យោងតាមរបាយការណ៍របស់ Newzoo បានឲ្យដឹងថា ក្រុមហ៊ុនស្មាតហ្វូនកូរ៉េខាងត្បូង Samsung កំពុងតែឈ្នះ Apple ក្នុងផ្នែកលក់ស្មាតហ្វូននៅទូទាំងពិភពលោក ខណៈដែលក្រុមហ៊ុនចិនដូចជា Xiaomi, Oppo និង Huawei កំពុងតែតាមទាន់បន្តិចម្តងៗ ។
របាយការណ៍នេះប្រាប់មកថា ៖« ជុំវិញពិភពលោកមានស្មាតហ្វូនចំនួន៣,៦ប៊ីលានគ្រឿងកំពុងត្រូវបានប្រើប្រាស់គិតត្រឹមខែមិថុនាឆ្នាំ២០១៨ ។ យីហោស្មាតហ្វូនដែលមានប្រជាប្រិយភាពជាងគេគឺ Samsung ដែលមាន៨៩៣លានគ្រឿងកំពុងត្រូវបានប្រើប្រាស់ និងអាចគ្រប់គ្រងទីផ្សារបាន២៧%។ Apple ស្ថិតនៅចំណាត់ថ្នាក់លេខពីរដែលគ្រប់គ្រងទីផ្សារបាន ២៤% »។
« ភាពនាំមុខរបស់ Samsung គឺភាគច្រើនមកពីជម្រើសនៃទូរស័ព្ទមានតម្លៃទាបដែលដំណើរការបានល្អក្នុងទីផ្សារកំពុងអភិវឌ្ឍន៍ដូចជាឥណ្ឌាជាដើម ។ ក្រុមហ៊ុនផលិតចិន Oppo, Xiaomi, Huawei និង vivo ជាប់ចំណាត់ថ្នាក់លេខ៣, ៤, ៥ និង៦ រៀងគ្នា ។ ក្រុមហ៊ុនចិនទាំងបួននេះស្មើ១ភាគ៣នៃស្មាតហ្វូនដែលកំពុងត្រូវបានប្រើប្រាស់ »។
Apple បានផ្តោតលើទីផ្សារស្មាតហ្វូនតម្លៃខ្ពស់ដែលសប្តាហ៍មុនថែមទាំងប្រកាសពី iPhone XR មានតម្លៃចាប់ពី ៧៤៩ដុល្លារ និង iPhone XS និង XS Max ដែលមានតម្លៃចាប់ពី ៩៩៩ដុល្លារ និង ១.០៩៩ដុល្លារជាដើម ។
ផ្ទុយមកវិញ Samsung និងក្រុមហ៊ុនស្មាតហ្វូនចិនផ្តោតសំខាន់លើទីផ្សារស្មាតហ្វូនតម្លៃទាបវិញ ។ ឧទាហរណ៍ដូចជា ស្មាតហ្វូនរបស់ Xiaomi ជាដើមដែលមានតម្លៃស្មើពាក់កណ្តាលនៃស្មាតហ្វូនថ្មីៗរបស់ Apple ។
ប៉ុន្តែ តម្លៃក្នុងទីផ្សារនេះងាយនឹងប្រែប្រួលដែលបង្កឲ្យតម្លៃងាយធ្លាក់ចុះនិងប៉ះពាល់ដល់ប្រាក់ចំណេញក្រុមហ៊ុន ។ ដូច្នេះ ក្រុមហ៊ុនស្មាតហ្វូនកូរ៉េ និងចិន អាចនឹងឈ្នះក្នុងផ្នែកចំនួនលក់ ប៉ុន្តែចាញ់ក្នុងផ្នែកប្រាក់ចំណូលវិញ ៕
ចែករំលែកព័តមាននេះ