រាជធានីភ្នំពេញ ៖ បុរសបើករថយន្តសាំយ៉ុងមួយគ្រឿងបានបើកលឿនមិនប្រយ័ត្ន គេចពីម៉ូតូមួយគ្រឿងក៏ជ្រុលទៅបុករបាំងថ្មពុះចែកទ្រូងផ្លូវ បណ្ដាលឲ្យបាក់អស់ពីរផ្ទាំង រថយន្តទៅមុខលែងរួច ។ ហេតុការណ៍នេះបានកើតឡើងកាលពីវេលាម៉ោង៥ព្រឹកថ្ងៃទី២០ ខែកញ្ញា ឆ្នាំ២០១៨ តាមបណ្ដោយផ្លូវលេខ២៧១ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសវ័យប្រហែល២៥ឆ្នាំម្នាក់ បើកបររថយន្តមួយគ្រឿងម៉ាក់ស័រដេះ ពណ៌ស ជាប្រភេទរថយន្តសាំយ៉ុង១២កៅអី ពាក់ស្លាកលេខ កំពត 2A- 1571 ។ ដោយធ្វើដំណើរតាមបណ្តោយផ្លូវលេខ២៧១ ក្នុងទិសដៅបើកមកស្តុបណូគា ឆ្ពោះទៅស្ពានអាកាស៧មករា និងក្នុងល្បឿនលឿន ។ លុះមកដល់ចំណុចកើតហេតុ ដោយអ្នកបើកបររថយន្តខាងលើគេចពីម៉ូតូមួយគ្រឿងមិនចាំម៉ាក ដែលនៅពីរមុខរថយន្តទៅខាងឆ្វេង រួចក៏ជ្រុលចង្កូតទៅរបាំងថ្មពុះចែកទ្រូងផ្លូវ បណ្ដាលឲ្យវាចនិងបាក់ដួលអស់ពីរផ្ទាំង ។ ចំណែកឯរថយន្តខាងរងការខូចខាតក្រពឹតកាង និងដាក់ក្រឡេកង់ខាងមុខចំហៀងខាងឆ្វេងទៅមុខលែងរួច តែមិនបង្កឲ្យមានអ្នករងរបួសនោះទេ ។
ក្រោយពេលកើតហេតុសមត្ថកិច្ចមូលដ្ឋាន និងសមត្ថកិច្ចជំនាញបានចុះមកដល់ចំណុចកើតហេតុ ហើយបានធ្វើការស្ទូចយករថយន្តបង្កខាងលើទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