ខេត្តមណ្ឌលគិរី ៖ កិច្ចប្រជុំផ្សព្វផ្សាយស្តីពីការពង្រឹងអនុវត្តខ្លឹមសារប្រកាសលេខ០៤៨ ក.ជ.អ.ជ ស្តីពីកាផលិត ការប្រើប្រាស់ទឹកត្រី ទឹកស៊ីអ៊ីវមានជាតិដែក និងសារៈសំខាន់នៃការប្រើប្រាស់ទឹកត្រី ទឹកស៊ីអ៊ីវមានជាតិដែក ក្រោមអធិបតីលោក…
ខេត្តមណ្ឌលគិរី ៖ កិច្ចប្រជុំផ្សព្វផ្សាយស្តីពីការពង្រឹងអនុវត្តខ្លឹមសារប្រកាសលេខ០៤៨ ក.ជ.អ.ជ ស្តីពីកាផលិត ការប្រើប្រាស់ទឹកត្រី ទឹកស៊ីអ៊ីវមានជាតិដែក និងសារៈសំខាន់នៃការប្រើប្រាស់ទឹកត្រី ទឹកស៊ីអ៊ីវមានជាតិដែក ក្រោមអធិបតីលោក វ៉ា សុផល អគ្គនាយរងផែនការ នៃក្រសួងផែនការ, លោក លី សាមិ សមាជិកក្រុមប្រឹក្សាខេត្ត, លោក ឈឹម កាន អភិបាលរងខេត្ត ព្រមទាំងមានការចូលរួមពីសំណាក់លោក លោកស្រីប្រធាន អនុប្រធានមន្ទីរអង្គភាពជុំវិញខេត្ត អភិបាលក្រុង កងកម្លាំងទាំងបី និងអង្គការស្ថាប័នប្រមាណជា១០០នាក់ ដែលប្រព្រឹត្តទៅនៅផ្ទះសំណាក់ពេជ្រដា ស្ថិតនៅក្រុងសែនមនោរម្យ ខេត្តមណ្ឌលគិរី នាព្រឹកថ្ងៃទី១៩ ខែកញ្ញា ឆ្នាំ២០១៨ ។
លោក វ៉ា សុផល អគ្គនាយករងផែនការបានលើកឡើងក្នុងគោលបំណងដើម្បីរំលឹក និងពង្រឹងឡើងវិញនូវគោលដៅ និងយុទ្ធសាស្ត្រ នៃការអនុវត្តខ្លឹមសារប្រកាសលេខ០៤៨ ក.ជ.អ.ជ ស្តីពីការផលិត ការប្រើប្រាស់ទឹកត្រី ទឹកស៊ីអ៊ីវមានជាតិដែក និងពង្រឹងការអនុវត្តស្តង់ដា សម្រាប់ទឹកត្រី ទឹកស៊ីអ៊ីវ ជាពិសេសការចរាចរ និងការនាំចូលទឹកត្រី ទឹកស៊ីអ៊ីវគ្មានជាតិដែក មកក្នុងប្រទេសកម្ពុជា ក៏ដូចជាធ្វើយ៉ាងណារក្សាឱ្យបាននូវចីរភាព នៃកម្មវិធីបញ្ចូលជាតិដែកក្នុងទឹកត្រី ទឹកស៊ីអ៊ីវ ក្នុងព្រះរាជាណាចក្រកម្ពុជា ។
លោកបានណែនាំដល់គ្រប់មន្ទីរស្ថាប័ន អង្គការដៃគូ ជាពិសេសផលិតករ អាជីវករ និងប្រជាពលរដ្ឋទាំងអស់ សូមដាក់លក់ និងប្រើប្រាស់ទឹកត្រី ទឹកស៊ីអ៊ីវ មានបិទស្លាកនៅលើសំបកដប ដែលទទួលស្គាល់ដោយគណៈកម្មាធិការជាតិបញ្ចូលមីក្រូសារជាតិក្នុងចំនីនៅកម្ពុជាដើម្បីការពារ និងកាត់បន្ថយភាពស្លេកស្លាំង ។
លោក ឈឹម កាន អភិបាលរងខេត្តមណ្ឌលគិរីបានគាំទ្រទាំងស្រុងចំពោះអគ្គនាយកដ្ឋានផែនការ នៃក្រសួងផែនការ ដែលបានបើកកិច្ចប្រជុំដ៏មានសារៈសំខាន់នៅខេត្តមណ្ឌលគិរីនាពេលនេះ ដើម្បីឱ្យអង្គភាពស្ថាប័ន អាជីវករ និងប្រជាពលរដ្ឋនៅក្នុងខេត្ត មានការយល់ដឹង និងគុណប្រយោជន៍ អំពីការប្រើប្រាស់ទឹកត្រី ទឹកស៊ីអ៊ីវ មានជាតិដែកនេះផងដែរ ។
សូមបញ្ជាក់ថា លទ្ធផលនៃការអង្កេតប្រជាសាស្ត្រ និងសុខភាពកម្ពុជាឆ្នាំ២០១៤ បានបង្ហាញឱ្យឃើញថាភាពស្លេកស្លាំង ក្នុងចំណោមកុមារអាយុក្រោម៥ឆ្នាំ មាន៥៥,៥% និងស្ត្រីក្នុងវ័យបន្តពូជ ចាប់ពីអាយុ១៥-៤៩ឆ្នាំ មាន៤៥,៤%។ ដោយឡែកនៅខេត្តមណ្ឌលគិរី ភាពស្លេកស្លាំង ក្នុងចំណោម កុមារអាយុក្រោម ៥ឆ្នាំ មាន៥៨% និងស្ត្រីក្នុងវ័យបន្តពូជ ចាប់ពីអាយុ១៥-៤៩ឆ្នាំ មាន៤២% ៕
ចែករំលែកព័តមាននេះ