រាជធានីភ្នំពេញ ៖ បុរសម្នាក់បានបង្កការភ័យខ្លាចដល់អ្នកភូមិគ្រប់ពេល ដោយសារតែជននេះជាមុខសញ្ញាប្រើប្រាស់និងជួញដូរគ្រឿងញៀន ព្រមទាំងផ្ដល់ទីតាំងឲ្យក្រុមអ្នកនិយមសេពគ្រឿងញៀនបានទៅប្រមូលផ្ដុំគ្នាសេពគ្រឿងញៀនយ៉ាងពពាក់ពូនស្ទើររាល់ថ្ងៃ ។ មិនតែប៉ុណ្ណោះ ជននេះធ្លាប់មានប្រពន្ធដល់ទៅ៤នាក់
ប៉ុន្តែប្រពន្ធទាំង៤នាក់នោះសុទ្ធតែមិនអាចទ្រាំរស់នៅជាមួយរូបគេបានឡើយ ព្រោះជននេះជាមនុស្សញៀនថ្នាំ ហើយតែងតែវាយធ្វើបាបប្រពន្ធគ្រប់គ្នា ទើបពួកនាងៗស៊ូទ្រាំមិនបាន ក៏រត់ចោលអស់ ។
ដោយសារតែបង្កការភ័យខ្លាច ទើបនៅវេលាម៉ោង៣និង៣០នាទីរសៀលថ្ងៃទី១៧ ខែកញ្ញា ប្រជាពលរដ្ឋបានរាយការណ៍ដល់សមត្ថកិច្ចឲ្យចាប់ខ្លួនបុរសរូបនេះចាត់ការតាមច្បាប់ ដោយដកហូតបានពូថៅ កន្ត្រៃ កាំបិត និងឧបករណ៍សម្រាប់ប្រើប្រាស់គ្រឿងញៀនមួយចំនួនទៀត ។បុរសរូបនេះឈ្មោះ ស្រ៊ុន វណ្ណដេត អាយុ២៦ឆ្នាំ រស់នៅផ្ទះជួលក្នុងភូមិស្រែជម្រៅ សង្កាត់ចោមចៅ២ ខណ្ឌពោធិ៍សែនជ័យ និងមានទីលំនៅក្នុងភូមិព្រៃសណ្តែក សង្កាត់ចោមចៅ២ ខណ្ឌពោធិ៍សែនជ័យ ។
តាមអ្នកជិតខាងប្រាប់ថា ជននេះធ្លាប់មានប្រពន្ធដល់ទៅ៤នាក់ ប៉ុន្តែគ្មាននាងណាម្នាក់អាចស៊ូទ្រាំរស់នៅជាមួយបានឡើយ ព្រោះតែការប្រើហិង្សាវាយដំច្រំធាក់ធ្វើបាបទាំងផ្លូវកាយនិងផ្លូវចិត្ត ប្រៀបដូចសត្វធាតុ។ មន្ត្រីនគរបាលបានឲ្យដឹងថា ជនរូបនេះគឺជាមុខសញ្ញាប្រើប្រាស់គ្រឿងញៀនផង ជួញដូរផង និងជាអ្នកផ្ដល់ទីតាំងសម្រាប់ឲ្យក្រុមអ្នកប្រើប្រាស់គ្រឿងញៀនដទៃទៀត ប្រមូលផ្ដុំគ្នាទៅសេពគ្រឿងញៀននៅផ្ទះរបស់ខ្លួនផងដែរ ។ជននេះបានបង្កការភ័យខ្លាចដល់អ្នកភូមិគ្រប់ពេល ប៉ុន្តែកន្លងមកមិនមានអ្នកណាហ៊ានរាយការណ៍ប្រាប់នគរបាលឲ្យចាប់ខ្លួនឡើយ ព្រោះខ្លាចជននេះដឹងតាមរករឿងឬធ្វើបាប ។
លុះមកដល់ថ្ងៃទី១៧ ខែកញ្ញា ខណៈកម្លាំងគណៈបញ្ជាការឯកភាពសង្កាត់ចោមចៅ២ ចុះធ្វើរដ្ឋបាល ទើបអ្នកភូមិលួចខ្សឹបប្រាប់ ហើយសមត្ថកិច្ចចូលទៅត្រួតពិនិត្យនិងចាប់ខ្លួនជននេះដល់ក្នុងផ្ទះជួលតែម្ដង រួចនាំទៅប៉ុស្តិ៍ដើម្បីសាកសួរ និងកសាងសំណុំរឿងតាមច្បាប់ ៕
ចែករំលែកព័តមាននេះ