ខេត្តស្ទឹងត្រែង ៖ មន្ត្រីបរិស្ថានចំនួន៨៥នាក់ ទទួលបានការបណ្តុះបណ្តាល ដើម្បីតម្រង់ទិសស្តីពីការកសាងប្រសិទ្ធិភាពនៃការអនុវត្តច្បាប់ការកសាងសំណុំរឿងបទល្មើសធនធានធម្មជាតិ និងនីតិវិធីក្រមព្រហ្មទណ្ឌដែលពាក់ព័ន្ធទៅនឹងបទល្មើសធនធានធម្មជាតិនៅសាលាខេត្តស្ទឹងត្រែង ដោយមានរយៈ៤ថ្ងៃ ចាប់បីថ្ងៃទី១៨ ដល់ថ្ងៃទី២១ ខែកញ្ញា ឆ្នាំ២០១៨ ។
ការបង្កើតឲ្យវគ្គបណ្តុះបណ្តាលនេះឡើង គឺក្នុងគោលបំណងបង្កើនការយល់ដឹងពាក់ព័ន្ធការអនុវត្តច្បាប់បទដ្ឋានគតិយុត្តនានា ដើម្បីយកទៅអនុវត្តក្នុងកិច្ចការងារ និងសិទ្ធិដែលបានកំណត់នៅក្នុងច្បាប់ស្តីពីការការពារធនធានធម្មជាតិឲ្យមានប្រសិទ្ធិភាព ។ វគ្គបណ្តុះបណ្តាលនេះដែរដំណើរការទៅក្រោមការចូលរួមពីលោក ដួង ពៅ អភិបាលរងខេត្តស្ទឹងត្រែងលោក ទឹម ស៊ីផា អគ្គនាយករងនៃអគ្គនាយដ្ឋានរដ្ឋបាលការពារ និងអភិរក្សធម្មជាតិ ក្រសួងបរិស្ថាន និងលោក អេង ភិរុង ប្រធានមន្ទីរបរិស្ថានខេត្តស្ទឹងត្រែង ។
លោក ទឹម ស៊ីផា អគ្គនាយករងនៃអគ្គនាយដ្ឋានរដ្ឋបាលការពារ និងអភិរក្សធម្មជាតិនៃក្រសួងបរិស្ថានបានលើកឡើងថា ការបណ្តុះបណ្តាលនេះ ពិតជាមានសារៈសំខាន់ខ្លាំងណាស់ពិសេសចំពោះមន្ត្រីបរិស្ថានដែលជាអ្នកអនុវត្តការងារ និងជាអ្នកការពារធនធានធម្មជាតិដែលត្រូវតែយល់ដឹងឲ្យបានច្បាស់ពាក់ព័ន្ធការកសាងសំណុំរឿងនីតិវិធីក្រមព្រហ្មទណ្ឌ ដែលពាក់ព័ន្ធនឹងបទល្មើសធនធានធម្មជាតិ ។ លោកបន្តថា វគ្គនេះ និងបន្ថែមនូវចំណេះដឹងពាក់ព័ន្ធ និងសិទ្ធិតួនាទីរបស់មន្ត្រីបរិស្ថានដែលបានកំណត់នៅក្នុងច្បាប់ ដើម្បីឲ្យមន្ត្រីបរិស្ថានអនុវត្តឲ្យចំគោលដៅ និងមានប្រសិទ្ធិភាពខ្ពស់ ពីលើការងារដែលមន្ត្រីបរិស្ថានបាន និងកំពុងអនុវត្តស្រាប់ ។ លោកបន្ថែមថា បន្ទាប់ពីសិក្សាវគ្គបណ្តុះបណ្តាលនេះចប់ អាចឲ្យមន្ត្រីឧទ្យានុរក្ស និងមន្ត្រីបរិស្ថានអាចឈានទៅរកការកសាងសំណុំរឿងបានប្រកបដោយភាពត្រឹមត្រូវ និងអាចទទួលយកបាន ជាពិសេសស្ថាប័នអយ្យការ និងស្ថាប័នតុលាកា ។
លោកដួង ពៅ អភិបាលរងខេត្តស្ទឹងត្រែងបានបង្ហាញការគាំទ្រ ចំពោះក្រសួងបរិស្ថានដែលបានសហការគ្នាជាមួយមន្ទីរបរិស្ថាន និងអង្គការដៃគូនានាសម្រាប់បង្កើតវគ្គបណ្តុះបណ្តាលនេះឡើង ព្រោះការបណ្តុះបណ្តាលនេះវាមានការពាក់ព័ន្ធ និងច្បាប់បទដ្ឋានគតិយុត្តនានាក្នុងការការពារបរិស្ថានការការពារធនធានធម្មជាតិដែលរាជរដ្ឋាភិបាលកម្ពុជាកំពុងយកចិត្តទុកដាក់ខ្លាំងលើកិច្ចការងារគាំពារ និងអភិរក្សធនធានធម្មជាតិ ជីវៈជម្រុះ ។ លោកអភិបាលរងបន្ថែមថា ម្យ៉ាងទៀតដោយសារខេត្តស្ទឹងត្រែងជាខេត្តដែលមានតំបន់ការពារធនធានធម្មជាតិច្រើនដូចនេះ មន្ត្រីបរិស្ថាន និងឧទ្យានុរក្សាមានភារកិច្ចធំធេងណាស់ក្នុងការការពារធនធានធម្មជាតិឲ្យនៅបានគង់វង្ស ។ លោកថា ដោយមន្ត្រីឧទ្យានុរក្ស និងមន្ត្រីបរិស្ថានសមត្ថភាពនៅមានកម្រិតដូច្នេះ ការរៀបចំវគ្គបណ្តុះបណ្តាលវគ្គនេះ ពិតជា និងផ្តល់ផលប្រយោជន៍ និងពង្រឹងចំណេះដឹងដល់មន្ត្រីទាំងអស់ឲ្យកាន់តែមានការយល់ដឹងបន្ថែមទៀត ។ ទន្ទឹមនិងនេះលោកបានណែនាំដល់សិក្ខាកាមទាំងអស់ ត្រូវតែយកចិត្តទុកដាក់ឲ្យបានខ្លាំងក្លាផងដែរ ចំពោះការសិក្សាបណ្តុះបណ្តាលនេះ ដើម្បីយកទៅប្រើប្រាស់ឲ្យមានប្រសិទ្ធភាពផងដែរ ។
គួរបញ្ជាក់ថា ក្នុងរបាយការណ៍របស់មន្ទីរបរិស្ថានខេត្តស្ទឹងត្រែងបានបង្ហាញថា ខេត្តស្ទឹងត្រែងមានតំបន់ការពារធនធានធម្មជាតិចំនួន៧កន្លែង ក្នុងនោះមានតំបន់រ៉ាមសារ តំបន់ការពារឧទ្យានជាតិវិរៈជ័យឧទ្យានជាតិវើនសៃ សៀមប៉ាង ដែនជម្រកសត្វព្រៃសៀមប៉ាង ដែកជម្រកសត្វព្រៃឆែប និងដែនជម្រកសត្វព្រៃ-ព្រៃឡង់ ៕
ចែករំលែកព័តមាននេះ