រាជធានីភ្នំពេញ ៖ ទោះបីមានការលើកបដាតវ៉ាពីសំណាក់គ្រូ និងសិស្សនៃវិទ្យាល័យព្រះស៊ីសុវត្ថិ តាំងពីថ្ងៃទី១៨ ដល់ទី១៩ កញ្ញាក្តី កម្មវិធីដែលបានគ្រោងប្រកាសជាផ្លូវការនូវសមាសភាពគណៈគ្រប់គ្រងបណ្តោះ អាសន្នវិទ្យាល័យ និងការផ្ទេរនាយកវិទ្យាល័យ…
រាជធានីភ្នំពេញ ៖ ទោះបីមានការលើកបដាតវ៉ាពីសំណាក់គ្រូ និងសិស្សនៃវិទ្យាល័យព្រះស៊ីសុវត្ថិ តាំងពីថ្ងៃទី១៨ ដល់ទី១៩ កញ្ញាក្តី កម្មវិធីដែលបានគ្រោងប្រកាសជាផ្លូវការនូវសមាសភាពគណៈគ្រប់គ្រងបណ្តោះ អាសន្នវិទ្យាល័យ និងការផ្ទេរនាយកវិទ្យាល័យ ទៅបំពេញការងារនៅក្រសួងនៅតែដំណើរការ ខណៈគ្រូនិងសិស្សមួយចំនួន បន្តឈរលើកបដាតវ៉ានៅមុខខ្លោងទ្វារវិទ្យាល័យក៏ដោយ ។
តាមសមាសភាពដែលត្រូវបានប្រកាស នៅព្រឹកថ្ងៃទី១៩ កញ្ញា បានបង្ហាញថា លោក អ៊ុក សម្បត្តិ អនុ ប្រធានមន្ទីរអប់រំ យុវជននិងកីឡា រាជធានីភ្នំពេញ ត្រូវបានចាត់តាំងឲ្យធ្វើជាប្រធានគណៈគ្រប់គ្រងបណ្តោះអាសន្ន នៅវិទ្យាល័យព្រះសុីសុវត្ថិជំនួសលោក មូល ស៊ុយហេង នាយកវិទ្យាល័យដែលគ្រូនិងសិស្សមួយចំនួនបានទាមទារឱ្យលោកបន្តធ្វើជានាយកវិទ្យាល័យបន្ត ។
មន្ត្រីការិយាល័យអប់រំយុវជននិងកីឡាខណ្ឌដូនពេញបានឲ្យដឹងថា កម្មវិធីនេះស្ថិតក្រោមអធិបតីភាពលោក ជ័យ សារិន អគ្គាធិការនៃអគ្គាធិ ការ ដ្ឋានក្រសួងអប់រំយុវជន និងកីឡា តំណាងលោករដ្ឋមន្ត្រីហង់ ជួន ណារ៉ុន ដែលមានកិច្ចការបន្ទាន់នៅក្រសួង ដែលមិនអាចឱ្យលោកមានវត្តមាននៅក្នុងកម្មវិធីដែលព្រាងទុកនេះ ។
យោងតាមលិខិតបង្គាប់ការចុះថ្ងៃទី១២ កញ្ញា របស់លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ គឺវិទ្យាល័យព្រះស៊ីសុវត្ថិ ត្រូវផ្លាស់ប្តូរសមាសភាពថ្នាក់ដឹកនាំថ្មីរបស់ខ្លួនជា បណ្តោះ អាសន្ន គឺលោក អ៊ុក សម្បត្តិ ដែលជាអនុប្រធានមន្ទីរអប់រំ ទទួលបន្ទុកធ្វើជាប្រធានគណៈគ្រប់គ្រងបណ្តោះ អាសន្ននៅវិទ្យាល័យព្រះស៊ីសុវត្ថិ ដោយមានអនុប្រធាន៣រូប និងសមាជិក៥រូបទៀត ។
