ខេត្តកណ្តាល ៖ បុរសម្នាក់មានចរិតឈ្លើយកោងកាច រហូតធ្វើឲ្យម្ដាយមីងមិនពេញចិត្តក្លាយជាការស្អប់កាត់កាល់ចោលលែងរាប់រក ជាហេតុធ្វើឲ្យបុរសនេះតូចចិត្តតូចថ្លើមយ៉ាងខ្លាំង និងបានចងគំនុំដក់ជាប់នៅក្នុងចិត្តថែមទៀតផង។ លុះពេលផឹកស្រវឹង បានប្រើហិង្សាជេរប្រមាថ និងប្រើជើងរន្ទះទាត់ម្ដាយមីងចំនួន៥ ជើងបណ្ដាលឲ្យគ្រេចជើង…
ខេត្តកណ្តាល ៖ បុរសម្នាក់មានចរិតឈ្លើយកោងកាច រហូតធ្វើឲ្យម្ដាយមីងមិនពេញចិត្តក្លាយជាការស្អប់កាត់កាល់ចោលលែងរាប់រក ជាហេតុធ្វើឲ្យបុរសនេះតូចចិត្តតូចថ្លើមយ៉ាងខ្លាំង និងបានចងគំនុំដក់ជាប់នៅក្នុងចិត្តថែមទៀតផង។ លុះពេលផឹកស្រវឹង បានប្រើហិង្សាជេរប្រមាថ និងប្រើជើងរន្ទះទាត់ម្ដាយមីងចំនួន៥
ជើងបណ្ដាលឲ្យគ្រេចជើង ។ បន្ទាប់មក បានទាញចានឆ្នាំងរបស់ម្ដាយមីងបោកចោល បណ្ដាលឲ្យបែកនិងក្រពឹត បង្កឲ្យមានការភ្ញាក់ផ្អើលដល់អ្នកភូមិទាំងយប់ ហើយកម្លាំងនគរបាលឃុំទួលព្រេចបានទៅអន្តរាគមន៍ចាប់ខ្លួនភ្លាមៗតែម្ដង ។
ហេតុការណ៍នេះ កើតឡើងកាលពីវេលាម៉ោង៦និង២៥នាទីល្ងាចថ្ងៃទី១៦ ខែកញ្ញា នៅភូមិខ្លុង ឃុំទួលព្រេច ស្រុកអង្គស្នួល ។មន្ត្រីនគរបាលឲ្យដឹងថា បុរសម្នាក់នេះឈ្មោះចក់ ឡាង ហៅជាតិ អាយុ២៤ឆ្នាំ មុខរបរមិនពិតប្រាកដ ។ ចំណែកស្ត្រីរងគ្រោះជាម្តាយមីងឈ្មោះ អ៊ុយ សាវរី អាយុ៣៩ឆ្នាំ ជាកម្មការិនីរោងចក្រ ។ ស្ត្រីជាម្ដាយមីងបង្កើតរូបនេះ ត្រូវលោកក្មួយជេរប្រមាថនិងទាត់៥ជើងបណ្តាលឲ្យគ្រេចជើងខាងស្តាំ ហើយសម្ភារដែលខូចខាតគឺបែកចានមួយចំនួន ក្រពឹតឆ្នាំង១ និងគោ១ក្បាលក៏រងរបួសជើងមុខដែរដោយសារអំបែងចាន ។
ប្រភពដដែលឲ្យដឹងទៀតថា បុរសនេះមានចរិតកោងឈ្លើយ មិនសូវគោរពម្ដាយមីងទេ ហើយកន្លងមកតែងតែបញ្ចេញអាកប្បកិរិយាមិនសមរម្យ ទើបម្ដាយមីងស្អប់និងមិនរាប់រក។ ដោយសារតែមូលហេតុខាងលើ ធ្វើឲ្យជនជម្លើយជាក្មួយខឹងសម្បានិងមានគំនុំនឹងម្ដាយមីង លុះនៅល្ងាចថ្ងៃកើតហេតុ បានផឹកស្រាស្រវឹងធ្លាក់ភ្នែក ហើយក៏ស្រែកជេរប្រមាថម្ដាយមីងយ៉ាងចាស់ដៃ ។
ប្រភពដដែលបន្តថា ជននេះបានស្រែកគំរាមម្តាយមីងថា «យប់នេះមិនឲ្យរួចខ្លួនទេ អញនឹងសម្លាប់ហើយ» បន្ទាប់មកបានហក់ទៅទាត់ធាក់ម្ដាយមីងចំនួន៥ជើងត្រូវចំភ្លៅខាងស្តាំ។ ខណៈនោះបង្កឲ្យមានការភ្ញាក់ផ្អើលយ៉ាងខ្លាំងហើយកម្លាំងនគរបាលបានទៅអន្តរាគមន៍ ចាប់ខ្លួនភ្លាមៗ នាំទៅកាន់អធិការដ្ឋាននគរបាលស្រុកអង្គស្នួល ដើម្បីសាកសួរនិងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