ខេត្តព្រៃវែង ៖ រថយន្តឡិចស៊ីសមួយគ្រឿងបើកធ្លាក់ផ្លូវក្រឡាប់ជាច្រើនត្រឡប់ សំណាងល្អមនុស្ស២នាក់នៅក្នុងរថយន្តមិនមានរបួសអ្វីធ្ងន់ធ្ងរនោះទេ។ ហេតុការណ៍នេះបានកើតឡើងកាលពីវេលាម៉ោង៤និង៣០នាទីរសៀល ថ្ងៃទី១៨ កញ្ញា នៅលើកំណាត់ផ្លូវជាតិលេខ៨A ត្រង់ចំណុចមុខវត្តជ្រៃសាមគ្គីមុនីឩត្តម ដែលស្ថិតក្នុងភូមិជ្រៃវាល ឃុំជ្រៃ ស្រុកស្វាយអន្ទរ ខេត្តព្រៃវែង។
រថយន្តរងគ្រោះខាងលើម៉ាកឡិចស៊ីស RX300 ពណ៌ទឹកមាស ពាក់ស្លាកលេខ ភ្នំពេញ ២J-៨៩៧៩ ជារថយន្តតាក់ស៊ីដឹកអ្នកដំណើរ បើកបរដោយបុរសម្នាក់ឈ្មោះ មករា អាយុ៣៦ឆ្នាំ មានស្រុកកំណើតនៅខេត្តកំពង់ចាម និង មុខរបរជាអ្នករត់តាក់ស៊ី។
តាមសំដីរៀបរាប់របស់ម្ចាស់រថយន្តឡិចស៊ីសខាងលើបានអោយដឹងថា គាត់បានដឹកជនជាតិចិនម្នាក់ចេញមកពីច្រកទ្វារអន្តរជាតិត្រពាំងថ្លុងបើកបរក្នុងទិសដៅឆ្ពោះទៅរាជធានីភ្នំពេញ ប៉ុន្តែពេលមកដល់ចំណុចកើតហេតុ មានរថយន្តកុងទីន័រមួយគ្រឿងបើកនៅពីមុខក្នុងទិសដៅស្របគ្នាបានបើកគៀរថយន្តរបស់គាត់ ទើបធ្វើអោយរថយន្តធ្លាក់ផ្លូវទៅខាងឆ្វេងដៃ បុករះស្លាកកំណត់ដែនរដ្ឋបាលស្រុកកំចាយមារបាក់អស់១ផ្ទាំង រួចក៏ក្រឡាប់ជាច្រើនត្រឡប់ធ្លាក់ទៅក្នុងវាលស្រែតែម្តង។
បើតាមការអោយដឹងពីសាក្សីនៅក្បែកន្លែងកើតហេតុបានបញ្ជាក់ថា ពេលកើតហេតុ គេឃើញរថយន្តម៉ាកឡិចស៊ីសបើកបរមកពីក្រោយរថយន្តកុងទីន័រក្នុងទិសដៅស្របគ្នា ពេលមកដល់កន្លែងកើតហេតុ រថយន្តឡិចស៊ីសបានបើកជែងទៅខាងឆ្វេងដៃបំណងវ៉ារថយន្តកុងតឺន័រនោះ តែរថយន្តកុងតឺន័របិទមិនអោយវ៉ា ទើបរថយន្តឡិចស៊ីសជ្រុលចង្កូតធ្លាក់ទៅចិញ្ចើមថ្នល់ខាងឆ្វេងដៃ បុកស្លាកកំណត់ដែនរដ្ឋបាលស្រុក រួចក៏ក្រឡាប់ជាច្រើនត្រឡប់តែម្តង។
ទោះជាយ៉ាងណាក៏ដោយ នេះចាត់ទុកថាជាសំណាងមួយក្នុង១ពាន់គ្រោះថ្នាក់ ដែលរថយន្តក្រឡាប់ជាច្រើនត្រឡប់ រហូតខ្ទេចមើលលែងយល់ ប៉ុន្តែមនុស្សនៅក្នុងរថយន្តបែរជាមិនមានគ្រោះថ្នាក់ ហើយក្រោយកើតហេតុ សមត្ថកិច្ចបានចុះទៅដល់កន្លែងកើតហេតុ និងបាននាំយករថយន្តឡិចស៊ីសខាងលើមករក្សាទុកនៅប៉ុស្តិ៍រដ្ឋបាលឃុំជ្រៃ ដើម្បីអោយម្ចាស់រថយន្តចចារដោះស្រាយជាមួយខាងសាធារណៈការលើករណីបុកបាក់ស្លាកកំណត់ដែនរដ្ឋបាលស្រុកកំចាយមារ៕
ចែករំលែកព័តមាននេះ