមសាលាដំបូងរាជធានីភ្នំពេញ ក្រោយពីបែកធ្លាយរឿងលួចលាក់មានស្នេហាជាមួយស្រីរហូតមានកូនម្នាក់ ហើយត្រូវបានផ្សឹកនិងបណ្តេញចេញពីវត្ត ពាក់ព័ន្ធករណីប្រើប្រាស់ដោយខុសច្បាប់នូវសារធាតុញៀន ក្រោយពិនិត្យទឹកនោមឃើញមានសារធាតុញៀន។
គួរបញ្ជាក់ថា កាលពីយប់ថ្ងៃទី១៧ កញ្ញា កន្លងមក ប្រជាពលរដ្ឋបានដាក់គ្នាតាមដានតាំងពីព្រលប់ រហូតដល់ម៉ោង៣ទៀបភ្លឺថ្ងៃទី១៨ កញ្ញា ក៏ឃើញព្រះសង្ឃអង្គនេះ ជិះម៉ូតូឌុបគ្នាជាមួយស្រីកំណាន់ចិត្តចេញ ពីផ្ទះឆ្ពោះ មកកាន់វត្តកំពង់ក្តុលវិញ ស្របពេលនោះ ប្រជាពលរដ្ឋ បាននាំគ្នាចាប់ព្រះសង្ឃ មាជ សុវណ្ណ នឹងស្រីកំណាន់ចិត្តប្រគល់ឲ្យសមត្ថកិច្ចខណ្ឌដង្កោ ។
ក្រោយពីប្រជាពលរដ្ឋតាមដានទាន់ នឹងមានភស្តតាងជាក់ស្តែង ចំពោះទង្វើប្រាស់ចាកពីធម៌ព្រះពុទ្ធ មាជ សុវណ្ណ ត្រូវសមត្ថកិច្ចសម្រេចឃាត់ខ្លួនប្រគល់ ឱ្យអនុគុណ និងមន្ត្រីធម្មការខណ្ឌដង្កោបន្តនីតិវិធីទៅតាមច្បាប់វិន័យព្រះពុទ្ធសាសនា ។
សមត្ថកិច្ចឱ្យដឹងថា ជុំវិញករណីខាងលើនេះ ព្រះចៅអធិការវត្តកំពងក្តុល មាជ សុវណ្ណ បានមានសង្ឃដីកាសារភាពថា «ព្រះអង្គពិតជាបានប្រព្រឹត្ត នៅទង្វើបែបនេះមែន ហើយព្រះអង្គក៏សុំទោសដល់ពុទ្ធបរិស័ទទាំងអស់ ដោយព្រះអង្គសម្រេចផ្សឹកលាចាកសិក្ខាបទពីព្រះពុទ្ធសាសនា ទៅរស់នៅធម្មតាដូចពលរដ្ឋ
ទូទៅវិញ» ។
លោកវរសេនីយ៍ឯក ជឹម ស៊ីថា អធិការខណ្ឌដង្កោបានបញ្ជាក់ដែរថា ទោះបីយ៉ាងណាក៏ដោយ សមត្ថ
កិច្ចនៅតែសម្រេចឃាត់ខ្លួនបុគ្គលមាជ សុវណ្ណ នេះ បញ្ជូនទៅកាន់អធិការដ្ឋាននគរបាលខណ្ឌដង្កោ ដើម្បីកសាងសំណុំរឿងបញ្ជូនទៅតុលាការ បន្តនីតិវិធី ព្រោះបានពិនិត្យឃើញថា បុគ្គលនេះពាក់ព័ន្ធប្រើប្រាស់
នូវសារធាតុញៀន ។
ចែករំលែកព័តមាននេះ