មន្ត្រីដដែលបានបញ្ជាក់ថា អនុប្រធានគណៈគ្រប់គ្រងបណ្តោះអាសន្ននៅវិទ្យាល័យព្រះស៊ីសុវត្ថិ រួមមាន លោក ហ៊ាង ឡាឌី ប្រធានការិយាល័យមធ្យមសិក្សាមន្ទីរអប់រំ យុវជននិងកីឡា លោក ហេង លេង ប្រធានការិយាល័យអប់រំខណ្ឌដូនពេញ និងលោក សម កំសាន្ត នាយករងវិទ្យាល័យព្រះស៊ីសុវត្ថិ ។ រីឯសមាជិកគណៈកម្មការសុទ្ធតែជានាយករងវិទ្យាល័យព្រះស៊ីសុវត្ថិផ្ទាល់ ដែលក្នុងនោះមានលោកស្រី ម៉ក់ ដានី លោកស្រី ទ្រី វ៉ិច លោក ហួត ស៊ាងហៃ លោក ស៊ិន ដារ៉ាស៊ី និងលោក អុីវ សៅសុខា ។
ចំពោះលោក មូល ស៊ុយហេង ដែលជានាយកវិទ្យាល័យព្រះសុីសុវត្ថិត្រូវបានក្រសួងអប់រំយុវជននិងកីឡាផ្ទេរទៅបម្រើការនៅនាយកដ្ឋានមធ្យមសិក្សាចំណេះទូទៅ និងបច្ចេកទេសវិញ ។ រយៈពេលពីរថ្ងៃហើយដែលលោកគ្រូ អ្នកគ្រូនិងសិស្សានុសិស្សមួយចំនួនដែលនាំគ្នាធ្វើកូដកម្មលើកបដានៅមុខវិទ្យាល័យនោះ គឺគោលបំណងតវ៉ា ចង់ឱ្យក្រសួងអប់រំយុវជននិងកីឡារក្សាតំណែងលោក មូល ស៊ុយហេង បន្តជានាយកដដែល និងទាមទារឱ្យដកសាលាជំនាន់ថ្មី ចេញពីវិទ្យាល័យព្រះស៊ីសុវត្ថិដាច់ខាតតែម្ដង ។
ក្រុមគ្រូបង្រៀន បានសរសេរលើបដា នូវពាក្យពេចន៍ជាច្រើន ហើយក្នុងនោះ មានទាំងការលើកឡើងថា ការបង្កើតសាលាជំនាន់ថ្មីក្នុងវិទ្យាល័យព្រះស៊ីសុវត្ថិ គឺធ្វើឱ្យបាត់បង់បេតិកភណ្ឌជាតិ ។ ការបង្កើតសាលាក្នុងសាលា គឺប្រៀបដូចជាបង្កើតរដ្ឋនៅក្នុងរដ្ឋ ។ ក្រៅពីតវ៉ានឹងការបង្កើតសាលាជំនាន់ថ្មីក្នុងវិទ្យាល័យព្រះស៊ីសុវត្ថិ ក្រុមគ្រូបង្រៀន ក៏បានប្រឆាំងនឹងការដកលោក មួល ស៊ុយហេង ចេញពីតំណែងនាយកវិទ្យាល័យព្រះស៊ីសុវត្ថិផងដែរ ។
ផ្ទុយពីការជំទាស់តវ៉ាមន្ត្រីមន្ទីរអប់រំបានបញ្ជាក់ថា គម្រោងសាលាជំនាន់ថ្មី ត្រូវបានរៀបចំឡើងដើម្បីកសាងសមត្ថភាពជំនាញរបស់សិស្សឲ្យសមស្របតាមការសិក្សារៀនសូត្រក្នុងសតវត្សរ៍ទី២១ ជាពិសេសលើជំនាញគីមីវិទ្យា រូបវិទ្យា ជីវវិទ្យា និងបច្ចេកវិទ្យា តែលោកគ្រូ អ្នកគ្រូមួយចំនួនដែលតវ៉ា បានមើលឃើញថា ការបង្កើតគម្រោងនេះ បង្កឲ្យមានការរើសអើង ជាពិសេសការមើលងាយសមត្ថភាពគ្រូចាស់ៗ ទៅវិញទេ ។ មានការពន្យល់ថា សាលាជំនាន់ថ្មី (New Generation School) ហៅកាត់ NGS មិនមែនជាសាលាឯកជនដូចអ្នកខ្លះលើកឡើងនោះទេ តែជាសាលារបស់រដ្ឋ ដែលបង្រៀនផ្តោតលើជំនាញតម្រង់ទិសដ៏ពិសេសខុសពីសាលារដ្ឋធម្មតាដែលលោករដ្ឋមន្ត្រីអប់រំបច្ចុប្បន្នបានគាំទ្រយ៉ាងខ្លាំង ។
