ខេត្តកំពង់ឆ្នាំង ៖ ប្រជាពលរដ្ឋជាច្រើនគ្រួសាររស់នៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង នៅចំណុចផ្លូវបែកជា៣ ជាអក្សតេជិតដំរីសបានត្អូញត្អែរពីការរស់នៅដោយលំបាករបស់ពួកគាត់ ព្រោះតែបញ្ហាស្ទះលូ បណ្ដាលឲ្យទឹកសំអុយហូរឡើងមកលើ ចេញមកក្រៅពេញលើផ្លូវថ្នល់ដក់ជាប្រចាំ និងមានរយៈពេលជាង២ឆ្នាំមកហើយ ។ ពួកគាត់សំណូមពរដល់មន្ទីរពាក់ព័ន្ធ និងអាជ្ញាធរខេត្តជួយដោះស្រាយបញ្ហានេះជូនពួកគាត់ផង ។
ប្រជាពលរដ្ឋរស់នៅចំណុចផ្លូវលេខស្ទះលូខាងលើបាននិយាយឲ្យដឹងថា ប្រព័ន្ធលូបង្ហូរនៅចំណុចផ្លូវរាងអក្សរតេ គឺបានខូចខាតទាំងស្រុង មានរយៈពេលជាង២ឆ្នាំហើយមិនទាន់ឃើញ មន្ត្រីជំនាញអាជ្ញាធរចុះទៅពិនិត្យមើលឡើយ ដែលជាហេតុបណ្ដាលឲ្យពួកគាត់ទ្រាំរស់ដោយលំបាកយូរណាស់ឆ្នាំណាស់មកហើយ ។ ពួកគាត់បានបញ្ជាក់ថា បើមានភ្លៀងម្ដងៗទឹកស្អុយ បានហូរចេញជន់លិចឡើងពេញលើផ្លូវធ្វើឲ្យប៉ះពាល់ដល់សុខភាពប្រជាពលរដ្ឋផង ធ្វើឲ្យមានការខូចខាតផ្លូវថ្នល់កៅស៊ូក្នុងខេត្តផង និងជួបការលំបាកក្នុងធ្វើដំណើរផងដែរព្រោះតែទឹកហូរបានដក់លើផ្លូវជាប្រចាំ ។
ពួកគាត់បានលើកឡើង ថា រយៈពេល២ឆ្នាំកន្លងទៅនេះ បន្ទាប់ពីលូបង្ហូរទឹកបានស្ទះមិនអាច ហូរទឹកបាន ទឹកបានដក់ក្លាយជាទឹកស្អុយកើតជាមូសខាំកូនចៅកើតរោគា ចូលមន្ទីរពេទ្យញឹកញាប់ ។ ហេតុនេះហើយពួកគាត់ទាំងអស់គ្នាសូមសំណូមពរ ដល់មន្ទីរសាធារណៈការ និងដឹកជញ្ជូនខេត្តកំពង់ឆ្នាំង ពិសេសឯកឧត្តម អភិបាលខេត្ត សូមមេត្តាជួយស្ដាប្រព័ន្ធលូបង្ហូរទឹកនៅចំណុចផ្លូវខាងលើនេះ ដើម្បីសម្រួលចរាចរណ៍ផ្លូវទឹកកុំឲ្យស្ទះ បណ្ដាលឲ្យលិចលង់ខូចទាំងប្រព័ន្ធផ្លូវថ្នល់ និងប៉ះពាល់ដល់សុខភាពប្រជាពលរដ្ឋទៀតផង ។
សូមបញ្ជាក់ថា ប្រព័ន្ធលូបង្ហូរទឹកខាងលើ គឺបានហូរចាក់ពីចំណុចខ្នងទួលក្នុងភូមិទួលក្រឡាញ់ រួចធ្លាក់មុខចុងភូមិខាងត្បូងនៅចំណុចផ្លូវអក្សរតេ ហើយទឹកត្រូវហូរធ្លាក់ចុះទៅចំណុចដំរីស កាត់ថ្នល់ជាតិ៥ រួចបន្តហូរចុះទៅក្រោមទៀត ៕
ចែករំលែកព័តមាននេះ