ខេត្តព្រះសីហនុ ៖ ក្នុងរយៈពេល២៤ម៉ោង បន្ទាប់ពីលោកឧបនាយករដ្ឋមន្ត្រី ជា សុផារ៉ា បានចុះបញ្ជាផ្ទាល់ក្នុងយុទ្ធនាការរំដោះចំណីឆ្នេរ ស្ថិតក្នុងឃុំអូត្រេះ ស្រុកស្ទឹងហាវ ខេត្តព្រះសីហនុមកវិញ…
ខេត្តព្រះសីហនុ ៖ ក្នុងរយៈពេល២៤ម៉ោង បន្ទាប់ពីលោកឧបនាយករដ្ឋមន្ត្រី ជា សុផារ៉ា បានចុះបញ្ជាផ្ទាល់ក្នុងយុទ្ធនាការរំដោះចំណីឆ្នេរ ស្ថិតក្នុងឃុំអូត្រេះ ស្រុកស្ទឹងហាវ ខេត្តព្រះសីហនុមកវិញ គិតមកដល់ម៉ោង ជាង២រសៀលថ្ងៃទី១៩ កញ្ញា ម្សិលមិញ ជាលទ្ធផលបានប្រមាណ៤០%ហើយ ។ នេះបើយោងតាមប្រភពមន្ត្រីស្រុកស្ទឹងហាវ បានឱ្យដឹងនារសៀលថ្ងៃទី១៩ កញ្ញា ។
លោក ឆាយ សុគន្ធដា អភិបាលស្រុកស្ទឹងហាវ បានប្រាប់បណ្តាញព័ត៌មានតាមប្រព័ន្ធទូរស័ព្ទថា ខណៈពេលនេះ លោកពុំបានស្ថិតនៅក្នុងទឹកដីខេត្តព្រះសីហនុទេ លោកជាប់មកប្រជុំនៅរាជធានីភ្នំពេញ ប៉ុន្តែមន្ត្រីរបស់លោកនៅធ្វើការទីនោះ បានរាយការណ៍បឋមឱ្យដឹងថា គិតមកដល់រសៀលថ្ងៃទី១៩ កញ្ញា ការកាយដីចេញវិញនោះ បានប្រហាក់ប្រហែល៤០%ហើយ ដោយប្រើគ្រឿងចក្រអេស្កាវា៉ទ័រចំនួន៥គ្រឿង ប៊ុលឌុលហ្សែរ១គ្រឿង និងរថយន្តដឹកដីធុនធំចំនួនជាង១០គ្រឿង ។ ចំណែកអាចម៍ដី ត្រូវបានដឹកចេញទៅចាក់នៅទីតាំងផ្សេងគ្នា (ដោយមិនកំណត់ទេ) ។
ចំពោះការចំណាយទៅលើគ្រឿងចក្រនិងរថយន្តដឹកចេញនេះជាបន្ទុករបស់ក្រុមហ៊ុនជាអ្នកទទួលខុសត្រូវទាំងស្រុង ។ ដោយឡែក លោក សាមុត សុធារិទ្ធ ប្រធានមន្ទីរបរិស្ថានខេត្តព្រះសីហនុ ពុំអាចសុំការបំភ្លឺបានទេ ដោយលោកអះអាងថា លោកជាប់រវល់លោកមានការងារច្រើន លោកពុំមានព័ត៌មានច្បាស់ផ្ដល់ឱ្យអ្នកសារ ព័ត៌ មាន ។
ស្របពេលជាមួយគ្នានោះដែរ ប្រជាពលរដ្ឋទូទាំងខេត្តព្រះសីហនុ ក៏ដូចជាប្រជាពលរដ្ឋនៅទូទាំងប្រទេស បានសម្តែងការសាទរយ៉ាងខ្លាំង ដោយអ្នកខ្លះ បានសរសេរនៅក្នុងអាក់ខោនហ្វេសប៊ុករបស់ខ្លួន ដោយបានថ្លែងអំណរគុណយ៉ាងជ្រាលជ្រៅ ចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជានាចក្រកម្ពុជា និងលោក ជា សុផារ៉ា ដែលបានប្រើធម៌ក្តៅទៅលើក្រុមហ៊ុនរំលោភដីសមុទ្រ ហើយចាត់ទុកថា នេះគឺជាសារមួយដ៏មានខ្លឹមសារ សម្រាប់ក្រុមអ្នកមានអំណាច ឬមានប្រាក់ចាយដុតខ្លួនមិនអស់ ដែលតែងតែគិតតែផលប្រយោជន៍បុគ្គល ពុំចេះខ្វាយខ្វល់ អំពីផលប៉ះពាល់ដល់សង្គមជាតិ ។
ក្នុងពេលជាមួយគ្នានោះផងដែរ ប្រភពដដែល ក៏បានអំពាវនាវយ៉ាងទទូចដល់លោកឧបនាយករដ្ឋមន្ត្រី
ជា សុផារ៉ា សូមមេត្តាបន្តបេសកកម្មនេះ នៅលើទឹកខេត្តព្រះសីហនុបន្តទៀត ព្រោះនៅមានទីតាំងជាច្រើនកន្លែងទៀត ដែលបានរំលោភដីសាធារណៈរបស់រដ្ឋ ដូចជានៅតំបន់បឹងព្រែកទប់ តំបន់ពយកំពេញ តំបន់អូត្រេះចាស់ តំបន់បឹងកង្កែប តំបន់ប្រជុំកោះរ៉ុង និងនៅឆ្នេរសមុទ្ររាមជាដើម ។ល។ ដែលនៅតំបន់ទាំងនោះ មានកន្លែងខ្លះចាក់ដីចូលសមុទ្ររាប់រយម៉ែត្រក៏មាន និងបានកំពុងសាងសង់សំណង់រឹងមាំនៅលើសមុទ្រទៀតផង ដើម្បីកុំឱ្យអ្នកដទៃច្រណែននិន្ទា ៕
ចែករំលែកព័តមាននេះ