វាជាថ្នាលបណ្តុះបណ្តាលថ្មីបែបទំនើប គឺសិស្សសិក្សាព្រឹកល្ងាចពី៧ទៅ៨ម៉ោង ក្នុង១ថ្ងៃ ហើយគ្មានការបង្រៀនគួឡើយ ។ សាលានេះមានវិន័យតឹងរឹងដូចសាលាឯកជន ហើយផ្តោតជាសំខាន់លើជំនាញតម្រង់ទិស STEM (Science វិទ្យាសាស្ត្រ Technology បច្ចេកវិទ្យា Engineering វិស្វកម្ម Maths គណិតវិទ្យា) ដែលជាកម្មវិធីសិក្សាមកពីអាមេរិក ។សាលានេះមិនតម្រូវឱ្យសិស្សបង់ថ្លៃសិក្សាដូចសាលាឯកជនទេ តែវាជាការបង់បដិភាគឧបត្ថម្ភគ្រូ និងការចំណាយផ្សេងៗក្នុងមួយឆ្នាំមានក្រោម១០០ដុល្លារ ១០០ដុល្លារ ២០០ ដុល្លារ និង៣០០ដុល្លារ ។ សម្រាប់អ្នកក្រពិតប្រាកដរៀនដោយមិនចាំបាច់បង់បដិភាគ។មិនថាកូនអ្នកមាន ឬកូនអ្នកក្រ ត្រូវឆ្លងកាត់ការប្រឡងដ៏តឹងរឹងស្មើភាព ប្រឡងជាប់ ទើបមានសិទ្ធិបង់បដិភាគជាក្រោយ ។
សាលាជំនាន់ថ្មី បាននិងកំពុងដំណើរការយ៉ាងរលូន នៅលើទឹកដីខេត្តស្វាយរៀង ក្នុងអនុវិទ្យាល័យ គោកព្រីងដោយទទួលបានការពេញចិត្តរៀន និងបង្រៀនពីសិស្សានុសិស្ស និងលោកគ្រូ អ្នកគ្រូ ដោយសាលាជំនាន់ថ្មីនេះមានការគាំទ្រពីអង្គការជាតិ-អន្តរជាតិមួយចំនួន ។ ក្រៅពីនេះគម្រោងសាលាជំនាន់ថ្មីនេះ ក៏កំពុងដាក់អោយដំណើរការជាបន្តបន្ទាប់តាមសាលាមួយចំនួនក្នុងប្រទេសផងដែរ ដែលជា គោល នយោ បាយរបស់រាជរដ្ឋាភិបាលអភិវឌ្ឍវិស័យអប់រំ ។ សាលាជំនាន់ថ្មី មានការរៀបចំបង្ហាញភាពពិតជាក់ស្តែងដល់សិស្សមានន័យថា រៀនទ្រឹស្តីហើយ គឺអនុវត្តផ្ទាល់តែម្តង ។ ជាងនេះគេមានតាំងបង្ហាញពីរបៀបអនុវត្តផ្សេងៗ ដើម្បីឲ្យបានដល់គោលដៅ ឧទាហរណ៍៖ ដើម្បីបូមទឹកឡើងលើភ្នំ តើគេត្រូវប្រើមធ្យោបាយយ៉ាងណា ?
សាលាជំនាន់ថ្មី ក៏មានការផ្លាស់ប្តូរបទពិសោធគ្នារវាងអ្នកមានបទពិសោធល្អៗ មកធ្វើការចែករំលែកដល់សិស្សានុសិស្ស តាមរយៈសិក្ខាសាលានានា ។ អ្វីដែលកាន់តែពិសេសទៀត គឺការរៀបចំ ការតាំងការអនុវត្តជាក់ស្តែង ពិតជាបានធ្វើឲ្យសិស្សានុសិស្ស មានអារម្មណ៍រៀនសូត្រជាងធម្មតា ។ ឯលោកគ្រូ អ្នកគ្រូក៏មានទឹកចិត្តបង្រៀនដល់សិស្សយ៉ាងខ្លាំងក្លា ដោយសារតែមានការលើកទឹកចិត្តផ្តល់ប្រាក់ឧបត្ថម្ភសមរម្យ ផងដែរ ៕
ចែករំលែកព័តមាននេះ